Marko

14 Vano, yaahala mahiku manli wira ophiye Paasikha ni Efesta ya Iphaawu Soohiheliwa Eferemento. Makhulupale a anamukuttho ni alipa-oowiixuttiha Nlamulo, yaaniphavelasa enamuna ya onvara Yesu nuulavilavi, wira amwiive. 2 Masi, yaanihimeeryana wira: “Ohikhale okathi wa efesta, woonasa wene onookhumelela onyakulasa eriyari ya atthu”.

3 Okathi Yesu aari awe oBethania, alyaaka* vatthokoni va Simoni, yoowo khalai aarina makokho,* aahiphiya muthiyana mmosa, aakunxe ekarafa* ya makhura oowunkhela ni a musurukhu munceene, yaapakiwe ni narto,* oohitakaaheriwa etthu. Nto aahitthukula ekarafa eyo, onamuhela Yesu makhura mmuruni. 4 Awehaka-ru etthu ele, awiixutti akina yaanihimeeryana ahisiveliwe, ariki: “Xeeni ahalaka oyiihiwa makhura ala mahala ene? 5 Makhura ala yaamutumihiwa musurukhu onivikana itenaario* 300, vano musurukhu ene akaweliwe alipa-oohaawa!” Nto yaahinanariwa vanceene ni muthiyana ole. 6 Masi Yesu aahiwiirela: “Mmuhiye. Xeeni munimulavula anyu siiso muthiyana ola? Ola ookiirela etthu yooreera. 7 Okathi wotheene munookhalaka ni alipa-oohaawa, nto munoowiirelaka itthu sooreera, okathi oniphavela anyu. Masi khamunrowa okhalaka ni miyo imaara sotheene. 8 Muthiyana ola oopaka eniwerya awe. Ookihela makhura oowunkhela, wira olokiherye erutthu aka, kihinatthi ovithiwa. 9 Kinooleelani ekeekhai wira, khula opuro onrowa aya olaleiwaka ihapari sooreera olumwenku wotheene, atthu anoolavulaka ele epanke awe muthiyana ola, wira uupuweleliweke”.

10 Vano, Yuda Isikaryoti, mmosa a arummwa 12, aahirowa okumana ni makhulupale a anamukuttho, wira onvarihe Yesu. 11 Nuumala makhulupale a anamukuttho wiiwa etthu ele, yaahitteeliwa murima vanceene, ni yaahimuleiherya onvaha Yuda Isikaryoti musurukhu wa eparatha. Okhuma nihiku nle, Yuda aaniphavelasa okathi wooreerela wira onvarihe Yesu.

12 Vano, nihiku noopacerya na Efesta ya Iphaawu Soohiheliwa Eferemento, nenlo naalimaleliwe ovahiwa mukuttho wa Paasikha, awiixutti awe Yesu yaahimukoha, ariki: “Muniphavela wira noolokiheryeni woowi yoolya ya Paasikha?” 13 Yesu aahaaruma awiixutti awe anli, aaleela wira: “Murowe opooma, munookumana ni mulopwana mmosa, okunxe ene murinki wa maasi. Nto mmutthare. 14 Vano, empa onrowa awe okela mpaani, mmuleele mwaneene empa eyo, wira: ‘Mwiixuttihi onihimya so: “Eri woowi esaala ya aletto kinrowa aka omulya Paasikha ni awiixutti aka?”’ 15 Nto owo onoowooniheryani esaala yuulupale eri osulu. Esaala eyo, yoolokiheriwa wira nirumeele. Mwamulokiherye memmo Paasikha ahu”. 16 Siiso, awiixutti yaahirowa opooma, aphwanya itthu ntoko Yesu aahimenrye awe. Vano yaahimulokiherya Paasikha.

17 Vailaka-ru, Yesu ni arummwa 12 yaahiphiya. 18 Okathi yaakilanthi aya analya ahamenle ene meesa, Yesu aahaahimeerya wira: “Kinooleelani ekeekhai wira, mmosa a nyuwo onlya ni miyo, onookivariha”. 19 Arummwa yaahiriipiwa murima, anapacerya mmosa-mmosa omukoha Yesu, iiraka: “Kiireke toko ti miyo?” 20 Vano, aahiwaakhula oriki: “Ti mmosa a nyuwo 12, ole onreryana aka vamosa mutixelani.* 21 Veekeekhai, Mwaana a mutthu onoorowa, ntoko silempwale aya. Masi ootakhaliwa mutthu ole onrowa onvariha Mwaana a mutthu! Fataari mutthu owo ahaayariwe”.

22 Nto elyaaka siisaale, Yesu aahikuxa ephaawu, aahivekela, aahikawanya, onaavaha awiixutti awe, iiraka: “Mukuxe, mukhuureke. Ela enithoonyerya erutthu aka”. 23 Siiso, aahikuxa ekaalisi ya eviinyu, aahivekela. Nuumala-vo, aahaavaha awiixutti awe, nto otheene aya yaahiwurya. 24 Vano, aahaahimeerya wira: “Ela enithoonyerya ‘ephome aka ya nivarihano’, yeeyo enrowa omwarexiwa wira yaaphwanyihe mureerelo atthu anceene. 25 Tthiri kinooleelani wira: Nkiniwurya-tho eviinyu ela, mpakha nihiku nenlo ninrowa aka owurya eviinyu esya Moomweneni mwa Muluku”. 26 Nuumala wiipa isipo,* awo yaahirowa omwaako Olivera.

27 Vano Yesu aahaaleela awiixutti awe, wira: “Otheene anyu munookikhootta, maana voolempwa wira: ‘Kinoomwiiva makampusi, nto ipwittipwitthi sawe sinoomwareya’. 28 Masi kahihimuxiwa, kinoohoola kirowaka oGalileya”. 29 Vano Pedru aahihimya wira: “Hata otheene yoohiyakani, miyo nkinoohiyani!” 30 Nto, Yesu aahimuhimeerya wira: “Kinooleelani ekeekhai wira olelo, aayo, ohiyu yoola, muthupi ohinatthi wiipa vanli, nyuwo munookikhootta ikwaha tthaaru”. 31 Masi Pedru aanithipelela, ohimyaka wira: “Tthiri miyo nkinookhoottani, hata kikhwaaka ni nyuwo”. Nave awiixutti akina, yaahihimya etthu emosa-ru.

32 Nto Yesu ni awiixutti awe yaahirowa nipuro naihaniwa Xeseemani, aahimeerya awiixutti awe wira: “Mukilaathi-va, miyo kinrowa ovekela”. 33 Vano aahimukuxa Pedru, Yakobo ni Yohani. Okathi owo, Yesu aahipacerya oriipiwa murima vanceene. 34 Nto aahaahimeerya wira: “Kooriipiwa murima vanceene, kinahala okhwa. Muhale vaava, muthipeleleke owehaweha”. 35 Orowaka ohoolo vakhaani, Yesu aahikokhora, onavekela wira vaweryaneya, muxankiho ole waarowa okhumelela, ovire. 36 Nto Yesu aahihimya wira: “Abba,* Tiithi, nyuwo munniwerya itthu sotheene; mukumihe ekaalisi* ela ohoolo waka. Vano, ehiireye ntoko kiniphavela aka, masi yiireye ntoko muniphavela anyu”. 37 Aahitthikela vaari awiixutti awe, aaphwanya arupaka, nto aahimuhimeerya Pedru wira: “Simoni, munoorupa? Khanwenrye owehaweha ewoora emosa? 38 Muthipeleleke owehaweha, nvekeleke voohihiyererya, wira muhimore mweehereriwaka. Murima onniphavela tthiri, masi erutthu teri yootteettheya”. 39 Yesu aahirowa-tho ovekela, ohimyaka etthu emosa-ru. 40 Aahitthika-tho, aaphwanya awiixutti arupaka, okhala wira ikhove saahaaveliha. Siiso, awo khiyoona yoomwaakhula. 41 Aahitthika ekwaha ya neeraru, aahimeerya awiixutti wira: “Okathi ntoko ola, nyuwosa munoorupa ni ophumurya? Paahi, ewoora yoophiya! Moone wira, Mwaana a mutthu onoovahereriwa mmatatani mwa anatampi. 42 Nvenye, nrowe. Ole onikivariha oophiya!”

43 Niinaano-ru, Yesu olavulaka nlelo, aahiphiya Yuda, mmosa a arummwa 12, ori ene ni muttitthi wa atthu, waakunxe axoowa* ni ikopo. Atthu awo yaarummwale ni makhulupale a anamukuttho, alipa-oowiixuttiha Nlamulo ni makhulupale a ayuda. 44 Vano, ole aarowa onvariha Yesu aahaavaha esinaale, oriki: “Ole onrowa aka onvaha epeexo, ti yoowo. Munvareke. Mmukuxe ni muhimuhiye otthyawaka”. 45 Yuda aahirowa vaari Yesu, omwaattamela, onamuhimeerya wira: “Rabi!”* Vano, aahinvaha epeexo. 46 Nto muttitthi ole waahinvara Yesu, khimukuxa. 47 Vano, mutthu mmosa aari vaavale, aahimukumiha xoowa* awe, khumwiikittha niyaru murumeyi a namukuttho muulupale. 48 Yesu aahaaleela atthu ale, oriki: “Nyuwo murwenle okivara ni axoowa* ni ikopo ntoko latarau? 49 Khula nihiku, kaanikhala mutemplo kiixuttihaka, masi nyuwo khimwaakivanre. Masi, itthu iya sihiiraneya wira simaliheriwe Soolempwa”.

50 Nto awiixutti otheene yaahimuhiya, etthyawa. 51 Vano, mmiravo mmosa, yoowo aawanre paahi nlaya na eliinyu yooreera, aanimutthara Yesu vakhiviru vene. Nto atthu ale yaaheererya onvara mmiravo owo, 52 masi owo aahihiya nlaya nawe na eliinyu, otthyawa ohiwanre etthu.*

53 Atthu ale, yaahimuroiha Yesu wa namukuttho muulupale, weiwo waathukumanne aya makhulupale a anamukuttho, makhulupale a ayuda ni alipa-oowiixuttiha Nlamulo. 54 Masi Pedru, aanimutthara Yesu omurakamenle ene, mpakha ophiya vate va namukuttho muulupale. Vano, aahikilaathi ni anamuteko a vatthokoni, anoora mooro. 55 Makhulupale a anamukuttho ni eSineedrio* yotheene, yaanaaphavela atthu yaarowa omootherya Yesu, wira amwiivihe, masi khuuvo aakhumelenle. 56 Atthu anceene yaanimootherya Yesu, masi moolumo aya yaanivirikana. 57 Nave-tho, atthu akina yaaneemela anamootherya, ariki: 58 “Noomwiiwa mulopwana ola ohimyaka wira, ‘Miyo kinoopwexa etemplo ela, yeeyo etekiwe ni matata, masi muhina mwa mahiku mararu kinooteka ekina ehipakiwe ni matata’”. 59 Hata mwaha ola, moolumo aya yaanivirikana.

60 Nuumala-vo, namukuttho muulupale aaheemela eriyari aya, onamukoha Yesu oriki: “Nyuwo khamunaakhula etthu? Niireke khamuniiwa ele enihimya aya atthu ala?” 61 Masi Yesu aaroomaala, ohaakhula etthu. Nto namukuttho muulupale, aahimukoha-tho wira: “Niireke nyuwo mwa Kristu, Mwaana a Muluku Muulupalexa?” 62 Yesu aahimwaakhula wira: “Aayo, ti yoomi. Nyuwo munonweha Mwaana a mutthu okilanthi ene wiirimu moono woolopwana wa Muluku Oowerya, ni munonweha orwaaka mmeekuni”. 63 Vano, namukuttho muulupale aahikhera malaya awe, onahimya wira: “Khinnaaphavela-tho anamoona! 64 Nyuwo moomwiiwa onveehaka Muluku. Munoonela sai?” Otheene aya yaahimulamula wira onniphwanela wiiviwa. 65 Nto, atthu akina yaanimusenela ni yaanimukhuneela owiitho, anammana, amwiirelaka so: “Mwaari profeta, munileele ti pani oomanneni!” Nto makwarta a otripunaale yaahimmana owiitho, anamukuxa.

66 Vano Pedru ori ene mukintaali, aahirwa muthiyana mmosa, yoowo aari murumeyi a namukuttho muulupale. 67 Muthiyana owo omoonaka-ru Pedru ooraka mooro, aahinwehexexa oratteene, onamuhimeerya wira: “Nyuwo-tho mwaari ni Yesu, munazarethi”. 68 Masi Pedru aahikhootta, iiraka: “Nkinimusuwela mulopwana ola, hata nkinisuwela enihimya anyu”. Nuumala-vo, aahirowa vamukhora wa ekintaali. 69 Murumeyi ole mwaamuthiyana aahinweha, onaahimeerya-tho atthu yaari vaavale oriki: “Ola mmosa a awiixutti awe”. 70 Pedru aahikhootta-tho. Nuuvira okathi vakhaani, atthu yaari vaavale yaahimwiirela: “Mweekeekhai nyuwo-tho mwa mmosa a yaawo, maana nyuwo mwa mugalileya tthiri”. 71 Nto Pedru aahipacerya olapha, ohimyaka wira: “Miyo nkinimusuwela mulopwana owo onimuhimya anyu!” 72 Niinaano-ru, muthupi waahiipa ekwaha ya nenli. Vano, Pedru aahuupuwela ele Yesu aamuhimenrye awe, oriki: “Muthupi ohinatthi wiipa ikwaha piili, nyuwo munookikhootta ikwaha tthaaru”. Nto, Pedru aahiriipiwa murima, onapacerya wunla.