Yohani
7 Nuumala-vo, Yesu aaneetteetta muttetthe wa oGalileya. Owo khaaphavela weetteetta oYudeya, maana ayuda yaaphavela omwiiva. 2 Vano, niira na Maxaxa na ayuda naahaattamela. 3 Nto axihima awe Yesu yaahimuhimeerya wira: “Mukhume-nno, murowe oYudeya, wira awiixutti anyu akina a weiwo, nave yawehe miteko munivara anyu. 4 Khuuvo oniira ophavelaka osuweliwa ni atthu anceene, khiyavara itthu wiiphiini. Mwaavaraka itthu iya, weeso nvareke ohoolo wa atthu otheene”. 5 Mweekeekhai, axihima awe khiyaamwaamini. 6 Nto Yesu aahaaleela wira: “Okathi aka khonatthi ophiya. Masi nyuwo, okathi wotheene ti wawinyu. 7 Atthu a olumwenku ola kharina nthowa na woonyokhani, masi annikinyokha miyo, okhala wira kinnilaleya itthu sootakhala anivara aya. 8 Nyuwo murowaseke oniirani. Miyo nkinrowa oniirani iwo, maana okathi aka nlelo khonatthi ophiya”. 9 Vano, nuumala waaleela itthu iya, Yesu aahihala oGalileya.
10 Nto, nuumala axinnawe orowa oniirani, nave owo aahirowa voohisuweliwa. 11 Siiso, ayuda yaahipacerya omwaavya oniirani iwo, ahimyaka wira: “Mulopwana ole ori vai?” 12 Vano, mittitthi sa atthu saanimwaapa. Akina yaahimya so: “Ole mulopwana ooreera murima”. Masi akina yaahimya wira: “Khahiyo. Ole onaahapuxa atthu”. 13 Veekeekhai, khuuvo aalavula myaha sa Yesu opuro woowaatta atthu, okhala wira yaaniwoova ayuda.
14 Okathi niira neetta aya eriyari,* Yesu aahikela mutemplo, onapacerya wiixuttiha. 15 Ayuda yaahitikinihiwa vanceene, anahimya wira: “Mulopwana ola onisuwela sai oratteene Soolempwa, ohitonko osoma ixikola sa etiini?”* 16 Vano, Yesu aahiwaakhula wira: “Itthu siniixuttiha aka, khahiyo sawaka, masi ti sawawe ole okirumme. 17 Akhala mutthu oniphavela opaka ele Muluku oniphavela awe, mutthu owo onoosuwela vakhala wira itthu kiniixuttiha aka ti sa Muluku aahiiso sinikhuma mmuruni mwaka. 18 Mutthu onilavula itthu sinikhuma mmuruni mwawe, oniphavela wiivuwiha. Masi mutthu oniphavela onvuwiha ole omurumme, onnilavula ekeekhai, nave onnipaka itthu sotheene mwa xariya. 19 Kiira Moise toovanheni Nlamulo? Masi khuuvo a nyuwo oniiwelela Nlamulo nlo. Xeeni muniphavela anyu okiiva?” 20 Muttitthi wa atthu, waahimwaakhula oriki: “Nyuwo mookhalana nlaikha nootakhala. Ti pani oniphavela owiivani?” 21 Nto Yesu aahiwaakhula oriki: “Miyo koopaka mwiiriirya mmosa esaabadu, nto nyuwo otheene mootikinihiwa. 22 Nkahaya muupuwele ela: Moise ohoovahani nlamulo na wunnuwihiwa. Masi nlamulo nlo khanikhumme okathi wa Moise, nikhumme okathi wa amuhavinre anyu. Tivo nyuwo munniwunnuwiha anamwane axilopwana esaabadu. 23 Vakhala wira anamwane axilopwana anninnuwihiwa esaabadu wira nihitthekeliwe Nlamulo na Moise, xeeni munnanariwa anyu vanceene ni miyo, mwaha woowi kompenuxa mutthu voomalela esaabadu? 24 Muhiye omphukela mutthu muttharaka itthu sinooneya, masi mphukeke muttharaka exariya”.
25 Vano atthu akina, yaawo yaakhala oYerusalemu, yaahipacerya ohimya wira: “Ola khahiyo mulopwana yoole oniphavela wiiviwa? 26 Mmooneke! Owo onnilavula mapuro oowaatta atthu, nto atthu awo khanihimya etthu. Niireke toko anamalamulela aroosuwela tthiri wira owo Kristu? 27 Kristu aarwaaka, khuuvo onrowa osuwela onkhuma awe. Masi hiyo ninnisuwela mulopwana ola onikhuma awe”. 28 Okathi Yesu aixuttiha awe mutemplo, aahilavula voowiiwanyeya oriki: “Nyuwo munnikisuwela ni munnisuwela onikhuma aka. Miyo nkirwiiye kihirummwale, Ole okirumme teekeekhai, nave nyuwo khamunimusuwela. 29 Miyo kinnimusuwela, okhala wira kirwiiye mwa nsina nawe, nave Owo tokirumme”. 30 Awo yaaniphavela onvara, masi khuuvo anvanre, okhala wira okathi awe nlelo khiwaaphiyale. 31 Siiso, atthu anceene a muttitthi ole yaahimwaamini Yesu, anahimya wira: “Okathi onirwa awe Kristu, niireke onoopaka miiriirya sinceene ovikana iye mulopwana ola opanke awe?”
32 Afarisi yaahiiwa muttitthi wa atthu omulavulaka Yesu vathi-vathi, nto makhulupale a anamukuttho ni afarisi, yaahaaruma makwarta onvara Yesu. 33 Vano Yesu aahaahimeerya wira: “Miyo kinookhala ni nyuwo okathi vakhaani, kihinatthi orowa wa Ole okirumme. 34 Nyuwo munookaavya, muhikiphwanye. Nave weiwo kinrowa aka, nyuwo khamunwerya ophiya”. 35 Tivo, ayuda yaanikohana ariki: “Mulopwana ola onrowa woowi, nihinrowa ahu omphwanya? Niireke omphavela orowa wa ayuda anikhala ni akereku, wira awiixuttiheke akereku? 36 Ola oniphavela ohimya exeeni, aahimyaka wira: ‘Nyuwo munookaavya, muhikiphwanye. Nave weiwo kinrowa aka, nyuwo khamunwerya ophiya’?”
37 Nihiku nookiserya, nenlo naari nihiku nuulupalexa na niira, Yesu aaheemela, onalavula voowiiwanyeya, oriki: “Akhala mutthu ovoliwe ntthona, orwe wa miyo, awurye. 38 Ntoko sinihimya aya Soolempwa, ole onikaamini, ‘vamurimani vawe anoophattuwa maasi anivaha okumi’”. 39 Yesu aahimya munepa woowaarya, yoowo yaarowa aya waakhela ale yaamwaamini. Masi awo yiira nlelo ahaakhenle munepa owo, maana Yesu iira ohinatthi ovuwihiwa. 40 Atthu akina yaari eriyari ya muttitthi ole, yaawo yaiwale moolumo ala, yaahihimya wira: “Tthiri ola Profeta”. 41 Akina yaanihimya wira: “Ola ti Kristu”. Masi akina-tho yaanihimya wira: “Niireke Kristu onrowa okhuma oGalileya? 42 Kiira soolempwa sinihimya wira Kristu onrowa okhuma nloko na Davidi, nave onrowa okhuma oBethelehemu, weiwo Davidi aakhumme awe?” 43 Vano muttitthi waahipacerya okawanyeya. 44 Akina a yaawo, yaaniphavela onvara, masi khuuvo anvanre.
45 Vano makwarta, yaahihokolowela wa makhulupale a anamukuttho ni afarisi, nto awo yaahaakoha wira: “Muhimuruuhenle-ni?” 46 Makwarta yaahaakhula ariki: “Khuuvo mulopwana otonko olavula ntoko owo”. 47 Siiso, afarisi yaahaakoha-tho, ariki: “Niireke ni nyuwo muroohapuxiwa? 48 Niireke ookhala toko namalamulela mmosa aahiiso nfarisi omwaaminni yoowo? 49 Masi muttitthi ola wa atthu, ohinisuwela Nlamulo, ti wootakhaliwa”. 50 Vano Nikodemo, yoowo aaronwe khalai okumana ni Yesu, nave aari mmosa a yaawo, aahaakoha oriki: 51 “Niireke Nlamulo nahu ninnimphukela mutthu nihinatthi toko onwiriyana ni osuwela itthu onipaka awe?” 52 Awo yaahimwaakhula ariki: “Niireke nyuwo-tho mwa mugalileya? Mutokose, munimoona wira khuuvo profeta onrowa okhuma oGalileya.”*