Wiisuupulula

21 Nto kaahiweha erimu esya ni elapo esya. Erimu ya khalai ni elapo ya khalai saahivira, nave ephareya khiyaakhanle-tho. 2 Nave-tho, kaahiweha epooma yoowaarya, eyo piiyo, Yerusalemu a Niinaano, okhuruwaka wiirimu, okhumaka wa Muluku. Owo aahiiphwaneliha wira omwaakhele iyawe. 3 Nto kaahiiwa nsu noorunya nikhumaka veehiceni, nihimyaka wira: “Moone! Eheema ya Muluku eri ni apinaatamu, nave owo onrowa okhala naawo, ni awo anrowa okhala atthu awe. Vano, Muluku mwaneene, onrowa okhalaka naawo. 4 Owo onoopuputtha maithori aya otheene, khunrowa-tho okhala okhwa, nnakhala oriipiwa murima, wala wunla, hata woona owereya. Itthu sa khalai soovira”.

5 Nto, Ole aakilanthi veehiceni aahihimya wira: “Moone! Miyo kinnipaka itthu sotheene isya”. Aahihimya-tho wira: “Mulepe, okhala wira moolumo ala toororomeleya ni teekeekhai”. 6 Nave, aahikileela wira: “Ala ahiiraneya! Miyo ka Oopacerya ni Ookiserya.* Ole orina ntthona, miyo kinrowa onvaha mahala ene* maasi a opuro oniphattuwa maasi a okumi. 7 Ole onrowa oxintta onimwaakhela itthu iya, nave miyo kinrowa okhala Muluku awe, nto owo onrowa okhala mwanaka. 8 Masi ale oowoova, ni ale ahinaamini, ni ale oohiloka ni anivara itthu soohiirya, ni anawiive, ni ale anrupihana voohiloka,* ni anookhwiri, ni ale anaakokhorela amuluku eethiru, ni anawoothe otheene, anrowa oriheliwa vantthiyani nimpatta mooro ni enxoofere. Eyo enithoonyerya okhwa wa nenli”.

9 Nimosa na malaikha 7, yaale yaarina mihasa 7 saasareiye ihasara 7 sookiserya, naahirwa, nikileela wira: “Murwe, kiwooniheryeni muthiyana onitheliwa,* eyo piiyo, mwaarawe Mwaapwittipwitthi”. 10 Nlaikha nlo naahikikuxa ni owerya wa munepa woowaarya, nikiroiha mwaako muulupale ni woorakama. Weiwo naahikooniherya epooma yoowaarya, eyo piiyo, Yerusalemu, okhuruwaka wiirimu wa Muluku, 11 yoowo aarya ni ovuwa wa Muluku. Waarya wawe waalikana ni nluku nootepexa waarya, ntoko nluku nniihaniwa xaspe nnaarya ntoko ekiristaale.* 12 Epooma eyo, yaahikhalana exiri yuulupale ni yoorakama, ni yaahikhalana mikhora 12, nave khula mukhora naahikhala nlaikha nimosa. Mikhora iyo, saahilempwa masina a mahimo 12 a anamwane a Isarayeli. 13 Mpantta onikhuma nsuwa, saahikhala mikhora miraru. Onorti* saahikhala mikhora miraru, nave osuuli* saahikhala mikhora miraru. Mpantta onikela nsuwa saahikhala mikhora miraru. 14 Nave, exiri yaarukurenrye epooma eyo, yaahikhalana maluku 12 vaalisensoni* vaya, vaavo vaalempwale aya masina 12 a arummwa 12 a Mwaapwittipwitthi.

15 Ole aalavula ni miyo aahivarela ekopo ya eweero wira ophime epooma eyo, ni mikhora saya ni exiri aya. 16 Epooma eyo, yaahikhalana ipantte ixexe soolikana, erakamelo aya ni ekhuveelo aya yaamulikana. Vano, nlaikha nlo naahiphima epooma eyo ni ekopo, khuphwanya etthu yoowiiraka ikiloomo 2.220.* Orakama waya, ni okhuveya waya, ni orakamela waya osulu waamulikana. 17 Nlaikha nlo, naahiphima exiri ya epooma eyo, khuphwanya ikoovato 144,* sitthariheliwaka miphimo sa apinaatamu, ni miphimo sa malaikha. 18 Exiri eyo yaapakiwe ni nluku nniihaniwa xaspe, ni epooma eyo yaari ya eweero yooreerexa, ntoko eviituru yoowooneela. 19 Alisenso* a exiri ya epooma eyo, yaahireerihiwa ni maluku oowaarya oovirikana: alisenso* oopacerya aari a xaspe, a nenli aari a safira, a neeraru aari a kalsetonia, a neexexe aari a esmeralta, 20 a neethanu aari a sartoonika, a neethanu namosa aari a sartio, a neethanu nenli aari a krisoolito, a neethanu neeraru aari a periilio, a neethanu neexexe aari a topaasio, a namuloko aari a krisoopraso, a namuloko namosa aari a xasinto, a namuloko nenli aari a ametista. 21 Nave, mikhora iye 12 saari sa ipeerola* 12. Khula mukhora waapakiwe ni epeerola* emosa. Ephiro yuulupale ya epooma eyo, yaari ya eweero yooreerexa, ntoko eviituru yoowooneela.

22 Miyo nkaawenhe etemplo epooma eyo, okhala wira Yehova, Muluku Oowerya Sotheene, vamosa ni Mwaapwittipwitthi, tari etemplo ya epooma eyo. 23 Epooma eyo khemphavela omwaleeliwa ni nsuwa, nnakhala ni mweeri, okhala wira ennimwaleeliwa ni waarya wa Muluku, nave Mwaapwittipwitthi tori muthuko aya. 24 Maloko anrowa weettaka emwaleeliwaka ni muthuko wa epooma eyo. Nave mamwene a mulaponi anooruuha mpooma-mme waarya waya. 25 Mikhora saya khasinikhala-khala siwaliwaka, maana enrowa okhalaka othana paahi. Epooma eyo khenrowa wiilaka. 26 Atthu anrowa oruuha mpooma-mme nttittimiho ni ovuwa wa maloko. 27 Masi khiivo etthu yoonanara, nnakhala khuuvo mutthu onipaka itthu soohiirya, hata nawoothe khonrowa okela epooma eyo. Ale paahi masina aya alempwale murooluni ya okumi ya Mwaapwittipwitthi, tanrowa okela.