Matheyo

13 Nihiku nle, Yesu aahikhuma empa ele, onarowa okilaathi ophareya. 2 Vano mittitthi sa atthu saahithukumana ohoolo wawe, nto Yesu aahikela mukalawani, akilaathi memmo. Nave muttitthi owo wotheene, weemenle okerekhere wa ephareya. 3 Nto, Yesu aahaaleela itthu sinceene ni malikanyiho, iiraka: “Mwiiwe! Mulipa-oomisa aahirowa omisa ipyo. 4 Omisaka siisaale, ipyo sikina saahimorela mukerekhere mwa estaraata, nto axipalame* yaahirwa, akhuura.* 5 Ipyo sikina saahimorela vamalukuni, vaari etthaya vakhaani. Ipyo iyo saahimela voohipisa, okhala wira etthaya yaari vakhaani. 6 Masi, nuumala woopa nsuwa, ipyo iyo saahipahiwa, sinyaala, maana khisaarina mitathaari. 7 Ipyo sikina saahimorela vamiiwani. Nto miiwa iyo saahivuvurya sinakhoottiherya ipyo iyo wunnuwa. 8 Ipyo sikina-tho, saahimorela etthaya yooreera ni saahipacerya wiima mihokorokho. Ekina yaimale mihokorokho 100 ovikana ele yaaliwe, ekina 60, nave-tho ekina 30. 9 Ole oniphavela wiiwa, iiweke”.

10 Awiixutti awe yaahimwaattamela, anamukoha wira: “Xeeni munilavula anyu ni atthu ala ni malikanyiho?” 11 Vano aahiwaakhula oriki: “Nyuwo muheemereriwa wiiwexexa isiiri sa Muluku sinihimya Omwene wa wiirimu, masi awo khiyeemereriwe”. 12 Veekeekhai, ole orina, onimuncereriwa ni onookhalana soowaatta. Vano ole ohirina, hata ele erina awe, onimwaakhiwa. 13 Tivo kinilavula aka ni malikanyiho, okhala wira hata yoonaka, anoona mahala, hata yiiwaka, aniiwa mahala, nnakhala khaniiwexexa etthu ene. 14 Nto awo annimaleliha eprofesia ya Yesaya, eni: ‘Nyuwo munimwiiwa oratteene, masi khamunrowa osuwela; munooweha oratteene, masi khamunrowa woona. 15 Mirima sa atthu ala soowaleya. Awo anniiwa, masi khanitthara, nave anniwala maitho aya ni maaru aya wira ahooneke nnakhala ahiiweke. Nave-tho, murima aya khoniiwexexa etthu, hata khaniwerya okitthikela wira kaapenuxe’.

16 “Masi, oohakalala ti nyuwo, maana munnoona ni wiiwa itthu iya. 17 Kinooleelani ekeekhai wira: Maprofeta manceene ni anaxariya anceene, yaaniphavela woona itthu iya munoona anyu, masi khiyoonale. Nave yaaniphavela wiiwa itthu muniiwa anyu, masi khiyiiwale.

18 “Vano, nwiriyane saana nlikanyiho na mulipa-oomisa. 19 Epyo yaamorenle mukerekhere mwa estaraata, tuule oniiwa masu a Omwene, masi ohiniiwexexa. Vano onnoorwa Mutakhali, onaphela epyo yaaliwe vamurimani vawe. 20 Epyo yaamorenle vamalukuni, tuule oniiwa masu awo, onaakhela voohipisa, otteeliwe ene murima. 21 Hata ohirina mitathaari, onnikhala okathi vakhaani. Masi, sakhumelela mixankiho aahiiso olupatthiwa mwaha wa masu a Omwene, onnitthikela ottuli. 22 Epyo yaamorenle vamiiwani, tuule oniiwa masu a Omwene, masi mwaha wa ophavelexa itthu sa olumwenku* ola ni woototha wa mihakhu, onnivuvurya masu awo, nto ahiniima mihokorokho. 23 Epyo yaamorenle etthaya yooreera, tuule oniiwa masu a Omwene, onasuwela etthu ene. Nave onniima mihokorokho 100 ovikana ele yaaliwe, mukina 60, nave-tho mukina 30”.

24 Yesu aahaaleela atthu nlikanyiho nikina, iiraka: “Omwene wa wiirimu pooti olikanyihiwaka ni mulopwana mmosa aalale epyo yooreera mmatta mwawe. 25 Vano, atthu otheene arupaka, nwanani awe aahirwa, aahaala nthakathaka mmatta mwaaliwe etiriku, khurowa. 26 Okathi etiriku yaathapulunwe aya ni wiima mihokorokho, nave-tho naahikhumelela nthakathaka. 27 Nto arumeyi a mwaneene ematta, yaahirowa omukoha pwiya aya, ariki: ‘Pwiya, khimwanle epyo yooreera mmatta mwanyu? Nto, nthakathaka nle ninkhuma vai?’ 28 Owo aahiwaakhula wira: ‘Ookhala nwanani aka iirale eyo’. Vano arumeyi yaahimukoha ariki: ‘Munniphavela wira nrowe naphele nthakathaka nlo?’ 29 Nto aahiwaakhula wira: ‘Nnaari, maana kinoova wira okathi onrowa anyu ophelaka nthakathaka, munoophela etiriku. 30 Muhiye sinnuweke vamosa mpakha okathi woohepha. Okathi owo, kinimwaahimeerya alipa-oohepha, wira: Mpacerye ophela nthakathaka, mutthukwe mavisi, mpahe. Nto etiriku muthukumanye ni muhele empa enisukiwa yoolya.’”*

31 Yesu aahaaleela nlikanyiho nikina, iiraka: “Omwene wa wiirimu onlikana ni enuku yaamukhaanixa,* mulopwana mmosa aalale awe mmatta mwawe. 32 Enuku eyo ti yaamukhaanixa ovikana inuku sotheene, masi yannuwa vale, ennikhala mwiri muulupale. Vano axipalame* annoorwa anateka ipuru mmirittani mwaya”.

33 Nave aahaaleela nlikanyiho nikina, iiraka: “Omwene wa wiirimu onlikana ni eferemento, yeeyo muthiyana aatakaahale awe ni miphimo miraru sa otthu.* Vano otthu owo wotheene waahipuhuwa”.

34 Itthu iya sotheene Yesu aanaaleela atthu ni malikanyiho. Tthiri, khiivo yaaleela awe voohikhala ni malikanyiho, 35 wira yiiraneye ele yaahimmwale ni profeta, oriki: “Kinrowa olavulaka ni malikanyiho. Kinrowa olaleya itthu siipithihiwe, okhuma woopaceryani”.*

36 Nuumala olaxerya mittitthi iye, Yesu aahikela mpaani. Awiixutti awe yaahimwaattamela, enanvekela wira: “Munitthokiherye nlikanyiho na nthakathaka na mmatta”. 37 Owo aahiwaakhula wira: “Mulipa-oowaala epyo yooreera, ti Mwaana a mutthu. 38 Ematta, ti olumwenku. Nto epyo yooreera, anamwane a Omwene, masi nthakathaka, anamwane a Mutakhali. 39 Nwanani aalale nthakathaka, ti Diabo. Okathi woohepha, onithoonyerya okathi onaattamela aya omala wa olumwenku.* Nave, alipa-oohepa, malaikha. 40 Tivonto, siisaale nthakathaka ninthukumanyiwa aya nnapahiwa, siiso-tho onimwiiraneya wookiseryani wa olumwenku.* 41 Mwaana a mutthu onooruma malaikha awe wira yaakumihe Moomweneni mwawe, otheene ale anaatthekiha akhwaaya, ni ale anipaka itthu sootakhala, 42 wira yaarihele opuro onipatta mooro.* Weiwo tanrowa aya wunla ni olumanyiha maino aya. 43 Okathi owo, anaxariya anrowa waarya vanceene ntoko nsuwa, Moomweneni mwa Tiithi aya. Ole oniphavela wiiwa, iiweke.

44 “Omwene wa wiirimu onlikana ni muhakhu ovithiwe mmatta, yoowo mulopwana mmosa ophwannye awe, ovitha. Vano, otteeliwe ene murima, onnirowa otumiha itthu sotheene sirina awe, onathuma ematta eyo.

45 “Nave-tho, Omwene wa wiirimu onlikana ni mulipa a nakoso oneetteetta ophavelaka ipeerola* sootepa oreera. 46 Nuumala ophwanya epeerola* emosa erina efaita yuulupale, aahirowa otumiha voohipisa itthu sotheene aarina awe, onathuma nluku nle.

47 “Omwene wa wiirimu, onlikana-tho ni ntthavi naariheliwe mphareya, khuvara ihopa sa khula muthinto. 48 Nuumala osareya ihopa, atothi yaahipurulela ntthavi ota, akilaathi ni anathanla ihopa sooreera, anahela muttankani.* Nto iye soohiloka, yaahirihela ottaiwene. 49 Ti siiso sinrowa aya wiiraneya wookiseryani wa olumwenku.* Malaikha anrowa waavalaanya atakhali ni anaxariya, 50 wira yaarihele atakhali opuro onipatta mooro.* Weiwo tanrowa aya wunla ni olumanyiha maino aya.

51 “Niireke muhiiwexexa itthu iya sotheene?” Awo yaahimwaakhula wira: “Aayo”. 52 Vano Yesu aahaaleela wira: “Nto ole ori mwiixuttihi, yoowo iixuttihiwe oratteene Omwene wa wiirimu, onlikana ni mwaneene etthoko, onikumiha opuro onisuka awe muhakhu awe, itthu sooreera sa niinano ni sa khalai”.

53 Nuumala ohimya malikanyiho ala, Yesu aahikhuma opuro ole. 54 Okathi aaphiyale awe muttetthe awe, aahipacerya owiixuttiha atthu musinagoga* mwaya, nto awo yaahitikinihiwa anahimya wira: “Mulopwana ola ophwannye vai osuwela nno ni miteko iya sootikiniha? 55 Niireke ola khahiyo mwaana a kalapinteero? Amamawe khahiyo aMaria, nave axihima awe khahiyo Yakobo ni Yosefe ni Simoni ni Yuda? 56 Ankhi axirokora awe, khanikhala otheene aya eriyari ahu? Nto, omphwanya vai itthu iya sotheene?” 57 Tivonto, awo khiyaamukupanli.* Vano Yesu aahaaleela wira: “Khaavo profeta onittittimihiwa muttetthe awe ni vatthokoni vawe”. 58 Siiso, Yesu khaavanre miteko sootikiniha sinceene, mwaha wa ohaamini waya.