1 Pedru
2 Tivo, muhiye owoka, wootha, nrima, waapa ni sootakhala sotheene. 2 Ntoko anamwane ayariwe niinaano aniphavela aya vanceene waamwa nipele, siiso-tho, nyuwo mphaveleke vanceene nuulumo na Muluku wira munnuwe ni moopowe. Nuulumo na Muluku ninlikana ni eleeti ya nipele.* 3 Nyuwo moosuwela saana wira Apwiya tooreera murima.
4 Nwaattamele Apwiya awo, ari nluku nikumi, nenno nikhoottiwe ni atthu, masi nithanliwe ni Muluku, maana nookhalana efaita yuulupale. 5 Ntoko maluku makumi, nyuwo mwa empa etekiwe orumeeliwaka munepa wa Muluku. Nave mookhalihiwa anamukuttho oowaarya, wira nvaheke mikuttho sinivarihana ni munepa wa Muluku ni sinimusivela yoowo mwaha wa Yesu Kristu. 6 Yoolepa enihimya wira: “Nkawehani! Koothanla nluku noowaarya wira kipwehe oSiyoni, nlo nluku nuulupale na alisenso.* Ole onaamini nluku nenlo, khonrowa othanana”.
7 Tivonto, okhala wira munnaamini, owo ookhalana efaita yuulupale wa nyuwo. Masi wa atthu ahinaamini, Soolempwa sinihimya wira: “Nluku alipa-ooteka empa yaakhontte aya, nookhalihiwa nluku nuulupale na alisenso”.* 8 Nlo ti “nluku nnaakwattuliha atthu, ni mwala onaatthekiha atthu”. Atthu awo annikwattuliwa, okhala wira khaniiwelela nuulumo na Muluku. Tthiri eyo ti emalelo ya atthu awo. 9 Masi nyuwo ti “nloko noothanliwa, anamukuttho anrumeela ntoko mamwene, nloko na atthu oowaarya, nloko na atthu a Muluku. Nyuwo moothanliwa wira mulaleye sootikiniha sa Muluku”, yoowo owiihanneni mweepiphini mwaari anyu, wira mukele moowaaryani mwawe mooreerexa. 10 Khalai, nyuwo khahiyo mwaari atthu a Muluku, masi vano mwa atthu awe. Khimwaamoreliwe ikharari, masi vano, moomoreliwa ikharari.
11 Anna oophentiwa, nyuwo mwa aletto ni anamurwa vathi-va. Tivo, kinootumereryani wira mukhootteke soophavela soohiloka sa erutthu, seiyo sinivirikanya makhalelo anyu ooreera. 12 Mweettelo anyu okhaleke wooreera eriyari ya atthu a vathi-va, wira yaawootheryakani okhala atakhali, aweheke miteko sanyu sooreera, ni anvuwiheke Muluku nihiku onrowa awe waaphukela atthu.
13 Mwaha wa Apwiya, mwiiweleleke voohinlaseya okhulupale* wotheene okumiheriwe ni apinaatamu. Nave, mmwiiweleleke mwene, mwaha wookhala mukhulupale, 14 aahiiso, makuvernatoro, yaawo akhalihiwe ni mwene wira yaavaheke ehukhumu atakhali, masi yaattottopeleke ale anipaka itthu sooreera. 15 Tthiri, Muluku oniphavela wira niireke sooreera wira niwale iyano sa alolo, yaawo anilavula itthu ahinsuwela aya. 16 Mweetteke ntoko atthu ootaphuwa, masi muhirumeeleke otaphuwa iwo wira mukhuneele* sootakhala sanyu. Ohiya-vo, mweetteke ntoko arumeyi a Muluku. 17 Mwaattittimiheke atthu otheene; mwaaphenteke anna a olumwenku wotheene; mmooveke Muluku; mmuttittimiheke mwene.
18 Nyuwo anamuteko, nwiiwelekeke mapatarau anyu muhinlaseyaka. Nwooveke vookhalela, ohiya paahi ale ooreera murima ni anaathokorerya atthu, masi-tho ale oovila waahakalaliha. 19 Muluku onnisiveliwa ni mutthu oniimananiha okhalana murima* wooloka ohoolo wa Muluku, onivilela mixankiho* ni onihaawa hata ohitthenke. 20 Muniphwanya-ni ovilela omaniwa, mwaha wa sootakhala siirale anyu? Masi, mwaavilelaka ohaawa mwaha woopaka itthu sooreera, eyo etthu enimusivela Muluku.
21 Tthiri, nyuwo muhiihaneliwa ohaawa iwo, okhala wira Kristu nave oohaawa mwaha wa nyuwo, ni siiso, ohoohiyeryani ntakiheryo wira mutthareke vakhiviru vene mavalo awe. 22 Owo khonapake etampi, nave khonaphwanyaniwe wootha mwaano mwawe. 23 Okathi aaruwaniwa awe,* owo khaaruwana.* Okathi aahaaxiwa awe, khanla ikuhu, masi aamuroromela Muluku oniphuka mwa xariya. 24 Owo aahikuxa itampi sahu mweerutthuni mwawe vamwirini,* wira nikhwele itampi, masi nikhalane okumi mwaha wa exariya. Nave “mwaha wa makhwatta awe, nyuwo moopenuxiwa”. 25 Tthiri, nyuwo mwaari ntoko ipwittipwitthi saarimenle, nto vano, mootthikela wa makampusi anyu ni mutokweene onikhapelela ikumi sanyu.