Samuweli Oopacerya
2 Vano, Ana aahivekela ohimyaka so:
“Murima aka onnihakalala mwaha wa Yehova;
Ikuru saka sinnincerereya* mwaha wa Yehova.
Kinniwaakhula awanani aka ni olipa murima,
Kinnitteeliwa murima mwaha wa woopola wanyu.
2 Khuuvo ori oowaarya onlikana ni nyuwo, Yehova;
Khuuvo mukinaku onlikana ni nyuwo,
Muluku ahu, nyuwo paahi muri oolipa ntoko mwala.
3 Muhiye olavula moowiittottopa;
Mwaano mwanyu ahikhume moolumo oowiisoona,
Okhala wira Yehova, Muluku oosuwela.
Owo onnitokosa oratteene miteko sootheene.
4 Owo onnintakasa nreetthe* na atthu oowerya,
Masi onnaalipiha ale ootteettheya.
5 Ale yaalimalenle ovona, ahaana ovara muteko wira aphwanye ephaawu,
Masi ale yaavoliwa etala, khanivoliwa-tho.
Muthiyana ahaayara, ohaayara anamwane 7.
Masi ole aarina anamwane anceene, oohala mekhawe.
6 Yehova onniwerya opwetexa okumi ni onniwerya osuka okumi;
Owo onniwerya omuroiha mutthu Mmahiye* ni onniwerya omuhihimuxa.
7 Yehova onnimwiiriha mutthu okhala oohaawa ni onniwerya omuthaaciriha;
Owo onniwerya omuyeviha mutthu, ni onniwerya omunnuwiha.
8 Owo onninvenxa vantthupini masikhini;
Owo onninvenxa mulipa-oohaawa vattuurwani,*
Wira aakilaathihe eriyari ya makhulupale,
Aavahaka opuro woottittimiheya.
Yehova tori mwaneene alisenso* a elapo,
Owo toniiriha etthaya oruwerya mulaponi.
9 Owo onneettiha mavalo a atthu oororomeleya,
Masi atakhali annipweteya mweepiphini.
Tthiri mutthu khonwerya oxintta orumeelaka ikuru sawe.
10 Yehova onimwaapwetexa awanani awe;
Wiirimu onkhala awe onimwaakumiherya okukutteya.
Yehova onoophukela elapo yootheene,
Ononvaha owerya mwene awe,
Nave onimuncererya ikuru* sa ole omuthanlale awe”.
11 Nto, Elikana aahirowa owannyawe oRama, masi mwaana ole aaninvarela muteko Yehova, eettihiwaka ni namukuttho Eli.
12 Vano, anamwane a Eli, yaari ootakhala murima. Awo khiyaamuttittimiha Yehova. 13 Ohiya okuxa epantte ya mukuttho yaavahiwa aya ni atthu, etthu yaapaka aya tiila: Okathi mutthu aavaha awe mukuttho, namakhaliherya a namukuttho aanirwa okunxe ene ekarfu yuulupale, yaarina maino mararu. Nto okathi yaapeiwa aya enama, 14 aanihoma mmwaapuni, munikhalakoni, mpanelani,* wala munikapuni. Enama yootheene yaakumihiwa ni ekarfu, yaakhala ya namukuttho. Eyo ti etthu yaawiirela aya aisarayeli ootheene yaarowa oSilo. 15 Nave-tho, okathi mutthu aavaha awe mukuttho, ohinatthi opaha ekortuura, namakhaliherya a namukuttho, aanirwa, onamuhimeerya wira: “Munvahe namukuttho enama wira ooxe. Owo khoniphavela enama yoowaapeiwa, oniphavela ekithi paahi”. 16 Okathi mutthu owo aamwaakhula awe wira: “Muhiye toko epahiwe ekortuura, nuumala-vo munookuxa ele eniphavela anyu”, namakhaliherya a namukuttho aanihimya wira: “Nnaari, mukivahe niinaano-va. Mwaahiire siiso, kinookuxa ni ikuru!” 17 Siiso, yoottheka ya anamakhaliherya khiyaareere wunnuwa vamaithoni va Yehova, okhala wira alopwana awo khiyaattittimiha itthu aavahiwa awe Yehova.
18 Vano Samuweli aaninvarela muteko Yehova, owanre ene eefodi* ya eliinyu, nnaamwi aari mmiravo mwaamukhaani. 19 Ohiya-vo, khula mwaakha, maama awe aanimuttotthela nlaya naamukhaani noohikhalana miyoono, onamuroihela okathi aarowa awe ni iyawe ovaha mukuttho wa vamwaakhani. 20 Eli aahimureeliha Elikana ni mwaarawe onahimya wira: “Yehova oovaheeni mwaana mukina ni amwaarinyu ala, nipuro na mwaana onvanhe anyu Yehova”. Nuuumala-vo, yaahitthikela owaani. 21 Yehova aahimuupuwela Ana. Nto Ana aahirupala. Nave aahaayara anamwane araru axilopwana ni anamwane anli axithiyana. Mmiravo Samuweli aaninnuwa vamaithoni va Yehova.
22 Eli khaareere wuuluvala, nave aaniiwa itthu sootheene anaawe axilopwana yaawiirela aya atthu ootheene a Isarayeli. Aahiiwa-tho wira anaawe awo, yaanirupa ni axithiyana yaavara muteko vamukhora wa etenta* ya muthukumano. 23 Owo aanaaleela anaawe wira: “Xeeni munithipelela anyu opaka itthu iya? Itthu kiniwiiwa aka atthu ootheene yoohimyakani nyuwo, ti sootakhala. 24 Nnaari, anaaka, itthu kiniiwa aka eriyari ya atthu a Yehova, khasilonke. 25 Akhala mutthu onimutthekela mukhwaawe, mutthu mukina onoowerya onvekela Yehova wira omukhaliherye. Masi akhala wira mutthu owo onoomutthekela Yehova, taani oniwerya onvekelela?” Vano, anamwane awo yaahikhootta onwiriyana paapa aya, okhala wira Yehova aahaalamula okhwa. 26 Nto, mmiravo Samuweli aaninnuwa mweerutthuni, ni aanimusiveliha Yehova, vamosa ni atthu.
27 Mulopwana a Muluku aahirowa wa Eli, onamuhimeerya wira: “Enihimya awe Yehova tiila: ‘Kiireke miyo kaahikhootta wiixooniherya etthoko ya tiithi anyu okathi yaari aya wExiitu ntoko ipottha vatthokoni wa Farawo? 28 Owo aahithanliwa eriyari ya mahimo ootheene a Isarayeli wira okirumeeleke ntoko namukuttho, oweleke valtari vaka wira ovaheke mikuttho, opaheke erupani ni onwareke eefodi* ohoolo waka. Nave kihaavaha atthu a etthoko ya amuhavinre anyu soovaha sootheene sinipahiwa vaikho ni aisarayeli.* 29 Xeeni muhinttittimiha anyu mikuttho ni soovaha saka, kirumme aka wira sihaana ovahiwa opuro kinikhala aka? Xeeni munaattittimiha anyu aniinyu okivikana miyo? Nyuwo munnoolya epantte yooreerexa ya soovaha kiniruuheliwa aka ni atthu aka, aisarayeli.
30 “‘Tivo, enihimya awe Yehova, Muluku a Isarayeli, tiila: “Tthiri, miyo kaahihimya wira etthoko anyu ni etthoko ya amuhavinre anyu yaarowa okhalaka ohoolo waka”. Masi vano Yehova onihimya wira: “Eyo kheniiraneya, okhala wira kinrowa waattittimihaka ale ankittittimiha, masi ale ahinkittittimiha khanrowa ottittimihiwaka”. 31 Moone! Anoophiya mahiku kinrowa aka omaliha owerya wanyu ni owerya wa atthu a etthoko ya tiithi anyu, wira ohikhale nnakhala mutthu a etthoko anyu onrowa wuuluvala. 32 Vano eriyari ya itthu sootheene sooreera kiwiirenle aka atthu a Isarayeli, munimwaaweha awanani anyu akhalaka opuro onkhala aka, nave khuuvo onrowa wuuluvala etthoko anyu. 33 Mutthu mmosa a osuulu anyu kihinrowa aka omuhiiha okivarela muteko valtaari vaka, onimwiiriha maitho anyu ohoona, nave onimooriipihani murima. Masi atthu anceene a etthoko anyu, animwiiviwa ni espaata.* 34 Ele enrowa owiiraneela aniinyu anli axilopwana, Hoofini ni Pineha, enrowa okhala esinaale anyu: Oowanli aya anrowa okhwa nihiku nimosa-ru. 35 Nuumala-vo, kinimwiithanlela namukuttho oororomeleya. Owo onrowa opakaka ele eniphavela murima aka. Nave kinoomutekela empa enrowa okhalaka mahiku ootheene, nave-tho okathi wootheene onrowa weettaka ohoolo wa ole kimuthanlale aka. 36 Mutthu onrowa ohala a etthoko anyu onimoorwa, ni onimuurama ohoolo wawe ovekelaka muteko wira oliviwe musurukhu ni ephaawu. Owo onoohimya wira: “Xontte, mukivahe muteko wa onamukuttho, wira kiphwanyeke ephaawu”’”.