Yohani
17 Yesu omalihaka-ru ohimya itthu iya, aahiweha wiirimu, khwiira: “Tiithi, ewoora yoophiya. Munvuwihe mwaninyu, wira mwaninyu owo oovuwiheni nyuwo, 2 siisaale munvanhe anyu owerya wowaaruma atthu* otheene, wira aavahe okumi woohimala otheene ale munvanhe anyu. 3 Wira awo aphwanye okumi woohimala, ahaana woosuwelani oratteene nyuwo, Muluku mmosa-ru eekeekhai, ni omusuwela Yesu Kristu, yoowo omurumme anyu. 4 Miyo kihoovuwihani elapo ela ya vathi, ni koomaliha muteko waakirumme anyu ovara. 5 Vano, Tiithi, mukivuwihe vakhiviru vanyu ni ovuwa waarina aka ni nyuwo, olumwenku ohinatthi opattuxiwa.
6 “Kihaasuweliha nsina nanyu atthu mukivanhe anyu vathi-va. Awo yaari awinyu, nyuwo khukivaha, nave awo anneettela* moolumo anyu. 7 Vano aasuwela wira itthu sotheene mukivanhe anyu, sinikhuma wa nyuwo. 8 Awo aasuwela eyo okhala wira kihaahimeerya itthu sikilenle anyu. Nave anneemererya wira tthiri miyo kikhumme wa nyuwo ni annikupali wira ti nyuwo mukirumme. 9 Miyo kinnaavekelela awo. Nkinaavekelela atthu a moolumwenkuni, masi kinaavekelela ale mukivanhe anyu, maana awo tawinyu. 10 Itthu sotheene siri sawaka ti sawinyu, nave sawinyu ti sawaka. Siiso, miyo koovuwihiwa eriyari aya.
11 “Miyo kinookhuma moolumwenkuni-mu, masi awo ari moolumwenkuni-mu, nave miyo kinnoorwa weiwo muri anyu. Tiithi Oowaarya, xontte mwaakhapelele mwaha wa nsina nanyu, nenno mukivanhe anyu, wira awo akhale oowiiraana, siisaale hiyo niri ahu oowiiraana. 12 Okathi kaari aka naawo, miyo kaanaakhapelela mwaha wa nsina nanyu, nenlo mukivanhe anyu. Miyo kihaakhapelela, nto khuuvo opwetexiwe, nnakhala mmosa, ohikhanle paahi ole onrowa opwetexiwa, wira yiiraneye ele elempwale. 13 Vano, miyo kinnoorwa weiwo muri anyu. Kinilavula itthu iya nlelo kiri ene moolumwenkuni, wira awo atteeliwe murima vanceene ntoko miyo. 14 Miyo kihaaleela moolumo anyu, masi olumwenku ola onnaanyokha, okhala wira awo khaniirela mpantta olumwenku, siisaale miyo kihiniirela aka mpantta olumwenku.
15 “Nkinoovekelani wira mwaakumihe moolumwenkuni-mu, masi wira mwaakhapeleleke mwaha wa Satana. 16 Awo khaniirela mpantta olumwenku, siisaale miyo kihiniirela aka mpantta olumwenku. 17 Murumeele nuulumo nanyu wira mwaakhalihe oowaarya, maana nuulumo nanyu ti neekeekhai. 18 Siisaale mukirumme anyu moolumwenkuni, miyo-tho kihaaruma moolumwenkuni. 19 Miyo kinnikhala oowaarya mwaha wa yaawo, wira nave-tho awo akhalihiwe oowaarya ni ekeekhai.
20 “Nkinaavekelela yaala paahi, masi kinnaavekelela-tho otheene ale anrowa okaamini, nuumala wiiwa ele atthu ala aniixuttiha aya, 21 wira otheene aya akhale oowiiraana, siisaale nyuwo Tiithi, muri anyu oowiiraana ni miyo, nave-tho miyo kiri aka oowiiraana ni nyuwo. Vano, awo animwiiraana ni hiyo, wira olumwenku okupali wira ti nyuwo mukirumme. 22 Miyo kihaavaha ovuwa mukivanhe anyu, wira awo akhale amosa-ru, ntoko hiyo niri ahu mmosa-ru. 23 Miyo naawo niri oowiiraana. Nyuwo ni miyo niri oowiiraana, wira awo akhale oowiiraana voomalela. Siiso, olumwenku ola onoosuwela wira ti nyuwo mukirumme, nave onoosuwela wira siisaale mukiphentale anyu, nyuwo-tho muhaaphenta atthu awo. 24 Tiithi, kiniphavela wira ale mukivanhe anyu akhale ni miyo opuro kinrowa aka okhala, wira yoone ovuwa mukivanhe anyu, maana nyuwo mookiphenta olumwenku ohinatthi opattuxiwa. 25 Tiithi a xariya, tthiri olumwenku khonoosuwelani, masi miyo kinnoosuwelani. Nave-tho, atthu ala aasuwela wira ti nyuwo mukirumme. 26 Miyo kihaasuweliha nsina nanyu, nave kinootepa waasuweliha, wira ophenta onikiphentana anyu okhale ni yaawo, nave-tho miyo kikhale oowiiraana naawo”.