1 Pedru
1 Miyo Pedru, murummwa a Yesu Kristu, kinoolepelani nyuwo oothanliwa, mmwarenle ntoko anamurwa, mittetthe sa oPonto, oGalasia, oKapadosia, wAsia ni oBitinia. 2 Muluku, Tiithi ihu a wiirimu, ohoothanlani moovarihana ni etthu aalakenle awe khalai ene. Ohooreerihani ni munepa awe woowaarya. Owo oopaka eyo wira mmwiiweleleke ni wira ooreeriheni mwaha wa ephome ya Yesu Kristu.
Murettele ni oreera murima wuulupale wa Muluku, sikhale ni nyuwo voowaatta.
3 Ottottopeliwe Muluku, Tiithi a Pwiya ahu Yesu Kristu, okhala wira oowiirihani oyariwa vasya mwaha wa omoriwa wawe ikharari wuulupale, wira mukhalane nlipelelo mwaha wa Yesu Kristu, yoowo ohihimuxiwe mwa alipa-ookhwa, 4 wira mwaakhele yoohiyeriwa ehinintta, ehinihononeya ni ehinimala. Yoohiyeriwa eyo, musukeriwe wiirimu, 5 nyuwo munikhapeleliwa ni Muluku, orumeelaka owerya wawe mwaha wa waamini wanyu. Owo onookhapelelani wira owoopoleni mahiku ookiserya. 6 Mwaha wa itthu iyo, nyuwo munnitteeliwa murima vanceene, nnaamwi mweehereriwaka mwa okathi vakhaani ni itthu soovirikana, masi woonasa wene, muhaana weehereriwa, 7 wira waamini wanyu weehereriwaka, owiiriheni ottottopeliwa, ovuwihiwa ni ottittimihiwa, okathi Yesu Kristu onrwa awe. Waamini wanyu iwo, wookhalana efaita yuulupale ovikana eweero, yeeyo enihononeya, nnaamwi ereerihiwe ene ni mooro. 8 Nyuwo munnimphenta Kristu, nnaamwi muhitonko omoona. Munnooniherya omwaamini, nlelo muhimoonaka. Nto munnitteeliwa murima vanceene, mwa enamuna ehiniweryaneya otthokiherya, 9 maana munnisuwela wira waamini wanyu onoowiirihani woopoliwa.
10 Woopoliwa iwo, waahihimmwa ni maprofeta yaalavunle sa oreera murima wuulupale wa Muluku, mooniheriwe anyu. Awo yaahitokosa aphavelaka vanceene osuwela woopoliwa iwo. 11 Maprofeta awo, yaanitokosa saana yeettihiwaka ni munepa woowaarya, wira asuwele okathi ene saarowa aya omwiiraneela Kristu itthu seiyo saahimmwale vahinatthi. Munepa owo waahooniherya vahinatthi, moota Kristu aarowa awe ohaawa ni moota aarowa awe ovuwihiwa. 12 Muluku aahaasuweliha maprofeta wira khahiyo yairumeela mmansaya, masi yoorumeelani nyuwo. Maprofeta awo aalepa itthu muleeliwe anyu, nto nyuwo muhiiwa itthu iyo ni ale yoolalenryeni ihapari sooreera, akhaliheriwaka ni munepa woowaarya, yoowo waakhumme wiirimu. Malaikha anniphavela vanceene osuwela saana itthu iyo.
13 Mulokiherye muupuwelo anyu wira nvare muteko. Mpakeke itthu sotheene mwa miruku. Mulipeleleke oreera murima wuulupale wa Muluku, onrowa wooniheriwa okathi Yesu Kristu onrwa awe. 14 Ntoko anamwane oowiiwelela, muheetteleke-tho makhalelo anyu ootakhala, mweettela anyu khalai, okathi mwahaamusuwela anyu Muluku. 15 Ohiya-vo, mweettelo anyu wotheene okhaleke woowaarya, okhala wira Muluku owiihanneni, toowaarya. 16 Tthiri, voolempwa wira: “Mukhaleke oowaarya, okhala wira miyo koowaarya”.
17 Okhala wira munninvekela itthu Tiithi, yoowo oniphuka ohimuthanlaka mutthu ni onittharihela miteko sa khula mmosa, mweetteke mmoovaka, okathi muri anyu ntoko anamurwa vathi-va. 18 Nyuwo moosuwela esisapo moopolaniwe anyu, mwaha wa makhalelo anyu oohiloka, yaawo muravihiwe anyu ni amuhavinre anyu. Khamoopoliwe ni itthu sinipweteya, ntoko eweero aahiiso eparatha. 19 Ohiya-vo, moopoliwe ni ephome ya Kristu, erina efaita yuulupale, ntoko ephome ya mwaapwittipwitthi ooloka ni oohirakala. 20 Kristu yoowo othanliwe ni Muluku, olumwenku ohinatthi opattuxiwa,* vano ohooniheriwa mwaha wa nyuwo mahiku ala ookiserya. 21 Mwaha wa Yesu, nyuwo munnimukupali Muluku, yoowo omuhihimunxe Yesu mwa alipa-ookhwa, khunvuwiha, wira mmwaaminiki ni mmulipeleleke Muluku.
22 Vano nyuwo muhiireeriha mwiiwelelaka ekeekhai, wira mwaaphenteke axinninyu voohoothererya; tivo, mphentaneke vanceene ni murima wotheene. 23 Nyuwo mooyariwa vasya ni epyo* ehinintta, ohiya ni epyo enintta. Tthiri, muyariwe ni nuulumo na Muluku mukumi ni ohinimala. 24 Veekeekhai, “atthu otheene anlikana ni malaxi; ovuwa waya wotheene onlikana ni ithutu. Malaxi annuuma, ithutu sinnimora, 25 masi moolumo a Yehova, annikhala mahiku otheene”. “Moolumo” ala, ti ihapari sooreera mulaleeriwe anyu.