Matheyo

12 Okathi ole, Yesu aahivira imatta sa etiriku esaabadu. Awiixutti awe yaahivoliwa etala, nto enapacerya ovurula makala a etiriku, enakhuura. 2 Nuumala afarisi oweha eyo, yaahimuhimeerya Yesu wira: “Mooneke! Awiixutti anyu anipaka etthu enikhoottihiwa ni nlamulo ovara esaabadu”. 3 Yesu aahiwaakhula wira: “Khamusomme ele Davidi ni atthu aarina awe, yaapanke aya okathi yaavoliwe aya etala? 4 Owo aahikela mpaani mwa Muluku vamosa ni alopwana aarina awe, yaahikhuura iphaawu saavahiwa Muluku. Awo khiyeemereriwa okhuura iphaawu iyo, maana anamukuttho paahi ti yeemereriwa. 5 Aahiiso, khamusomme ele Nlamulo* nnihimya aya? Esaabadu, anamukuttho annivara muteko mutemplo, masi khaniphwanya mulattu. 6 Vano, kinooleelani wira ole ori-va, ookhalana efaita yuulupale ovikana etemplo. 7 Masi, mwaasuwenle ele enitaphulela aya moolumo ala ani: ‘Kiniphavela wira atthu yaamoreleke ikharari akhwaaya, ohiya okivaha mukuttho’, khimwaarowa waaphukela ale ahitthenke. 8 Tthiri, Mwaana a mutthu tori Mwaneene esaabadu”.

9 Akhumaka-ru nipuro nle, Yesu aahikela musinagoga* mwaya. 10 Memmo aahikhala mulopwana mmosa aarakanle ntata. Atthu akina, aphavelaka omukumiherya mulattu Yesu, yaahimukoha wira: “Niireke vanneemereriwa ompenuxa mutthu esaabadu?” 11 Yesu aahiwaakhula wira: “Akhala wira mmosa a nyuwo ookhalana epwittipwitthi emosa, nto epwittipwitthi eyo khimorela mulittini esaabadu, niireke khuuvo a nyuwo onrowa okumiha mulittini-mmo? 12 Mweekeekhai, mutthu ookhalana efaita yuulupale ovikana epwittipwitthi! Tivo, vanneemereriwa opaka etthu yooloka esaabadu”. 13 Vano Yesu aahimuhimeerya mulopwana ole wira: “Mookole ntata nanyu”. Nto, owo aahookola, ntata nawe naahikhala saana, nnalikana ni ntata nikina. 14 Masi afarisi yaahikhuma, anakohana moota yaarowa aya omwiiva. 15 Yesu vaasuwenle awe etthu ela, aahikhuma opuro ole. Nave, atthu anceene yaahimutthara, ni aahaapenuxa otheene ale yaawereiwa. 16 Masi, aanaalopola oratteene wira ehimulaleye, 17 ophavelaka omaliherya moolumo a Muluku yaahimmwale khalai ene ni profeta Yesaya. Muluku aahimmye so:

18 “Mmoone murumeyi aka omuthanlale aka, onimphenta aka ni onikitteeliha murima vanceene! Kinonvaha munepa aka,* nave onimwaasuweliha atthu a maloko otheene exariya yeekeekhai. 19 Owo khonrowa onyakulihana, nnakhala okhuwela, nave nsu nawe khaninrowa wiiwanyeya iphiro suulupale. 20 Owo khonrowa omala-maliha* mutathi woowunteya, khonrowa ottipiha ntthampo nintthuwa mwiixi, mpakha olokiherya itthu sotheene soohiloka. 21 Tthiri, atthu a mulaponi anookhalana nlipelelo mwaha wa nsina nawe”.

22 Yesu aahiruuheliwa mulopwana mmosa aavariwe ni nlaikha nootakhala, yoowo ahoona ni ahaalavula. Nto Yesu aahimpenuxa. Nuumala-vo, mulopwana ole ahaalavula, vano aaniwerya olavula ni woona. 23 Nto mittitthi iye sa atthu saahitikinihiwa sinahimya so: “Niireke ola khahiyo toko Mwaana a Davidi?” 24 Nuumala wiiwa eyo, afarisi yaahimmye wira: “Ola onoomola malaikha ootakhala okhaliheriwaka ni Satana,* namalamulela a malaikha ootakhala”. 25 Osuwelaka itthu yuupuwela aya, Yesu aawaakhunle wira: “Omwene onikawanyeya yoowo-ru, onoohononeya. Nave epooma aahiiso etthoko enikawanyeya yeeyo-ru, enoohononeya. 26 Siiso-tho, akhala wira Satana onnimoomola Satana, owo onniikawanya mmansawe. Vano, omwene awe onrowa okhala sai? 27 Nto miyo koomolaka malaikha ootakhala kikhaliheriwaka ni Satana,* ankhi atthu anyu, anoomola ni owerya wawani? Ti maana aya, atthu anyu anrowa aya woophukelani. 28 Masi akhala wira kinoomola malaikha ootakhala kikhaliheriwaka ni munepa wa Muluku, eyo enitaphulela wira, Omwene wa Muluku woophiya, nyuwo muhisuwela. 29 Aahiiso, ti pani onikela mpaani mwa mulopwana ootupa, khiyamwaakha mireerelo sawe, ohipacenrye omutthukwa mulopwana owo ootupa? Amutthukwa vale, toniwerya awe omwiiyerya mireerelo sawe. 30 Ole ohikhanle ni miyo, onnikivirikanya, nave ole ohinthukumanya ni miyo, onnimwarya-mwarya.

31 “Tivo, kinooleelani wira: Khula etampi ni moolumo ooveeha sinooleveleliwa, masi ale aniveeha munepa wa Muluku, khanleveleliwa. 32 Mwa ntakiheryo, ole oninveeha Mwaana a mutthu, onooleveleliwa. Masi ole oniveeha munepa woowaarya,* khonleveleliwa, nnakhala olumwenku ola* aahiiso onirwa.

33 “Mwaphatteya mwiri wooloka, mihokorokho saya sinooloka, nave mwaphatteya mwiri woohiloka, mihokorokho saya khasinloka. Tthiri, mwiri onisuwanyeya ni mihokorokho saya. 34 Nyuwo nloko na ivili, muniwerya sai olavula itthu sooreera, muri ene atthu ootakhala murima? Mweekeekhai, eyano enilavula itthu sisareyale vamurimani. 35 Mutthu ooreera murima, onnilavula itthu sooreera, okhala wira vamurimani vawe, siri itthu sooreera. Masi mutthu ootakhala murima, onnilavula itthu sootakhala, okhala wira vamurimani vawe, siri itthu sootakhala. 36 Kinooleelani wira, Nihiku Noophukela, atthu anookohiwa mwaha wa moolumo otheene oohiloka alavunle aya. 37 Veekeekhai, mwaha wa moolumo anyu, munoohimmwa okhala naxariya, ni mwaha wa moolumo anyu, munoolamuliwa”.

38 Nto, alipa-oowiixuttiha Nlamulo ni afarisi, yaahihimya wira: “Mwiixuttihi, munooniherye ethoonyeryo emosa”. 39 Yesu aahiwaakhula oriki: “Nyuwo atthu* ootakhala ni oohiroromeleya! Nyuwo munnithipelela ophavela ethoonyeryo, masi khamunrowa ovahiwa ethoonyeryo ekina, ehikhanle ethoonyeryo ya profeta Yona. 40 Sisaale Yona aakhanle awe mmirimani mwa ehopa yuulupale mahiku mararu, othana ni ohiyu, siiso-tho, Mwaana a mutthu onookhala mmahiye mahiku mararu, othana ni ohiyu. 41 Nihiku Noophukela, atthu a oNiinive anoohihimuwa vamosa ni atthu a okathi ola wira yaalamule, okhala wira yaahirukunuxa mirima saya, nuumala omwiiwa Yona olaleeryaka. Masi, moone wira vaava ookhala mutthu orina efaita yuulupale onvikana Yona. 42 Nihiku Noophukela, pwiyamwene a osuuli,* onoohihimuxiwa vamosa ni atthu a okathi ola wira aalamule, okhala wira aahikhuma ottaiwene, arowaka owiriyana miruku sa Salomoni. Masi, moone wira vaava ookhala mutthu orina efaita yuulupale onvikana Salomoni.

43 “Nlaikha nootakhala namukhuma mutthu, ninneettakasa moothakoni, niphavelaka nipuro noomumula, masi nihinaphwanya. 44 Nuumala-vo, ninnihimya so: ‘Kinootthikela empa aka, ekhumale aka’. Niphiyaka-ru, ninniphwanya empa eyo ehikhaliwaka, eveliwe ene ni ereerihiwe ene oratteene. 45 Vano, ninnirowela malaikha makina 7, ootepa otakhala ovikana nlo. Annikela empa eyo, enakhala memmo. Siiso, makhalelo masya a mutthu ole annitepa onanara ovikana a khalai. Ti yeeyo enrowa waakhumelela atthu ootakhala a okathi ola”.

46 Okathi Yesu aalavula awe ni mittitthi iye, amamawe ni axihima awe, yaahirwa yeemela vate, anaphavela olavulana. 47 Nto mutthu mmosa aahimuhimeerya wira: “Amaminyu ni axihima anyu, ari vate vale, aniphavela olavula ni nyuwo”. 48 Yesu aahimwaakhula mutthu ole, oriki: “Ti pani ari amaama ni axihima aka?” 49 Nto awookolelaka ntata awiixutti awe, aahiira: “Amamaka ni axihima aka, taala! 50 Tthiri, ole onipaka etthu oniphavela awe Tiithi aka ori wiirimu, yoowo tokhanle munnaka, murokoraka ni maama aka”.