aFilipi
3 Tivonto, annaka, mutteeliweke murima mwa Apwiya. Miyo nkinoona onyoonya woolepelani itthu simosa-ru, kiirelaka mureerelo anyu.
2 Mwiipasoopeke ni ale anlikana ni alapwa, mwiipasoopeke ni ale aniira sootakhala, mwiipasoopeke ni ale aniphavela wira munnuwihiwe.* 3 Tthiri alipa-oowinnuwihiwa mweekeekhai ti hiyo, maana ninnimukokhorela Muluku neettihiwaka ni munepa awe. Hiyo ninniittottopa mwaha wa ele Kristu Yesu opanke awe ni khaninroromela itthu sa apinaatamu; 4 nnaamwi miyo kirina ene mathowa oororomela itthu iyo.
Akhala mutthu onuupuwela wira ookhalana mathowa oororomela itthu sa apinaatamu, miyo kootepa okhalana oowaatta: 5 miyo kinnuwihiwe nihiku na neethanu neeraru, ka nloko na Isarayeli, nihimo na Beniyamini, ka muheeberi ni anamuyari aka yaari aheeberi; ka nfarisi, moovarihana ni nlamulo; 6 kaanikhalela nthiti olupattha muloko, kaanittharihela oratteene ele nlamulo naahimya aya okhala exariya. 7 Masi itthu sotheene kaavaha aka efaita, vano nkinoona okhala etthu,* mwaha wa Kristu. 8 Ohiya-vo, kinnithokorerya itthu sotheene okhala ethiru, mwaha wa efaita erina aya omusuwela Kristu Yesu, Pwiya aka. Mwaha wa yoowo, kooleva itthu sotheene ni kinnithokorerya itthu sotheene okhala ikokhola, wira kimphwanye Kristu, 9 ni kooniwe okhala mutthu onimutthara. Masi nkinihimmwa okhala naxariya mwaha wootthara Nlamulo, ohiya-vo, kinihimmwa okhala naxariya mwaha woomwaamini Kristu. Tthiri Muluku onniwoona ale animwaamini Kristu okhala anaxariya. 10 Kinniphavela omusuwela yena ni osuwela ikuru sa ohihimuwa wawe. Kinniphavela-tho ohaawa vamosa nuuwo, kiivahereryaka wira kikhwe ntoko owo, 11 wira vaweryaneya, kiwerye ophwanya ohihimuwa woopacerya.
12 Khahiyo wira kirimwaakhela etthuvo ene, nave khahiyo wira koophwanya omalela, masi kinniimananiha wira kiphwanye etthuvo eyo, maana koosuwela wira ti etthu Kristu Yesu okithanlenle awe. 13 Annaka, miyo nkinoona wira koophwanya itthu iyo, masi etthu enisuwela aka tiila: Kinniliyala itthu sihanle ottuli ni kinniimananiha wira kiphwanye itthu siri ohoolo. 14 Nave kinniimananiha wira kiphwanye etthuvo ya wiirimu, Muluku onikiihanela awe mwa Kristu Yesu. 15 Tivonto, hiyo nrina waamini woolipa, nikhalaneke muupuwelo ni moonelo owo. Vakhala wira nyuwo murina muupuwelo mukina, Muluku onoowooniheryani moonelo wooloka. 16 Masi, hata nironwe ene vahoolo, nitepeke weetta ephiro emosa-ru.
17 Annaka, moowiiraana mukitakiheke miyo, nave mwaatakiheke atthu yaale aneetta moovarihana ni ntakiheryo nivahale ahu. 18 Aakhala atthu anceene anthanya okhwa wa Kristu vamwirini wa nihaaxeryo.* Kaanaaromola atthu awo ikwaha sinceene, kiira? Vano kinnaaromola atthu awo kinlaka. 19 Emalelo aya anrowa opwetexiwa, muluku aya ti erukulu aya, anniivuwiha ni itthu saya soowuuliha muru, nave anuupuwelela itthu sa vathi-va. 20 Masi elapo ahu eri wiirimu, nto ninnimulipelela ni murima wotheene moopoli onikhuma wuuwu, Pwiya Yesu Kristu. 21 Owo onrowa orumeela owerya wuulupale aakhenle awe wira eettiheke itthu sotheene, ni onrowa otatuxa erutthu ahu yootteettheya wira elikaneke* ni erutthu awe yoovuwa.