Luka
20 Nihiku nimosa, Yesu owiixuttihaka atthu mutemplo, ni olaleyaka ihapari sooreera, makhulupale a anamukuttho ni alipa-oowiixuttiha Nlamulo ni makhulupale a ayuda, yaahirwa, 2 anamukoha, yiiraka: “Munileele, niireke muheemereriwa opaka itthu iya? Murummwale naani?” 3 Yesu aahiwaakhula wira: “Ni miyo-tho kinimookohani etthu emosa. Mukileele: 4 Opatiso wa Yohani, waakhumme wa Muluku* aahiiso wa atthu?”* 5 Awo yaahipacerya ovaanela yaawo-ru ariki: “Naakhula wira, ‘Wa Muluku’,* owo onoonikoha wira: ‘Nto xeeni muhalaka ohimwaamini Yohani?’ 6 Masi naakhula wira, ‘Wa atthu’, atthu otheene anoonivonyakasa maluku, maana annimoona Yohani okhala profeta”. 7 Tivonto, yaahimwaakhula Yesu ehimyaka wira khiyaasuwela waakhuma aya. 8 Nto Yesu aahaaleela wira: “Ni miyo-tho nkinooleelani ole okivanhe owerya wira kipake itthu iya”.
9 Yesu aahipacerya waaleela atthu nlikanyiho nla, oriki: “Mulopwana mmosa aahikhalana ematta awe ya ewuuva. Nuumala-vo, aahaahiyerya alimi, khurowa elapo ekina. Nto aahikhala weiwo okathi munceene. 10 Waaphiyale aya okathi woohepha, mwaneene ematta aahimuruma murumeyi awe orowa okumana ni alimi ale, wira anvahererye epantta ya mihokorokho sawe. Vano, alimi ale yaahimmana murumeyi owo, emoomola matata-ru. 11 Masi owo aahimuruma-tho murumeyi awe mukina. Alimi awo, yaahimmana, anveeha ni amoomola matata-ru. 12 Nto aahimuruma a neeraru. Nave alimi awo yaahinvulaliha, khumoomola. 13 Nuumala-vo, mwaneene ematta ya ewuuva, aahihimya wira: ‘Kipake exeeni? Kinrowa omuruma mwanaka mwaamulopwana, onimphentexa aka. Kinoona wira awo anoomuttittimiha’. 14 Okathi alimi ale yanwehale aya mwaana owo, yaahihimeeryana wira: ‘Ola tonrowa ohalana ematta ela. Nrowe nimwiive, nto itthu sotheene sinookhala sawihu’. 15 Nto awo yaahimpurulela ota wa ematta ya ewuuva, khumwiiva. Vano mwaneene ematta onrowa opaka exeeni? 16 Owo onimoorwa owiive alimi ale, nto ematta ele aavahe atthu akina”.
Okathi yaiwale aya nlikanyiho nle, atthu yaahihimya wira: “Etthu eyo ehiiraneye siiso!” 17 Nto Yesu aahaawehexexa atthu, onaakoha iiraka: “Vano, enitaphulela exeeni yoolepa enihimya wira: ‘Nluku alipa-ooteka empa yaakhontte aya, nookhalihiwa nluku nuulupale na alisenso’?* 18 Nave, mutthu onimorela nluku nla, onimuntakaseya. Ole onrowa omoreliwa ni nluku nla, onoonyakattiwa”.
19 Ewoora ene yeeyo, alipa-oowiixuttiha Nlamulo ni makhulupale a anamukuttho, yaaniphavela onvara Yesu. Masi yaaniwoova atthu, okhala wira yaahisuwela wira Yesu aahilavula nlikanyiho nla aahimyaka yaawo. 20 Awo yaaniphavela okathi wooreerela wira anvare Yesu. Tivo, yaahaaliva alopwana akina wira yoothereryeke okhala anaxariya, aphavelaka onvara Yesu ni moolumo awe. Nuumala-vo, anvahererye mukhulupale a kuvernu. 21 Vano awo yaahimukoha wira: “Mwiixuttihi, noosuwela wira munilavula ni muniixuttiha ekeekhai, ni khamunimuthanla mutthu, masi muniixuttiha ekeekhai ya Muluku: 22 Niireke vannireerela hiyo omuliva mpoosito Seesari wala nnaari?” 23 Masi osuwelaka olavilavi aya, Yesu aahaahimeerya wira: 24 “Mukooniherye etenaario.* Elatarato ela ni nsina munoona anyu-va, ti yawani?” Awo yaahaakhula wira: “Ti ya Seesari”. 25 Yesu aahaahimeerya wira: “Weeso, munvaheke Seesari ekhanle ya Seesari, nave munvaheke Muluku ekhanle ya Muluku”. 26 Siiso, khiyaawenrye onvara ni moolumo aalavunle awe ohoolo wa atthu. Vano yaahimaala, okhala wira waakhula wawe waahaatikiniha vanceene.
27 Masi, asaduki akina, yaawo anihimya wira alipa-ookhwa khanihihimuxiwa, yaahimwaattamela Yesu, anamukoha yiiraka: 28 “Mwiixuttihi, Moise oolepa wira: ‘Akhala wira mulopwana ookhalana mwaarawe, masi mulopwana owo khukhwa ohiyaranne mwaana, munnawe ohaana omuthela naamukhweli owo, wira omuyarele anamwane ole okhwiiye’. 29 Nto yaahikhala axinna 7. Ole oopacerya aahimuthela mwaarawe, masi mulopwana owo aahikhwa ohiyaranne mwaana. 30 Vano a nenli 31 ni a neeraru yaahimuthela naamukhweli owo. Alopwana ale 7 yaahimuthela. Awo yaahikhwa ahiyaranne anamwane. 32 Wookiseryani waya, muthiyana ole aahikhwa. 33 Vano-nto, okathi anrowa aya ohihimuxiwa alipa-ookhwa, tuuvi onrowa omukuxa muthiyana owo? Maana alopwana ale 7, yaahimuthela”.
34 Yesu aahaahimeerya wira: “Atthu a olumwenku ola,* annithela ni annitheliwa, 35 masi ale aniphwanela okela olumwenku onirwa ni ohihimuxiwa mookhwaani, khanthela nnakhala khantheliwa. 36 Tthiri, awo khanikhwa-tho, maana ari ntoko malaikha. Nave okhala wira anrowa ohihimuxiwa, awo anrowa okhala anamwane a Muluku. 37 Vano wira alipa-ookhwa annihihimuxiwa, hata Moise ohooniherya muliivuruni olavulaka mwaha wa mwiri waapatta mooro, okathi aamuhimya awe Yehova okhala ‘Muluku a Abrahamu, Muluku a Isaakhi ni Muluku a Yakobe’. 38 Owo khahiyo Muluku aalipa-ookhwa, masi Muluku a atthu akumi, okhala wira onniwoona otheene okhala akumi”. 39 Alipa-oowiixuttiha Nlamulo akina yaahihimya wira: “Mwiixuttihi, moolavula saana”. 40 Tthiri, khuuvo-tho aawenrye ominyala wira omukohe etthu.
41 Yesu aahaakoha wira: “Atthu aniwerya sai ohimya wira Kristu ti mwaana a Davidi? 42 Tthiri, Davidi onnihimya eliivuru ya Isaalimo wira: ‘Yehova oomuleela Pwiya aka wira: “Mukilaathi moono aka woolopwana, 43 mpakha miyo waapweha awanani inyu vathi va inawu sanyu”’. 44 Davidi onimuhimya Kristu okhala Pwiya. Nto, vaniweryaneya sai okhala mwanawe?”
45 Nlelo atthu otheene anwiriyanaka, Yesu aahaahimeerya awiixutti awe wira: 46 “Mwiikasoope ni alipa-oowiixuttiha Nlamulo. Awo waasivela weetta awanre ene malaya oorakama ni okhomasiwa ni nttittimiho mapuro oowaatta atthu.* Nave waasivela okilaathi mapuro oohoolo* musinagoga,* ni mapuro oosuwanyeya ofestani. 47 Awo anniiya mireerelo sa anaamukhweli, nave annipaka mavekelo oorakama wira yooniwe ni atthu. Ophukeliwa waya onrowa okhala wuulupalexa”.