aRoma
9 Ntoko mutthu onimutthara Kristu, miyo kinilavula ekeekhai, nkinootha. Murima* aka, yoowo oneettihiwa ni munepa woowaarya, onnooniherya wira eyo ekeekhai: 2 Murima aka wookiriipa vanceene ni onnitepa okiwereya. 3 Kinneemererya ovahiwa ehukhumu yaarowa ovahiwa axinnaka, ayuda, yaawo ahinimutthara Kristu, akhala wira eyo yaamwaakhaliherya. 4 Awo ti aisarayeli, nave aathanliwa wira ekhale anamwane a Muluku. Owo oowooniherya ovuwa wawe ni ohaavaha mavarihano a Nlamulo, ni ohaaleiherya itthu ni ohaavaha eparakha wira amurumeeleke. 5 Awo akhumme nloko na amuhavinre ahu. Nave-tho Kristu okhumme nloko nenlo. Ottottopeliwe Muluku, yoowo onaalamulela atthu otheene ni itthu sotheene. Amen.
6 Vano, khahiyo wira itthu Muluku aaleihenrye awe siroohiiraneya. Mweekeekhai, khahiyo wira ale ankhuma nloko na Isarayeli, otheene aya ta nloko na “Isarayeli” tthiri. 7 Khahiyo wira otheene aya anamwane eekeekhai a Abrahamu mwaha wookhala osuulu* awe. Muluku aahimuhimeerya Abrahamu wira: “Ole onrowa ohimmwa okhala osuulu* anyu, onrowa okhuma nloko na Isaakhi”. 8 Eyo khenitaphulela wira anamwane otheene a Abrahamu tari anamwane eekeekhai a Muluku. Masi ale ayariwe mwaha wa natiri, tari anamwane eekeekhai a Abrahamu. 9 Muluku aaleihenrye wira: “Mwaakha owo, okathi ene yoola, kinimoorwa, nave Sara onrowa wiiraka omuyanre ene mwaana mwaamulopwana”. 10 Yaahiiraneya etthu emosa-ru, okathi Rebeka aamuyarenle awe maphapo muhavinre ahu Isaakhi. 11 Ahinatthi oyariwa anamwane awo, nnakhala ahinre etthu yooreera aahiiso yootakhala, Muluku aahimuhimya khalai ene, ole aarowa awe omuthanla. Muluku onimuthanla ole onimphavela awe, ohiya mwaha wa miteko sa mutthu. 12 Muluku aahimuleela Rebeka wira: “Ole muulupale, onoomurumeela ole mwaamukhaani”. 13 Ntoko valempwale aya wira: “Komphenta Yakobe, masi koomunyokha Esawu”.
14 Nto ninrowa ohimya exeeni? Niireke Muluku khorina exariya? Nnaari, khahiyo siiso! 15 Muluku aahimuleela Moise wira: “Kinrowa ommorela ikharari ole oniphavela aka ommorela ikharari, ni kinoomoonela othunku ole oniphavela aka omoonela othunku”. 16 Tivo, eyo khenlipa ni ophavela aahiiso wiimananiha wa mutthu, masi enlipa ni omoriwa ikharari wa Muluku. 17 Yoolepa ennimuhimya Farawo wira: “Kihoohiyani mukhalaka mukumi mwaha wa etthu ela: wira kooniherye owerya waka mwaha wa nyuwo, ni wira nsina naka nilaleiwe elapo yotheene ya vathi”. 18 Siiso, Muluku onnimmorela ikharari khula mutthu onimphavela awe, masi onnimuhiya ole oniphavela wiixinnuwiha, wira iixinnuwiheke.
19 Tivo, nyuwo munookikoha wira: “Khuuvo oniwerya ovirikanya ele Muluku olakenle awe, nto xeeni nlelo onaavaha awe nthowa apinaatamu?” 20 Nyuwo mwa pani wira mwaakhulaneke ni Muluku? Niireke etthu yoowuupiwa enoowerya omuhimeerya mulipa-oowuupa wira: “Xeeni muhalaka okuupa siisa?” 21 Khamunsuwela wira mulipa-oowuupa, ookhalana owerya woorumeela oloko mmosa-ru wira opake mwaapu onirumeeliwa nihiku nuulupale, ni mwaapu onirumeeliwa khula nihiku? 22 Etthu emosa-ru, enniiraneya ni Muluku. Owo onniphavela waaviruwela atthu ootakhala ni osuweliha owerya wawe. Masi onnaapixerya murima ale amwiirinhe onanariwa,* yaawo aniphwanela opwetexiwa. 23 Muluku oopaka eyo wira owooniherye ovuwa wawe wuulupale ale yaarowa waakhela omoriwa wawe ikharari. Nave ohaalokiherya wira avuwihiwe. 24 Ti yoohi Muluku oniihanne awe, ohiya paahi eriyari ya ayuda, masi-tho eriyari ya ale ahikhanle ayuda. 25 Eyo enniiraneya ntoko Muluku aahimmye awe khalai muliivuruni mwa Hoseya, oriki: “Miyo kinrowa owiirelaka ‘atthu aka’, ale ahikhanle atthu aka. Nave ale kahaaphenta aka, kinrowa owiirelaka ‘oophentiwa’. 26 Nto opuro waahimmwa aya wira ‘nyuwo khamuhiyo atthu aka’, anrowa ohimmwaka okhala ‘anamwane a Muluku mukumi’”.
27 Eyo ti etthu Yesaya onikhuwela awe aahimyaka aisarayeli wira: “Nnaamwi aisarayeli ari ene anceene ntoko mihaava sa mphareya, atthu vakhaani paahi tanrowa woopowa. 28 Tthiri Yehova onrowa ophukela elapo, nave owo onimwaakuviha olamuliwa waya”. 29 Nave-tho, Yesaya aahihimya vahinatthi wiiraneya, oriki: “Vahaakhanle wira Yehova a anakhotto oonihiyerya osuulu,* naarowa okhalaka ntoko oSodoma, ni naarowa olikanaka ni oGomora”.
30 Nto ninrowa ohimya exeeni? Atthu awo a maloko makina yaahooniherya waamini ni yaahithokoreriwa okhala anaxariya, hata yaheettela exariya. 31 Nave, nnaamwi aisarayeli yeettela nlamulo na xariya, awo khiyaavarexenxe nlamulo nlo. 32 Mwaha wa xeeni? Mwaha woowi awo yaaneererya opaka eyo ni miteko, ohiya ni waamini. Awo yaahikwattula “nluku ninkwattuliha”. 33 Ti siiso sinihimya aya Soolempwa wira: “Nkawehani! Koopweha oSiyoni nluku nnaakwattuliha atthu, ni mwala onaatthekiha atthu, masi ole onaamini nluku nenlo, khonrowa othanana”.