aKalaasia
6 Axinnaka, akhala wira mutthu onnirowa ephiro yootakhala, hata ohisuwelaka, nyuwo muneettihiwa ni munepa wa Muluku, mmuttikiherye ephiro yooreera. Masi muhaana opaka eyo mmureerelaka murima. Nave mwiipasoopeke wira nyuwo-tho muhimorele vantaphani. 2 Mukhaliheryaneke ni itthu sinooxankihani,* mwiira siiso, munimwiiwelela nlamulo na Kristu. 3 Akhala mutthu onoona wira ookhalana efaita masi ohikhanle etthu, mutthu owo onimwiiwoka. 4 Masi khula mutthu ovareryeke miteko sawe. Siiso, onootteeliwa murima mwaha wa miteko sawe, ohiya mwaha wowiilikanyiha ni atthu akina. 5 Mweekeekhai, khula mutthu onrowa oteexa muritti awe.
6 Nave-tho, khula mutthu oniixuttihiwa nuulumo na Muluku, okawaneke mireerelo sawe sooreera ni ole onimwiixuttiha.
7 Muhiiwoke: Muluku khonithweelihiwa. Veekeekhai, ele mutthu enaala awe, ti yeeyo onrowa awe ohepha. 8 Ole onaala uupuwelaka soophavela sa erutthu awe yoottheka, onrowa ohepha opwetexiwa, weiwo onikumiheriwa ni erutthu awe yoottheka. Masi ole onaala eettihiwaka ni munepa wa Muluku, onrowa ohepha okumi woohimala, onikumiheriwa ni munepa wa Muluku. 9 Tivo, nihikhulumuwe ovara miteko sooreera, okhala wira naahikhulumuwe, ninrowa ohepha okathi othanliwe ni Muluku. 10 Siiso-tho, khula okathi ninwerya ahu okhaliheryana, naakhaliheryeke atthu otheene, vanceenexa axinnihu ni axirokorihu, arina ahu waamini omosa-ru.
11 Moone moota sinnuwale aya ileetera sa epaphelo yoolepenlyaakani ni ntata naka.
12 Ale aniphavela waasiveliha atthu, ti yaawo anookhanyereryani winnuwihiwa. Awo anipaka eyo paahi wira asyake olupatthiwa mwaha wa Kristu.* 13 Hata atthu yaale aninnuwihiwa, khaneettela Nlamulo, masi aniphavela wira nyuwo munnuwihiwe wira awo akhalane mathowa oowiittottopa, mwaha wa etthu yiirihiwe aya erutthu anyu. 14 Masi, miyo kihikhala-khale kiittottopaka, vahikhanle mwaha wa Pwiya ahu Yesu Kristu, yoowo okhwiiye vamwirini wa nihaaxeryo.* Mwaha wa okhwa wawe, miyo kinoona wira olumwenku ohiiviwa,* nave olumwenku onoona wira miyo kihiiviwa. 15 Winnuwihiwa aahiiso ohinnuwihiwa, khahiyo etthu. Etthu yuulupale, ti okhalihiwa mutthu musya ni Muluku. 16 Masi otheene ale anrowa otthara malakiheryo a mweettelo ola, eyo piiyo, aisarayeli a Muluku, akhalane murettele ni amoreliwe ikharari.
17 Okhuma olelo-va orowa ohoolo, ohikhale onrowa okixankiha, maana kookhalana mweerutthuni mwaka mirala sinooniherya wira ka epottha ya Yesu.
18 Axinnaka, oreera murima wuulupale wa Pwiya ahu Yesu Kristu, okhale ni nyuwo, mwaha wa mukhalelo wooreera munooniherya anyu. Amen.