Miteko

13 Muloko wa Antiyokiya, yaahikhala maprofeta ni alipa-oowiixuttiha. Masina aya taala: Baarnaba, Simeyoni, yoowo aihaniwa Nooriipe.* Akina yaari, Saulo, Lusio a oKirene, ni Manaye, yoowo aasomme vamosa ni mwene Herodi. 2 Okathi yaamukokhorela aya Yehova, ni yaatthukwa aya, munepa woowaarya waahaaleela wira: “Mukithanlele Baarnaba ni Saulo. Miyo kihaathanla wira avare muteko mmosa”. 3 Nuumala otthukwa ni ovekela, awo yaahimwiixaatherya matata Saulo ni Baarnaba, anaahiya arowaka.

4 Okathi yaarummwale aya ni munepa woowaarya, Saulo ni Baarnaba yaahirowa oSeleusia. Weiwo, yaahiwela ekalawa anarowa oKiipero. 5 Okathi yaaphiyale aya oSalamina, awo yaahipacerya olaleya nuulumo na Muluku musinagoga* mwa ayuda. Nave Yohani aari namakhaliherya aya.

6 Nuumala weetteetta esisiro yotheene, mpakha ophiya oPafo, awo yaahikumana mulopwana mmosa muyuda, aihaniwa Bariyesu. Mulopwana owo, aari namaxintta ni aari profeta oowootha. 7 Namaxintta owo, anvarela muteko kuvernatoro* Serxio Paulo. Kuvernatoro owo, aari mulopwana a ankhili. Nto Serxio Paulo aahimwiihana Baarnaba ni Saulo, okhala wira aaniphavela vanceene wiiwa moolumo a Muluku. 8 Masi Elima, namaxintta, aanaavirikanya arummwa, ophavelaka omuhapuxa kuvernatoro wira ohaamini. (Nsina noowi Elima, nintaphulela namaxintta). 9 Vano Saulo, yoowo-tho aihaniwa Paulo, osareiye ene munepa woowaarya, aahinwehexexa Elima oratteene, 10 onamuhimeerya wira: “Nyuwo mwa mulopwana oosareya wootha ni ootakhala. Nave mwa mwaana a Diabo, ni nwanani a itthu sotheene sooloka. Munrowa ohiya silini ohonona iphiro soowookololowa sa Yehova? 11 Mwiiwe! Yehova onimoohukhumuni, ni khamunrowa woonaka. Khamunrowa owehaka nsuwa mwa okathi vakhaani”. Niinaano-ru, itthu sotheene aaweha awe saakhala ntoko etthapwe ni epiphi. Vano aanimwaavya mutthu wira onvarele ntata, wira omweettiheke. 12 Okathi kuvernatoro oonale awe itthu iya, aahaamini, okhala wira aahitikinihiwa vanceene ni itthu sa Yehova aixuntte awe.

13 Paulo ni apatthani awe, yaahikhuma oPafo ni ekalawa, aphiya oPerxe, oPanfiilia. Masi Yohani aahaahiya, onatthikela oYerusalemu. 14 Nuumala-vo, yaahikhuma oPerxe anarowa wAntiyokiya wa oPisiidia. Nto yaahikela musinagoga,* nihiku na saabadu, akilaathi. 15 Nuumala osommwa Nlamulo ni iliivuru sa Maprofeta, makhulupale yaahoolela musinagoga,* yaahimuhimeerya Paulo ni Baarnaba wira: “Anna, mwaarina ene moolumo wira mwaalipihe atthu, mulavuleke”. 16 Siiso, Paulo aaheemela, aavaha esinaale ni ntata, onahimya wira:

“Nyuwo alopwana a Isarayeli, ni nyuwo akina munimoova Muluku, nwiriyane. 17 Muluku a atthu a Isarayeli, aahaathanla amuhavinre ahu. Nto, okathi yaari aya wExiitu, weiwo yaakhala aya ntoko aletto, owo aahaakhaliherya ni aahirumeela owerya wawe wira aakumihe opuro ole. 18 Etthu yoowiiraka iyaakha 40, owo aahaapixerya murima moothakoni. 19 Nuumala opwetexa maloko 7 a elapo ya oKanaani, aahaavaha amuhavinre ahu elapo eyo. 20 Itthu iyo sotheene siiraneyale etthu yoowiiraka iyaakha 450.

“Nuuvira okathi owo, aahaakumiherya alipa-oophuka wira aweettiheke mpakha okathi wa profeta Samuweli. 21 Nuumala-vo, yaahinvekela mwene. Nto Muluku aahaavaha Sawuli, mwaana a Kiixi, a nihimo na Beniyamini. Owo aahaalamulela mwa iyaakha 40. 22 Nuumala Muluku omwaakha Sawuli omwene, aahimuthanla Davidi wira okhale mwene aya. Muluku aahimuhimya Davidi owo, iiraka: ‘Komphwanya Davidi, mwaana a Yese, yoowo onihakalaliha murima aka. Owo onoopaka itthu sotheene siniphavela aka’. 23 Ntoko aaleihenrye awe, Muluku aahaavaha aisarayeli moopoli, Yesu, yoowo aari osuulu* wa mulopwana ole. 24 Ohinatthi orwa Yesu, Yohani aanaalaleerya atthu otheene a wIsarayeli, wira apatisiwe, yooniheryaka orukunuxa waya murima. 25 Okathi Yohani aamaliha awe muteko awe, aanihimya wira: ‘Nyuwo munuupuwela wira miyo ka pani? Miyo nkihiyo yoowo. Masi, onnoorwa ottuli waka, ole kihiniphwanela aka otaphula isantaalya sawe’.

26 “Nyuwo anna, ni atthu a nloko na Abrahamu, ni nyuwo akina munimoova Muluku, nwiriyane! Hiyo nihiiwa moota Muluku onnoopola awe. 27 Tthiri, atthu a oYerusalemu ni anamalamulela aya, yaahimukhootta moopoli owo. Masi okathi yamphukela aya, yaahimaliherya moolumo alempwale ni Maprofeta, yaawo anisommwa khula esaabadu, vowiiwanyeya. 28 Nnaamwi yahamphwanyanne mulattu wira amwiive, awo yaahinvekela Pilato wira omwiivihe Yesu. 29 Nuumala opaka itthu sotheene saalempwale simuhimyaka yoowo, yaahimukuruxa vamwirini, anvitha mmahiye. 30 Masi Muluku aahimuhihimuxa mookhwaani, 31 nave Yesu aahaakhumelela mahiku manceene awiixutti awe, yaale yaakhumme oGalileya nuuwo, arowaka oYerusalemu. Awo tanimukhalela onamoona ohoolo wa atthu.

32 “Siiso, hiyo ninnoolaleeryani ihapari sooreera sa natiri Muluku aamanenle awe amuhavinre ahu. 33 Muluku oomutaphula natiri owo voomalela, omuhihimuxaka Yesu, wira hiyo niri anaaya, niphwanye mureerelo. Tivo valempwale aya esaalimo ya nenli, wira: ‘Nyuwo mwa mwanaka. Olelo, miyo ka tiithi inyu’. 34 Muluku aahimuhihimuxa mookhwaani, nave khonrowa-tho okhwa, nnakhala erutthu awe khenrowa wuntta. Muluku oolipiherya wira eyo ekeekhai, ohimyaka wira: ‘Kinrowa owooniheryani ophenta woororomeleya kaamuleihenrye aka Davidi’. 35 Nave-tho, esaalimo ekina enihimya wira: ‘Nyuwo khamunrowa ohiya yinttaka erutthu ya murumeyi anyu oororomeleya’. 36 Masi, Davidi, aahipaka ele Muluku aaphavela awe ori ene mukumi, ni aahikhwa, khuvithiwa vamosa ni amuhavinre awe, ni erutthu awe yaahintta. 37 Vano, ole ohihimuxiwe ni Muluku, erutthu awe khiyinttale.

38 “Tivonto, axinnaka, musuweleke wira Muluku onrowa woolevelelani itampi sanyu, mwaha wa okhwa wa mulopwana ola. 39 Nlamulo na Moise khaniwenrye wookhalihani anaxariya, masi mwaha wa okhwa wa mulopwana ola, Muluku onimwaahimya atthu otheene anaamini, okhala anaxariya. 40 Siiso, mukhalane ephoole wira ele elempwale muliivuruni mwa Maprofeta, ehookhumeleleni. Eyo enihimya so: 41 ‘Nyuwo atthu oonyohola, nweheke muteko onivara aka okathi anyu ola. Nyuwo khamunrowa okupali muteko ola, hata mutthokiheriwaka saana. Masi munootikinihiwa vanceene ni munoolakaseya’”.

42 Vano, okathi Paulo ni Baarnaba yaakhuma aya musinagoga,* atthu yaahaaxonttela wira yalavule-tho myaha iye, esaabadu yaattharelana. 43 Okathi muthukumano musinagoga* waamanle aya, ayuda anceene ni ale yaakenle etiini ya ayuda, yaawo yaamukokhorela Muluku, yaahimutthara Paulo ni Baarnaba. Awosa yaahaatumererya atthu wira atepeke ottottela mureerelo oreera murima wuulupale wa Muluku.

44 Esaabadu yaattharelana, atthu otheene a epooma ele, waahiya atthu vakhaani paahi, yaahithukumana wira awiriyane moolumo a Yehova. 45 Okathi ayuda yoonale aya mittitthi sa atthu, yaahisareya nrima, anapacerya onveeha Muluku, avaanyihaka moolumo a Paulo. 46 Nto Paulo ni Baarnaba yaahaahimeerya ayuda ale, ahoovaka etthu, wira: “Vaanireerela opacerya woolaleeryani nyuwo moolumo a Muluku. Okhala wira munnikhootta ni muniixoona wira khamuniphwanela okumi woohimala, nto hiyo ninrowa waalaleerya ale ahikhanle ayuda. 47 Tthiri, Yehova ooniruma, oriki: ‘Miyo kihoothanlani wira mwaamwaleeleke atthu ahikhanle ayuda, ni wira mulaleye woopowa mpakha omalenle elapo’”.

48 Nuumala ale yahaakhanle ayuda wiiwa moolumo ala, yaahitteeliwa murima vanceene, anavuwiha nuulumo na Yehova. Siiso, otheene ale yaarina murima wooloka wira yaakhele okumi woohimala, yaahaamini. 49 Nave-tho, nuulumo na Yehova, naanimwareela mulaponi motheene. 50 Masi ayuda yaahaawoka* athiyana oottittimiheya, yaawo yaamoova Muluku, ni alopwana oottittimiheya a epooma ele, wira amulupatthe Paulo ni Baarnaba, ni yaahiwoomola mmuttettheni mwaya. 51 Siiso, Paulo ni Baarnaba yaahitatha ntthupi na inawu saya, ntoko ethoonyeryo yoowi atthu awo aalopoliwa. Nuumala-vo, yaahirowa wIkoonio. 52 Vano awiixutti yaamutepa otteeliwa murima, ni osareya munepa woowaarya.