Matheyo

24 Okathi Yesu aakhuma awe mutemplo, awiixutti awe yaahimwaattamela wira amooniherye etemplo. 2 Nto Yesu aahaahimeerya wira: “Kiira munnoona itthu iya sotheene? Vano kinooleelani ekeekhai wira, tthiri anoophiya mahiku nihinrowa aya ohala vale nluku nimosa vasulu va nluku nikhwaaya, nihimoroxeliwe vathi”.

3 Okathi Yesu aakilanthi awe vamwaako Olivera, awiixutti yaahimwaattamela wiiphiini, anamukoha wira: “Munileele: okathi xeeni sinrowa aya okhumelela itthu iya, nave tiivi eri ethoonyeryo ya otthika* wanyu ni omala wa olumwenku?”*

4 Yesu aahiwaakhula oriki: “Mwiikasoope wira ohikhale onoohapuxani, 5 okhala wira atthu anceene animoorwa arumeelaka nsina naka, ariki: ‘Kristu ti miyo’, ni animwaahapuxa atthu anceene. 6 Munrowa wiiwa silavuliwaka ikhotto mapuro oovirikana. Muhituthuwe, okhala wira itthu iya sihaana okhumelela, masi khahiyo ti omala wa olumwenku.

7 “Nloko ninrowa owana ni nloko nikina, elapo* ni elapo* ekina, nave-tho enoothowaka yoolya ni sinookhumelela itetere mapuro oovirikana. 8 Masi itthu iya sinooniherya wira iwo woopaceryani wa ohaawa.*

9 “Atthu animookumiheryani maxakha ni owiivani. Nave atthu a maloko otheene anrowa woonyokhani mwaha wa nsina naka. 10 Okathi owo, atthu anceene anoohiya omwaamini Muluku. Nave anrowa waavarihaka akhwaaya ni anrowa onyokhanaka. 11 Anookhumelela maprofeta manceene oowootha, yaawo anrowa waahapuxaka atthu anceene. 12 Mwaha wa wuncerereya otakhala, ophenta wa anamunceene onoovukuwa. 13 Masi, ole onivilela mpakha wookiseryani, tonrowa woopowa. 14 Nave-tho, ihapari iya sooreera sa Omwene sinoolaleiwa elapo yotheene, wira atthu otheene yiiwe.* Vano, olumwenku ola omaleke.

15 “Tivonto, mwaweha etthu yoonanara enihonona itthu, yeeyo yaahimmwale ni profeta Daniyeli, eri ene nipuro noowaarya, (ole onisoma, ohaana okhalana ankhili wira iiwexexe moolumo ala), 16 ale anikhala oYudeya, apaceryeke otthyawela omiyaakoni. 17 Ole ori vasulu va empa,* ohikhuruwele vathi wira okuxe mireerelo sawe. 18 Ole ori omatta, ohitthike wira okuxe nlaya nawe na ota. 19 Mahiku awo, anootakhaliwa athiyana oorupala ni ale animwaamwiha mwaana! 20 Muthipeleleke ovekela wira okathi munrowa anyu otthyawa ehikhale eyiita, nnakhala nihiku na saabadu.* 21 Tthiri okathi owo, anookhala maxakha maalupale, ahinakhumelele okhuma woopaceryani wa olumwenku mpakha vano, nnakhala ahinrowa-tho okhumelela. 22 Mweekeekhai, mahiku awo yahaavukuliwe, khuuvo aarowa woopowa. Masi mwaha wa atthu oothanliwa, mahiku awo anoovukuliwa.

23 “Akhala mutthu onooleelani wira: ‘Kristu ori va’, aahiiso ‘Iwe!’, muhikupali. 24 Anookhumelela akristu oowootha ni maprofeta oowootha, yaawo anrowa opaka miiriirya suulupale ni soovirikana, wira vaweryaneya, yaahapuxe hata ale oothanliwa. 25 Mwiiwe saana! Kihooleelani sihinatthi okhumelela. 26 Vano, atthu yooleelani wira: ‘Owo ori moothakoni!’, muhirowe, aahiiso, ‘Owo ori mpaani!’, muhikupali. 27 Veekeekhai, ntoko etari enipacerya aya onikhuma nsuwa, enaarya mpakha onikela nsuwa, siiso-tho, tonrowa aya wiiraneya otthika* wa Mwaana a mutthu. 28 Vari murutthu, vaavo tonithukumana aya amurumaasi.

29 “Amalaka-ru mahiku awo a maxakha, nsuwa nnoottipha, mweeri onoohiya waarya, nave itheneeri sinoomora wiirimu. Vano itthu siri wiirimu sinoottikinyiwa. 30 Nto ethoonyeryo ya Mwaana a mutthu enookhumelela wiirimu, nave atthu a mahimo otheene a vathi-va animwiikhupanyerya, ni anoomoona Mwaana a mutthu orwaaka mmeekuni wiirimu, ni owerya ni ovuwa wuulupale. 31 Ni oruma wuulupale wa nlope, owo onooruma malaikha awe wira yaathukumanye atthu aathanlale awe, anikhuma ipantta ixexe* sa olumwenku, okhuma woopaceryani wa erimu mpakha wookiseryani waya.

32 “Mwiixutte etthu ni nlikanyiho na mwiri wa ifiiku: Okathi iritta saya isya sinipacerya aya ophuwa, nto makukhu aya anakhumela ota, munnisuwela wira elimwe ehaattamela. 33 Siiso-tho, moonaka-ru sikhumelelaka itthu iya sotheene, musuweleke wira Mwaana a mutthu ori vakhiviru, vamukhora. 34 Kinooleelani ekeekhai wira atthu a mahiku ala, tthiri khanrowa omala, itthu iya sotheene sihikhumelenle. 35 Erimu ni elapo sinoomala, masi moolumo aka, khanimala nnakhala vakhaani.

36 “Vano, nihiku nene ni ewoora ene khuuvo onisuwela, nnakhala malaikha a wiirimu hata Mwaana a Muluku, masi Tiithi paahi tonisuwela. 37 Ntoko yaari aya mahiku a Nowe, siiso-tho, onimwiiraneya okathi onitthika* awe Mwaana a mutthu. 38 Tthiri, mahiku awo ehinatthi orupa epula ya mutaaseke, atthu yaanilya, yaaniwurya, alopwana yaanithela ni athiyana yaanitheliwa, mpakha nihiku Nowe aakenle awe mukalawani. 39 Awo khiyaacala etthu, mpakha ophiya epula ya mutaaseke, yaakhupa atthu otheene. Siiso, vanimwiiraneya okathi onitthika* awe Mwaana a mutthu. 40 Vano alopwana anli anookhala mmatta. Mmosa onookuxiwa, mukina onrowa ohiiwa. 41 Nave athiyana anli anrowa oxilaka vanxiloni. Mmosa onookuxiwa, mukina onrowa ohiiwa. 42 Tivonto, muthipeleleke owehaweha, okhala wira khamunsuwela nihiku ninrwa awe Pwiya anyu.

43 “Musuwele etthu ela: Mwaneene etthoko aasuwenle okathi wa ohiyu onrwa awe latarau, khaarupa; masi aamulipelela ni khaamuhiya latarau okelaka mpaani mwawe. 44 Tivonto, mukhaleke oolikana ene, okhala wira Mwaana a mutthu onimoorwa ewoora muhinuupuwela anyu.

45 “Ti pani tthiri ori murumeyi oororomeleya ni a ankhili,* yoowo othanliwe ni pwiya awe wira oweettiheke anamuteko awe a vatthokoni, aakawelaka yoolya okathi wooreerela? 46 Oohakalala ti murumeyi yoole oniira pwiya awe aarwaaka, onamphwanya ovaraka muteko! 47 Kinooleelani ekeekhai wira, pwiya owo onoomuthanla murumeyi owo wira eettiheke muhakhu awe wotheene.

48 “Masi vakhala wira murumeyi owo onookhala ootakhala, onahimya vamurimani vawe wira: ‘Pwiya aka onnipisa orwa’, 49 onapacerya waamanakasa arumeyi akhwaawe, ni onalya ni owurya vamosa ni anamuhapaliwa; 50 pwiya a murumeyi owo, onimoorwa nihiku ohinlipelela awe, ni ewoora ohinsuwela awe. 51 Nto onoomuhaaxa vanceene, onoomurihela opuro wa anawoothe. Weiwo tonrowa awe wunla ni olumanyiha maino awe.