aEefeso

5 Tivonto, mmutakiheke Muluku, ntoko anaawe oophentiwa, 2 nave muhihiye wooniherya ophenta, siisaale Kristu oniphentale awe,* khuleva okumi awe mwaha wa hiyo,* ntoko yoovaha ni mukuttho woowunkhela ohoolo wa Muluku.

3 Orupihana woohiloka* ni itthu soonanara sotheene aahiiso ohiphiyeriwa, sihiromoliweke eriyari anyu, nnakhala vakhaani, maana eyo khenaareerela arumeyi a Muluku; 4 hata mweettelo woowuuliha muru wala moolumo a elolo, aahiiso ooruwana, eyo piiyo, itthu soohikhalela; masi mulavuleke moolumo oomuxukhuru Muluku. 5 Tthiri, nyuwo moosuwela ni munnikupali wira atthu anrupihana voohiloka* aahiiso anivara itthu soohiirya,* khanrowa wiirela mpantta Omwene wa Kristu ni wa Muluku. Nnakhala ananrima, yaawo ari ntoko atthu anaakokhorela amuluku eethiru, khanaakhela Omwene owo.

6 Ohikhale mutthu oniwootothani ni moolumo eethiru, maana mwaha wa itthu iyo, Muluku onnaaviruwela ale ahinimwiiwelela. 7 Tivonto, muhiireke itthu siniira aya,* 8 okhala wira nyuwo mwaari ntoko epiphi, vano muri ntoko muthuko, mwaha wa okhala atthu a Apwiya. Mweetteke ntoko anamwane a muthuko, 9 maana okhala moovarihana ni muthuko, ontaphulela oreera murima mwa itthu sotheene, okhala a xariya ni weettela ekeekhai. 10 Okathi wotheene, mphaveleke osuwela oratteene itthu sinaasivela Apwiya; 11 muhiye ovara miteko sa epiphi, seiyo sihinkumiherya etthu, masi mooniherye wira ti sootakhala. 12 Mweekeekhai, itthu aniira aya weepiphini ti soowuuliha muru hata oromola. 13 Vano, itthu sotheene sinimwaleeliwa, sinnooneya oratteene, okhala wira itthu sotheene sinooneya, sinnikhala muthuko. 14 Tivonto, vanihimmwa aya wira: “Venyani, nyuwo munrupa, ni venyani mookhwaani. Nto, Kristu onimoomwaleelani”.

15 Nwehaweheke saana mweettelo anyu, wira muheetteke ntoko alolo masi ntoko atthu a miruku. 16 Murumeeleke oratteene okathi anyu,* okhala wira ninkhala mahiku ootakhala. 17 Nto, muhiye okhala atthu ahirina ankhili, masi mphaveleke osuwela ele Yehova oniphavela awe. 18 Nave-tho, muhihapaliweke,* okhala wira ohapaliwa onnimwiiriha mutthu opaka itthu sootepa otakhala, masi musareyeke munepa woowaarya. 19 Mulipihaneke mukina ni mukhwaawe mwiipaka isaalimo; munvuwiheke Muluku ni mmwiipeleke isipo sinimuttottopela; mmwiipeleke Yehova ntoko munirumiha muusika vamurimani vanyu. 20 Okathi wotheene mmuxukhureleke Muluku, Tiithi ihu, mwaha wa itthu sotheene mwa nsina na Pwiya ahu, Yesu Kristu.

21 Mwiiwelelaneke voohinlaseya, mmoovaka Kristu. 22 Muthiyana ootheliwa omwiiweleleke iyawe voohinlaseya, siisaale siniwiiwelela awe Apwiya, 23 okhala wira mulopwana oothela tori muru* wa mwaarawe, ntoko Kristu ori awe muru wa muloko, ni moopoli a erutthu ela. 24 Siisaale muloko onimwiiwelela aya Kristu voohinlaseya, muthiyana ootheliwa ohaana omwiiwelela iyawe mwa sotheene. 25 Nyuwo mulopwana oothela, muhihiye omphenta mwaarinyu, ntoko Kristu ophentale awe muloko, khuvaha okumi awe mwaha wa muloko owo. 26 Owo oopaka eyo wira otteelihe muloko, orapihaka ni nuulumo na Muluku, ntoko orapihiwa ni maasi, 27 wira muloko okhale woowaarya ni ohirina nlepa aahiiso mannyaari wala itthu ntoko iyo, masi waaryeke ni ohikhalane nthowa.

28 Siiso-tho, mulopwana oothela ohaana omphenta mwaarawe ntoko oniphenta awe erutthu awe. Mulopwana onimphenta mwaarawe, onniiphenta mmensawe. 29 Tthiri, khaavo mulopwana oninyokha erutthu awe, masi owo onnilyiha ni okhapelela, siisaale Kristu oniiriha awe muloko. 30 Veekeekhai, hiyo na ipantta sa erutthu awe. 31 “Soolempwa sinihimya wira: ‘Tivo, mulopwana onimwaahiya apapawe ni amamawe, wira okhaleke* ni mwaarawe, nto oowanli aya anrowa okhala erutthu emosa’”. 32 Esiiri ela ya Muluku, ti yuulupalexa. Vano, kinimuhimya Kristu ni muloko. 33 Masi, khula mmosa a nyuwo omphenteke mwaarawe ntoko siniiphenta awe; nave muthiyana ootheliwa ohaana omuttittimiha vanceene iyawe.