Mwaha 68
Aximiravo Anli Annitthikela Okhala Akumi
VAAKHANLEKE wira nyuwo mwaahikhwa, aarowa woonela sai maama anyu vaavo vaarowa anyu otthikela okhala mukumi? Owo aarowa okhala oohakalala vanceene! Masi vanniweryaneya mutthu okhwiiye okhala-tho mukumi? Yootoko wiiraneya khalai?
Munweheke mulopwana ola va, ni muthiyana ni mwammiravo owo. Mulopwana owo ti mprofeta Eliya. Muthiyana owo ti naamukhweli a muttetthe a oSarepta, nto mwammiravo owo mwanawe. Saana, nihiku nimosaa mwammiravo onniwereiwa. Owo onnitepelela mpakha wanikisa waya okhwa. Nto Eliya onimuleela muthiyana wira: ‘Mukinnye mwammiravo owo.’
Eliya onnimukuxa mwaana ookhwa onamuroiha mpaani mwa musuluu ni omwaatalela owo vakhaamani. Nto owo onnivekela oriki: ‘Oh Yehova, mmwiirihe mwammiravo ola otthikela okhala mukumi.’ Nto mwammiravo onnipacerya omumula! Okathi yoowo Eliya onnimuttikiherya vathii onahimya wa muthiyana wira: ‘Munweheke, mwaninyu ookhala mukumi!’ Nna ti nthowa naya maama awe ory’awe oohakalala vanceene.
Mprofeta mukina ootthuneya a Yehova nsina nawe ti Eliseyo. Owo onirumeela ntoko namakhaliherya a Eliya. Masi moovira wa okathi Yehova oninvarihela-tho muteko Eliseyo opaka miriira. Nihiku nimosaa Eliseyo onirowa muttetthe wa Xunemi, weiwo muthiyana mmosaa onimureerela awe murima vanceene. Vattuli vaya muthiyana ola onnimuyara mwaana mwaamulopwana.
Voosiisu omosaa, nuumala mwaana wunnuwa, owo onirowa okumana ni paapa awe yoowo onivara muteko mmatta. Mootutuxerya mwammiravo owo oninla oriki: ‘Muruu aka onookiwereya!’ Nuumala ottikiheriwa owaani, mwammiravo onnookhwa. Moota maama awe ory’awe ooriipiwa murima! Niinanoru ola onnirowa omwiitthana Eliseyo.
Vaavo Eliseyo vaniphiya awe, owo onirowa mukwaartu mwaari mwaana ookhwa. Owo onnivekela wa Yehova, nto aahimmaathela erutthu. Mowaakuveya erutthu ya mwammiravo yaahipacerya oviha, ni owo aahaaxamurya ikwaha thanuu na piili. Moota maama awe ory’awe oohakalala vaavo vaniphiya awe ni omphwanya mwanawe mukumi!
Atthu anceenexa okhuma khalai ahookhwa. Ela enniwiiriha amusi ni apatthani aya okhala ooriipiwa murima vanceene. Hiyo khinrina ikuruu sa waavenxa alipa-ookhwa. Masi Yehova onniwerya. Muhoolo ninrowa wiixutta moota owo sinrowa awe ottikiherya okumi wa imilyau sinceene sa atthu.
1 Mamwene 17:8-24; 2 Mamwene 4:8-37.