Mwaha 100

Yesu Mujardim

NUUMALA okhuma vasaala ya vasuluu, Yesu ni arummwa awe anirowa ojardim ya oJeseemani. Awo yaanirwa va khalai ikwaha sinceene. Yesu vano onaaleela awosa wira avikaniheke owehaweha ni ovekela. Nuumala vo onirowa voorakamela vakhaani, ni onuuramela vathii wira ovekele.

Valokenle ene Yesu onnitthikela iwe waari arummwa awe. Nyuwo munuupuwela wira awo aniirani? Awo anoorupa! Ikwaha tthaaru Yesu onaaleela awosa wira yaahaana ovikaniha owehaweha, masi khuta ekwaha enitthika awe onaaphwanya arupaka. ‘Xeeni nyuwo orupaka okathi ntoko ola?’ Onihimya siiso Yesu ekwaha yookiserya enitthika awe. ‘Okathi woophiya wira miyo kivahereriwe wa anyokhani aka.’

Okathi ene yoowo onniwerya wiiwanyeya onyakula wa muttitthi muulupale. Nkawehani! Alopwana anrwa ni ikatana ni ikopo! Nto awo akunxe mithuko wira saamwaleeleke. Vaavo awo vanaattamela aya, mutthu mukina onnikhuma mmuttitthini mmo orowaka wa Yesu. Owo oninvaha ebeejo, ntoko siniwerya anyu woona va. Mulopwana owo ti Yuda Isikaryoti! Nthowa xeeni vaninvaha awe ebeejo Yesu?

Yesu onnikoha wira: ‘Yuda, nyuwo munikivariha ni ebeejo?’ Aayo, ebeejo ela ethoonyeryo. Enniwiiriha alopwana awo ari ni Yuda osuwela wira ola Yesu, mulopwana yoowo awo onimphavela aya. Siiso anyokhani a Yesu annirowa wa owo wira anvare. Masi Pedru khoneemererya waahiya awosa amukuxaka Yesu voohikhala ekhotto. Owo onikumiha ekatana yeeyo erwanne awe nto onamphwata mulopwana omwaattamenle. Ekatana ennikusya muruu wa mulopwa owo ni enakwasa niyaru nawe na moono woolopwana. Masi Yesu onnikwannya niyaru na mulopwana owo ni onavoniha nna.

Yesu onimuleela Pedru wira: ‘Muttikiherye ekatana anyu nipuro naya. Khimunuupuwela wira miyo kinoowerya onvekela Tiithi aka ikonto sene sa malaikha wira okoopole miyo?’ Aayo, owo onoowerya! Masi Yesu khoninvekela Muluku wira orumihe malaikha, okhala wira onnisuwela wi okathi woophiya wira anyokhani awe amukuxe. Siiso onnaahiya awosa amukuxaka. Nrowee niwehee yeeyo enimwiiraneela Yesu vano.

Mateyo 26:36-56; Luka 22:39-53; Yohani 18:1-12.