Yoosoma 5

Tiivi Eri Yootthuna ya Muluku Voohimya sa Elapo ya Vathi?

Yehova opattuxenryeni elapo ya vathi? (1, 2)

Xeeni olelo va elapo ya vathi ehikhanly’aya eparayiisu? (3)

Exeeni enrowa waakhumelela alipa ootakhala? (4)

Muhoolo, Yesu onrowa opaka exeeni wa ale aniwereiwa, ale oowuuluvala ni alipa-ookhwa? (5, 6)

Exeeni enitthuneya anyu opaka wira mphwanye mareeliho a muhoolo? (7)

1. Yehova oopattuxa elapo ela wira apinaatamu akhaleke memmo mahiku otheene. Owo aaphavela wira okathi wotheene, elapo ya vathi ekhaliweke ni atthu axariya ni oohakalala. (Esalimo 115:16; Yesaya 45:18) Elapo ya vathi khenkhala-khala enyaanyiwaka; enrowa ovikaniha okhala mahiku otheene.​—Esalimo 104:5; Musuweli 1:4.

2. Muluku ohinatthi ompattuxa mutthu, Owo aahithanla mpantta mmosa mwaamukhaani wa elapo ya vathi khipaka okhala eparayiisu yooreera. Muluku aahiitthana okhala ematta ya wEedeni. Ti memmo Muluku aamukunhe awe mulopwana ni muthiyana oopacerya, Adamu ni Eva. Yootthuna ya Muluku yaari yoowi yaayareke anamwane ni asareye elapo yotheene. Vakhaani-vakhaani, awo yaarowa wiiriha elapo yotheene okhala eparayiisu.​—Maphattuwelo 1:28; 2:8, 15.

3. Adamu ni Eva yaahittheka moolakelela orweela mwa ohiiwelela malamulo a Muluku. Tivonto, Yehova aahiwoomola mmatta mwa Eedeni. Eparayiisu yaahirimeela. (Maphattuwelo 3:1-6, 23) Masi, Yehova kholiyanle yootthuna awe voohimya sa elapo ela ya vathi. Owo oolakela orukunuxa wira ekhale eparayiisu, memmo apinaatamu munrowa aya okhalaka mahiku otheene. Muluku onrowa opaka sai eyo?​—Esalimo 37:29.

4. Elapo ehinatthi okhala eparayiisu, alipa ootakhala ahaana omala-malihiwa. (Esalimo 37:38) Eyo enrowa wiraneya mu Harmagedoni, ekhotto ya Muluku enrowa omaliha otakhala. Moottharelana, Xetwani onrowa otthukweliwa mpakha ovira iyaakha 1.000. Eyo entaphulela wira khonrowa ohala mulipa ootakhala nnakhala mmosa wira ohononeke elapo ya vathi. Paahi atthu a Muluku tanrowa ohala.​—Wisupulula 16:14, 16; 20:1-3.

5. Nto, Yesu Kristu onrowa olamulelaka elapo ya vathi ntoko Mwene iyaakha 1.000. (Wisupulula 20:6) Vakhaani-vakhaani, onrowa omala-maliha yoottheka mmuupuweleloni mwahu ni mwerutthuni mwahu. Hiyo ninrowa okhala apinaatamu ooloka moomalela, ntoko saarya aya Adamu ni Eva ahinatthi ottheka. Nto khivanrowa okhalaka-tho oretta, wuuluvala ni okhwa. Aretta anrowa ovonihiwa, nto oowuuluvala anrowa otthikela okhala amiravo.​—Yobi 33:25; Yesaya 33:24; Wisupulula 21:3, 4.

6. Muhina mwa Iyaakha Ekonto Emosa sa Olamulela wa Yesu, atthu oororomela anrowa ovaraka muteko wira elapo ya vathi yotheene ekhale eparayiisu. (Esalimo 37:29) Nave-tho, imilyau sinceene sa atthu ookhwa anrowa ohihimuxiwa wira akhalane okumi valaponi. (Miteko s’Arummwa 24:15) Akhala wira anoopaka ele Muluku emphavela awe, awo anrowa ovikanihaka okhalaka valaponi mmahiku oohimala. Yaahipake ele Muluku emphavela awe, anrowa opwetexiwa voohitthikela-tho okhalana okumi.​—Yohani 5:28, 29; Wisupulula 20:11-15.

7. Nto, yootthuna yoopacerya ya Muluku voohimya sa elapo ya vathi enrowa wiraneya moomalela. Munniphavela ophwanya mareeliho ala a muhoolo? Akhala wira munniphavela, muhaana ovikaniha wiixutta sa Yehova ni wiiwelela sooruma sawe. Orowa mmithukumano oSalau ya Omwene ya Anamoona a Yehova muttetthe onikhal’anyu, onrowa wookhaliheryani opaka eyo.​—Yesaya 11:9; aHéberi 10:24, 25.

[Efootu ya epaaxina 10]

Eparayiisu yoorimeela

[Efootu ya epaaxina 11]

Ovinre ene Harmagedoni, elapo ya vathi enrowa okhala eparayiisu