Masu Oopacerya

Oophentiwa Munisoma Eliivuru Ela:

‘Murwé mukitthareke’. (Marko 10:21) Nto, masu ala a Yesu Kristu, annilattula-tho hiyo wira nikhale atthareli awe. Niireke wira nyuwo munnaakhulela olattula wa Yesu? Opaka eyo enrowa okhaliherya vanceene okumi anyu. Moota xeeni?

Yehova aahimurumiha Mwanawe mmoseene orwa valaponi, wira ovahe okumi awe ntoko mukuttho. (Yohani 3:16) Ohiya onikhwela paahi, Mwaana owo oonooniherya moota wookhala. Mwa itthu sotheene aapanke awe, aahooniherya ororomeleya ni aahimuhakalaliha Tiithi awe. Nave-tho, Yesu oonooniherya moota woomutakiha Tiithi awe. Moota Tiithi onipaka awe itthu ni yootthuna awe, saahoonihereya saana mmasu ni miteko sa Mwaana.​—Yohani 14:9.

Biibiliya onihimya wira Yesu ti “ephiro” ni ‘wira nimutthareke yowo munvirawe’. (1 Pedru 2:​21) Akhala wira ninniphavela omwaattamela Yehova, okhalana tthiri vano okumi wekeekhai, ni akhala wira ninniphavela ovikaniha otthara ephiro eniphwanyiha okumi woohimala, hiyo nohaana otthara vakhiviru vene mavalo a Kristu.

Wira nipacerye weetta mukwaha ola, hiyo nohaana osuwela saana moota Yesu seettale awe ori valaponi. Nto, nohaana wiixutta oratteene omutthu wa Yesu olempwale mBiibiliyani. Wuupuwelela itthu Yesu saahimmye awe ni opaka, ni othokorerya moota woomutakiha mmasu ni miteko, onrowa onikhaliherya woona oratteene moota woomutthara.

Nto eliivuru ela yookhaliheryeni wuncererya omphenta wanyu Yesu ni Yehova. Vano ophenta iwo owiiriheni otthara vakhiviru vene mavalo a Yesu. Mwiira siiso, nyuwo munoohakalaliha murima wa Yehova vano ni okathi wotheene.