Ekarta ya Nikhuuru Noolamulela

Nyuwo Oophentiwa Ninlaleerya Ahu Ihapari Sooreera:

Eparakha yuulupale wiiraana nimukokhorelaka Muluku eekeekhai, Yehova! Tthiri “ninvara vamosá . . . [ni] Muluku”, maana noovahiwa eparakha ya ovara muteko woowaarya wa olaleya ni owiixuttiha atthu ihapari sooreera sa Omwene, muteko yoowo onoopola ikumi sa atthu. (1 aKor. 3:9; Math. 28:19, 20) Wira nivare muteko owo moowiiraana ni murettele, nihaana okhala ootthokiheya.—1 aKor. 14:40.

Eliivuru ela, enimookhaliheryani osuwela moota muloko wa eKristau onivara awe muteko olelo-va. Nave munooweha mareeliho ni miteko murina anyu, okhala wira mwa Namoona a Yehova. Akhala wira munoovaha efaita muteko anyu ni ovara saana, nyuwo ‘munolipiherya wamini’.—Mit. 16:4, 5; aGal. 6:5.

Nto musomeke oratteene eliivuru ela. Nweheke inamuna mukhanle anyu oovarihela muteko mookumini mwanyu ele munisoma anyu. Mwa ntakiheryo, akhala wira mukhanle niinaano namalaleerya oohipatisiwa, itthu xeeni munireerela anyu opaka wira mpatisiwe ni mukhale Namoona a Yehova? Akhala wira moopatisiwa, itthu xeeni munireerela anyu opaka wira mutepeke okela vahoolo momunepani ni ovara muteko wa Yehova? (1 Tim. 4:15) Munrowa okhaliherya sai okhala murettele mmulokoni? (2 aKor. 13:11) Nwehe waakhuliwa wa makoho ala, eliivuru yeela.

Akhala wira mwa mulopwana oopatisiwa, itthu xeeni munireerela anyu opaka wira mphwanelele okhala murumeyi oorumeela ni muhoolo mwaya mukhale mutokweene? Musuweleke wira anniphaveliwa anna anceene wira ahooleleke mmutthenkesoni mwa Muluku, mwaha woowi mahiku ala atthu anceene annikela mmutthenkesoni mwa Yehova. Eliivuru ela, enimookhaliheryani osuwela ele enihela muhina wiimananiha wira mphwanye soolukama sanyu sa omunepani.—1 Tim. 3:1.

Ninlompa wira eliivuru ela yookhaliheryeni woona ni ovaha efaita opuro anyu mmutthenkesoni mwa Yehova. Ninnoophentani vanceene ootheene anyu ni khaninrowa ohiya woovekelelani wira mutepeke okhala vamosa ni atthu anrowa ohakalalaka mahiku otheene amukokhorelaka Tiithi ihu a wiirimu, Yehova.—Esal. 37:10, 11; Yes. 65:21-25.