Mwiixutte Ele Nuulumo Na Muluku Enihimya Aya

Xeeni Vanitthuneya Ahu Orumeela Nsina na Muluku?

Mwaha ola onaakhula makoho yaale woonasa wene atonko anyu opaka, ni onowooniheryani opuro onaakhuliwa aya mBiibiliyani. Anamoona a Yehova vanimwaasivela owooniheryani waakhuliwa waya.

1. Nthowa xeeni Muluku iivahale awe nsina?

Tthiri vannoosivelani mwiihaneliwaka nsina nanyu ohiya wiihaniwa ntoko so: “weyo mutthu”, “mulopwana”, “muthiyana”. Nsina ti etthu enimwiiriha mutthu osuweliwa. Muluku ookhalana miihaneliwo manceene: “Pwiya”, “Muluku òwerya sothene”, ni ‘Mpattuxa’. (Maphattuwelo 15:2; 17:1; Musuweli 12:1) Masi owo ohiivaha nsina wira onikhaliherye wataana nuuwo. Osoma yoolepa ya Yesaya 42:8, Biblya Exirima, nimphwanya wira nsina na Muluku nttaava na Emakhuwa ti Yahvéh, eyo piiyo, Yehova.

Nnaamwi anamataphulela anceene eranttelinhe ene nsina na Muluku ni moolumo oowi “Muluku”, wala “Apwiya”, nsina nno naaniphwanyaneya mBiibiliyani etthu yowiiraka 7.000 mwa soolempwa sa khalai sa eHeeberi. Tthiri Muluku oniphavela wira nsina nawe nisuweliwe.​—Mmusome Yesaya 12:4.

2. Efaita xeeni erina aya osuwela nsina na Muluku?

Osuwela ele enitaphulela aya nsina na Muluku ti vootthuneya, ohiya osuwela moota wooromola paahi. Osuwela nsina na Muluku ontaphulela opatthana nuuwo. Nsina na Yehova nintaphulela wira “Owo Onniiriha Itthu Wiiraneya”. Ela enooniherya wira Muluku onoopaka khuta etthu wira aakhwaniherye yoolakela awe. Nto, osuwela nsina na Muluku, ohaana onikupaliha wira owo onoowaakhwaniherya anatiri awe. (Esalimo 9:10) Waamini wa ale asuwenle ni anirumeela nsina na Muluku, onniwiiriha omuroromela Muluku ni omoonaka okhala ootepexa otthuneya mookumini mwaya. Nto Yehova Muluku onrowa waakhapelela atthu awo.​—Musome Esalimo 91:14.

3. Xeeni Muluku oniphavela awe osuweliwa nsina nawe?

Muluku oniphavela osuweliwa nsina nawe wira apinaatamu ereelihiwe. Nsina nlo ninniwaataaniha ni Muluku wira ephwanye ekumi ehinimala. Tivonto Yehova oniphavela wira nilaleyeke nsina nawe!​—Mmusome Yohani 17:3; aRoma 10:13, 14.

Yesu aahaasuweliha atthu nsina na Muluku awiixuttihaka malamulo ni anatiri a Muluku. Olelo-va, atthareli a Yesu annivikaniha waasuweliha atthu a maloko otheene nsina na Muluku. Annipaka eyo moowiiraana ntoko atthu a ‘nloko nnìhaneliwa nsina nawe’.​—Mmusome Miteko 15:14; Yohani 17:26.

4. Muluku onrowa ovuwiha sai nsina nawe?

Yehova Muluku oniphavela ovuwiha nsina nawe, maana noonanarihiwa. Mwa ntakiheryo, atthu akina anihimya wira Muluku khopanke etthu ekumi, nto khivantthuneya omwiiwelela. Akina ani, owo khonnoonela vatthu ni tonikumiherya mixankiho. Atthu awo anniveeha nsina na Muluku. Masi awo khanrowa oveeha mahiku otheene. Muluku onrowa waaphukela otheene yaale aniveeha nsina nawe.​—Musome Esalimo 83:18, 19.

Yehova onoovuwiha nsina nawe vaavo Omwene awe onrowa aya opwetexa omwene wa apinaatamu wira aavahe atthu murettele. (Daniyeli 2:44) Moohipisa khula mutthu onoosuwela wira Yehova ti Muluku ekeekhai.—Mmusome Ezekiyeli 36:23; Matheyo 6:9.

Nto munrowa opaka exeeni? Mwaataane ni Muluku orweela mwa osoma Nuulumo nawe ni wataana ni atthu animphenta. Okathi Yehova onrowa awe ovuwiha nsina nawe, onrowa owuupuwela arumeyi awe oororomeleya.​—Malakhiya 3:16.

Soohimmwa sikina, nwehe ekapiitulu 1 ya eliivuru ela ekumiheriwe ni Anamoona a Yehova. Biibiliya Oniixuttiha Exeeni Tthiri?

[Elatarato epaaxina 10]

Nsina na Muluku mwa iliivuru soolempwa ni matata sa khalai sa eHeeberi