Munniimananiha Olaleerya Ettiminku?
1. Etthu xeeni eniixutta ahu sa ele Paulo ni ale yeetta awe yaapanke aya oFilipi?
1 Yaari eSaabadu, nihiku nenno aYuda anceene oFilipi yaaphumurya aya. Paulo vamosa ni ale yeettana awe yiira aryeene muttetthe yoole, mmukwaha aya wa omisionaario. Nto khuuvo aarowa waapwapwela akhala wira Paulo ni ale yeettana awe yoona okhala vooreerela ophumurya eSaabadu ele ntoko aYuda akina. Masi, nuumala osuwela wira aYuda yaahithukumana ota wa muttetthe wira avekele, Paulo ni ale yeettana awe yaahittottela mureerelo okathi owo khupacerya waalaleerya. Tthiri Paulo ni ale yeettana awe yaahihakalala vanceene vaavo Lidia vamosa ni atthu a etthoko awe yiiwale aya masu khubatiziwa! (Miteko 16:13-15) Okhala wira olelo-va Ettiminku ti nihiku atthu anceene aniphumurya aya, xeeni muhirumeelaka Ettiminku wira mwaalaleerye atthu awo?
2. Mixankiho xeeni atthu a Yehova sixinttale aya wira alaleeryeke Ettiminku vohoova etthu?
2 Owanela Olaleerya Ettiminku: Mwaakha wa 1927 atthu a Yehova yaahitumereriwa orumeela okathi vakhaani wa khuta Ettiminku wira alaleerye. Mowaakuveya, eyo yaahikumiherya olupatthiwa. Elapo ya Estados Unidos, yaahitthukiwa anamalaleerya anceene yootheriwaka okhala atthu yaavirikanya nlamulo na ophumurya Ettiminku, yaakanyererya murettele, ni otumiha aheemereriwe ni ekuvernu. Masi eyo khiyawiirinhe atthu a Yehova wooceela olaleerya. Iyaakha sa 1930 saahilokiheriwa “ikrupu sa ekampaanya ya olaleerya”, eyo piiyo, anamalaleerya a miloko sikina sowaattamela yaanirwa omaleliha olaleerya mmuttetthe waalupatthiwa anna. Okathi anamalaleerya a muttetthe mmosa yaatthukiwa aya, yaanirwa anamalaleerya anceene mpakha makhulupale eelapo ohiwerya waahiiha olaleerya. Niireke wira munnivaha efaita wiimananiha waapanke aya anna ale wira hiyo nilaleeryeke Ettiminku nihoovaka etthu?
3. Etthu xeeni eniiriha Ettiminku okhala nihiku nooreerexa olaleerya?
3 Nihiku Nooreerexa Olaleerya: Ettiminku atthu anceene khanrowa omutekoni ni khanaatteliwa miteko. Atthu yaale aneetta okerexa, pooti waakhulela olavula sa Muluku mwaha wookhala Ettiminku. Akhala wira mithukumano sahu sinikhala Ettiminku, ikuwo siniwara ahu nrowaka osalau, ti sookhalela orowana olaleerya. Nto ti vooreerela ompakaka palano wira mwalaleerye mithukumano sihinatthi wala nuumala mithukumano iyo. Vaareerelaka hiyo pooti ohela mmurupani yoolya.
4. Ohakalala xeeni onrowa ahu ophwanya akhala wira ninnirumeela okathi wookhalela wira nilaleerye Ettiminku?
4 Akhala wira ninnirumeela okathi wookhalela wira nilaleerye Ettiminku, nlelo onoohala okathi wooreerela ophumurya. Nto ophumurya wahu onrowa okhala woohakalaliha mwaha woowi noovara muteko wa Muluku. (Mir. 3:24) Opaka eyo onooniriha omphwanya mutthu onilikana ni Lidia!