Nivareke Muteko Woolaleerya Moohihiyererya
1. Ninsuwela sai wira anamalaleerya a eseekulu yoopacerya khiyaahiyererya olaleerya?
1 Anamalaleerya a eseekulu yoopacerya, “khiyàhiyererya owixuttiha” atthu yaaphwanya aya khula nipuro. (Mit. 5:42) Nto, nihuupuweleke wira okathi yaarowa aya olaleya ihapari sooreera khuta empa, yanaahiya atthu yaaphwanya aya mphironi. Nave-tho, yaanittottela muraarelo wira alaleerye mohiilokiherya okathi yaarowa aya othuma itthu omerkaatu nuumala ophera muteko aya woolaleerya. Amutakihaka Yesu, awosa khiyaahiyererya olaleerya.—Mar. 6:31-34.
2. Exeeni enihela muhina okhala moovarihana ni nsina nahu?
2 Nikhaleke Oowiilokiherya Okathi Wotheene: Nsina nahu noowi Anamoona a Yehova khahiyo paahi nnooniherya muteko onivara ahu, masi-tho ninnooniherya muthinto xeeni wa atthu aniihaneliwa nsina nno. (Yes. 43:10-12) Ti nthowa naya niri ahu oolikaneene waakhula makoho voohimya sa nlipelelo nahu, pooti okathi yoole ohinrowa ahu olaleerya khuta empa. (1 Ped. 3:15) Niireke nyuwo munniilokiherya wira wakhumelela okathi wa ovaha onamoona mohiilokiherya muupuwele etthu yaarowa anyu ohimya? Munnikuxa iliivuru wira mwaavaheke yaale anooniherya osiveliwa ekeekhai? (Mir. 21:5) Niireke wira nyuwo munlaleya paahi ihapari sooreera empa ni empa? Wala munnaalaleerya-tho atthu a mapuro makina moovarihana ni mikhalelo sanyu?
3. Nthowa xeeni nsu noowi “orantteliha”, nihinireerela aya orumeela naaphavelaka olavula sa olaleerya mphironi, mapuro anipwehiwa ikaaro, aniiriwa nakoso, ni mapuro makina?
3 Olaleerya Khuta Empa “Khonirantteliha” Olaleerya Mapuro Makina Ari Atthu: Khalai, ikwaha sikina naanirumeela nuulumo noowi “orantteliha” niphavelaka ohimya olaleerya mphironi, mapuro anipwehiwa ikaaro, aniiriwa nakoso, ni mapuro makina. Masi nuulumo noowi “orantteliha”, ninkhala ntoko wira wiimananiha olaleerya mapuro makina, khahiyo vooreerela, wala mutthu pooti othanla akhala wira onniphavela. Masi murummwa Paulo aanilaleerya mapuro otheene ni khula empa. (Mit. 20:20) Tivonto, olaleerya mphironi, mapuro anipwehiwa ikaaro, aniiriwa nakoso, ni mapuro makina, khahiyo enamuna “yoorantteliha” olaleerya khuta empa ntoko suupuwela ahu khalai. Masi olaleerya mapuro awo, oniirela mpantta olaleerya mapuro otheene ari atthu. Ekeekhai wira olaleerya khula empa, onoovikaniha okhala enamuna yuulupale ni yootepexa okhumela saana wira naasuwelihe atthu mihupi sa Omwene. Masi, anamalaleerya a eseekulu yoopacerya yaawaavya atthu ohiya ipa. Awo yaanittottela muraarelo khula okathi wira yaasuweliwe atthu ekeekhai, alaleeryaka mapuro otheene. Nto, nrowe otheene ahu naaphaveleke atthu khuta opuro wira nimalelihe muteko ahu woolaleerya oratteene.—2 Tim. 4:5.