Olaleerya Wookhweya

Wira Nipacerihe Soosoma sa Biibiliya eSaabadu Yoopacerya, Setembro

“Ehaali? Olelo, nnaaxukurya atthu niwooniheryaka myaha soororomeleya sinaakhaliherya anamathelana okhalana etthoko yoohakalala. Nyuwo munoonela sai, exeeni eniiriha wira ikasamento sikina sihihakalaleke?” [Nwehererye waakhuliwa.] Mmooniherye epaaxina yookiserya ya Owehaweha 1 ya Setembro, ni muthokorerye hoothe mwaha ori vathi va nikoho noopacerya ni muthanle yoolepa emosa wira musome. Munvahe irevista, ni mwiiwanane nihiku nootthikela wira mwaakhule nikoho ninttharelana.

OWEHAWEHA 1 ya Setembro

“Nihoorwa wooxukuryani, okhala wira anamunceene a muttetthe ahu annikoha nthowa naya Muluku onaahiya awe atthu ehaawaka vanci. Nyuwo mootoko wiikoha mmwaha owo? [Nwehererye waakhuliwa.] Ti vooreera osuwela wira Biibiliya onnileiherya okathi ohinrowa aya-tho okhala oriipiwa murima ni ohaawa. [Mmusome Wisupulula 21:4.] Erevista ela ennihimya mathowa mathanu aniiriha wira okhaleke ohaawa mulaponi. Nave, ennooniherya ele Biibiliya onihimya awe sa moota Muluku onrowa awe omaliha ohaawa”.

Despertai! a Setembro

“Olelo ninvaanela ni atthu, voohimya sa efesta enaattamela yeeyo anamunceene anisuwela aya okhala Nihiku na Owuupuwelela Alipa-ookhwa. Akina khanipaka efesta ela, ahimyaka wira aniiwelela soolopola sikina sa Biibiliya. Nkahaya moone eveersu ela. [Mmusome Onamukuttho 19:31] Masi akina khanikupali wira minepa sihaavo, nto anuupuwela wira efesta ya Owuupuwelela Alipa-ookhwa ori otthekula ohinikumiherya maxakha. Munoonela sai mwaha ola? [Nwehererye waakhuliwa.] Erevista ela ennooniherya mapacereryo a Nihiku na Owuupuwelela Alipa-ookhwa”.