Mianmar
Ipaaxina 104-105
Yehova Ookivaha Murima Wooloka
WILSON THEIN
MWAAKHA OYARIWE AWE 1924
MWAAKHA OBATIZIWE AWE 1955
MWAHA ENE Aari nawiiye; masi ohiimananiha vanci wira orukunuxe mweettelo awe. Nave, oorumeela ntoko pioneero a vameekhaaya mwa iyaakha 54.
OKATHI kaari aka mmiravo, kaahiixutta owana eboxi, owana moomoroxana, vamosa ni karaate. Tivonto, miyo kaari mutthu oowali ni ootakhala. Kirina ene iyaakha 19, kaaneetta ni egrupu ya anawiiye yaarina akapwitthi. Wanikisa waya, kaahivariwa ni kitthukweliwa mukhatteya iyaakha 8, opuro yoowo kaapacenrye aka wuupuwelela mweettelo aka woohiloka. Nto kaahinvekela Muluku wira okikhaliherye. Tthiri, miyo kaaniphavela osuwela itthu sinci voohimya sa Muluku.
Nuumala otaphuliwa mukhatteya, kaahithaamela epooma ya oYangon, weiwo kaapacenrye aka orowa omuthukumanoni wa Anamoona a Yehova. Muhoolo mwaya, kaahiphwanelela obatiziwa, kikhaliheriwaka ni anna oopixa murima.
Nuumala obatiziwa, nlelo vaanitthuneya wiimananiha vanci wira kooniherye mikhalelo sa eKristau. (aÉf. 4:24) Miyo kaanaalavula akina moohiloka ni kaanaakuva onanariwa. Miyo kaaphavela okhala mutthu ooloka, masi vaanikivila wiihiiha. Miyo nkiivaha efaita, nto ikwaha sikina kaanirowa omuro kinanla okathi munceene.
Mwaakha wa 1957, miyo kaahithanliwa okhala pioneero a vameekhaaya. Opuro woopacerya kaathanleliwe aka waari muttetthe wa oMandalay. Nto kaarumeela ni Robert Richards yoowo aari ntoko tiithi aka. Owo aahikiixuttiha oweha makhalelo aka ooloka ni okupali ohimalela waka. (aGal. 5:22, 23) Khula okathi kaananariwa aka, kaaninvekela Yehova, wira ‘okivahe murima woloka’ ni wa murettele. (Esal. 51:12) Yehova ahaakhula mavekelo aka, ni nuuvira okathi kaahiwerya olokiherya mweettelo aka.
Muhoolo mwaya, kaahipacerya osoma ni mulopwana mmosa e ekerexa Baptista aarina iyaakha 80. Atthu a ekerexa awe yaahinanariwa ni khuhimya wira miyo kaahiwiiyerya “ipwittipwitthi” saya. Mmosa a yaawo aahikithoonya ni mwaalo ni anakoopopiha oriki: “Kiireke omwiiva mutthu etampi?” Nto, kaahinanariwa vanci. Masi, moohipisa kaahinvekela Yehova moomaaleleya wira okikhaliherye. Nto moolipa murima, kaahimuleela so: “Mwaakhuleke mmensinyu nikoho nlo”. Mulopwana ole khaakiirinhe etthu ni aahikhuma opuro ole. Kaahimuxukhurela Yehova mwaha wookikhaliherya okhala oomaaleleyaa. Ole aamusomiha aka Biibiliya aahibatiziwa ni khukhala Namoona oororomeleya mpakha okhwa wawe.
Mwa iyaakha sinci koorumeela ntoko pioneero a vameekhaaya mapuro 17, ni kihaakhaliherya atthu 64 wiixutta ekeekhai. Vaavo kinuupuwelela aka moota Yehova okireerenle awe murima, maithori aka annimora moohakalala. Owo oomukhaliherya mmiravo ootakhala, oowali, ni oohihakalala wira okhalane murima wooloka.
[Ediagrama epaaxina 4]
Miyo nkiivaha efaita, nto ikwaha sikina kaanirowa omuro kinanla okathi munceene
[Ipaaxina soohikhala etthu 5,6]