Mweetteleke Waamini, Ohiya Itthu Sinooneya
Ohalaka okathi vakhaani wira anakhotto apwetexe muttetthe wa oYerusalemu, murummwa Paulo ahaalepela epaphelo maKristau ale wira, ntoko anakhotto oororomeleya a Kristu, yahaana osuwela wira samwaakhumelela mixankiho, ni yahaana osyaka ohela nipuro noopacerya ophavela opuha ni ohakalala paahi. (2 Tim. 2:3, 4) Nnaamwi mixankiho sa olumwenku ola wootakhala sihanle ene vakhaani omala, hiyo nihaana olipiha waamini wahu ni ovikaniha ovarexexa miteko sa Muluku. (2 aKor. 4:18; 5:7) Nwehe eviidiyu ‘Ande pela Fé, Não pela Vista’. (Murowe va jw.org, nto nwehe opuro oni PUBLICAÇÕES > VÍDEOS.) Muhoona wira ovahexa efaita itthu sa werutthuni saahaaphwanyiha mixankiho suulupale atthu ala: Naão ni Abital. Vano, nuuluule makoho ala anittharelana.
(1) Exeeni waari ‘mwikho mulupale wowuliha muru apwehiwe nipuro nowarya’ eseekulu yoopacerya, nto maKristau yaakhala oYerusalemu yaatthuneya aya opaka exeeni? (Math. 24:15, 16) (2) Xeeni okhuma epooma ele waatthuneya aya okhalana waamini woolipa? (3) Exeeni yaahela muhina okhuma opuro ole? (4) Exeeni yaamwiirinhe Naão ni Abital opisa okhuma nipuro nle? (Math. 24:17, 18) (5) Etthu xeeni ekina yeeherenrye waamini wa Rakheli okathi aakhumme awe oYerusalemu? (Math. 10:34-37; Mar. 10:29, 30) (6) Moota xeeni Etã onivanhe awe ntakiheryo nooloka na okhalana waamini ni omuroromela Yehova? (7) Mixankiho xeeni saakhumelenle maKristau yaakhala muttetthe wa oPela? (8) Waamini wa Naão ni Abital waavukuwa sai khula okathi? (9) Yehova aakhapelela sai maKristau yaakhala muttetthe wa oPela? (Math. 6:33; 1 Tim. 6:6-8) (10) Ninrowa omutakiha sai Abrahamu ni Sara vaavo vanoona ahu ophiya waanikisa wa makhalelo a olumwenku ola? (aHéb. 11:8-10) (11) Exeeni yamwiirinhe Naão ni Abital otthikela oYerusalemu, ni yoonihenrye sai ohikhalana ankhili? (Luka 21:21) (12) Makhalelo xeeni yaaphwannye aya Naão ni Abital oYerusalemu moovirikana ni ale yaalipelela aya? (13) Xeeni vanitthuneya ahu olipiha waamini wahu olelo-va, vahinatthi ophiya waanikisa wa olumwenku ola?—Luka 17:31, 32; 21:34-36.
Weettela waamini onitaphulela (1) ororomela malakiheryo a Yehova, (2) omweemererya wira eettiheke mweettelo ahu, ni (3) woohiherya wira ninnivaha efaita yuulupale itthu sa omunepani ohiya itthu sa werutthuni. Opaka eyo onoonikhaliherya weettela waamini, niroromelaka wira “makhalelo ala anomala vamosá n’itthu simphavelexaya, nto ole onettela otthuna wa Muluku onokhala mahiku othene”.—1 Yoh. 2:17.