Nyuwo Mwaanisuwela?

Xeeni aisarayeli a khalai, yaaliva aya esisapo ya noiva?

KHALAI, akhala wira mulopwana aaphavela othela, aanaavaha etthu aahiiso musurukhu amusi awe muthiyana okathi yaapakiwa aya mareheryo a ekasamento. Esisapo eyo ya noiva yaahela muhina itthu sa evalore, inama, aahiiso musurukhu. Ikwaha sikina, mutthu aaliva ovaraka muteko, sintoko iirale awe Yakobe, okathi eemerenrye awe onvarela muteko Labano mwa iyaakha 7 wira omuthele mwanawe aitthaniwa Rakheli. (Maph. 29:17, 18, 20) Masi xeeni yaatthariwa aya yoolema ele?

Musomi mmosa muthiyana oniitthaniwa Carol Meyers, ohimmye so: “Epereso ya noiva, woonasa wene yaaliverya miteko muthiyana ahaarowa awe ovaraka vatthokoni va anamuyari awe. Maana nuumala otheliwa, awo khiyaamoona mutthu oowaakhaliherya, vanceenexa akhala wira yaalipa paahi ni muteko woolima”. Nave waanyiheryasa esisapo ele yaanikhaliherya olipiha opatthani wa imusi iye piili okathi ole. Wiiraana iwo waanikhaliherya vanceene okathi wooxankiha. Nave epereso ya noiva yaanooniherya saana wira okhuma nihiku nle, muthiyana ole aarowa okhapeleliwaka ni iyawe ohiya aanamuyari awe.

Oliva esisapo ele, khiwaataphulela wira muthiyana owo aari ntoko nakoso. Eliivuru Israel Antigo: Sua Vida e Suas Instituições, enihimya so: “Yoolema ya oliva musurukhu aahiiso ovaha etthu emusi ya muthiyana aarowa otheliwa, yaaniiriha ekasamento ya aisarayeli olikanaka ni nakoso. Masi [epereso ya noiva] vanikhala wira khiyaathokoreriwa ntoko esisapo aathumaniwa awe muthiyana ole. Maana yaavahiwa emusi awe ntoko etthuvo”.

Olelo-va, ilapo sikina nlelo atthu anniliva epereso ya noiva aahiiso lobolo. Okathi anamuyari makristau anivekela aya ovahiwa etthu aahiiso lobolo mwaha wa mwanaya onrowa otheliwa, ahaana wiimananiha wira oreera waya murima “osuweliweke ni atthu otheene”. (aFil. 4:5; 1 aKor. 10:32, 33) Yapaka eyo, animooniherya wira ‘khaniphenta musurukhu’. (2 Tim. 3:2) Akhala wira anamuyari khaniveka musurukhu wootepexa waatta, eyo ennimukhaliherya ole onrowa othela, ohinteerya ekasamento awe wira ahaavyeke musurukhu owo mpakha ophiyerya. Nave eyo khenrowa omukhanyererya ohiya opioneero, wira ahaavyeke muteko wa mulaponi onrowa awe oliviwaka musurukhu munceene, wira owerye oliva epereso ya noiva.

Ilapo sikina, nlamulo na kuvernu ti ninhimya esisapo ya noiva. Anamuyari makristau anikhala ilapo iyo, anniiwelela malamulo awo. Mwaha wa xeeni? Nuulumo na Muluku ninhimya wira makristau, ahaana ‘owiiwelela makhulupale a mulaponi’, nave ahaana wiiwelela malamulo ahimmutthekela Muluku.—aRom. 13:1; Mit. 5:29.