Makoho Anikohiwa ni Ale Anisoma Irevista Sahu

Yoolepa ya 2 aTesaloonika 3:14, enilavula sa okhalana ephoole ni atthu akina. Ti pani okhanle oopaka eyo? Axitokweene wala khula mutthu mmulokoni?

Murummwa Paulo aahaalepela makristau a oTesaloonika, oriki: “Akhala mutthu ohiniiwelela itthu nilempe ahu mpapheloni-mu, mukhalane ephoole ni mutthu owo”. (2 aTes. 3:14) Khalai, naahimya wiira malakiheryo ala yaaroiheliwa axitokweene. Akhala mutthu aakhootta malakiheryo aavahiwa awe ni axitokweene, hata okhaliheriwe ene ikwaha sinceene, axitokweene yaanilavula mwaha aroihelaka muloko wootheene, wiira okhalane ephoole ni mutthu owo. Tivonto, anamalaleerya khiyaarowa ovirihaka okathi ari ene ni mutthu owo. Yaarowa okumanaka paahi mmuthukumanoni ni muteko woolaleerya.

Masi vannipirisari olokiherya muupuwelo owo. Vano vanooneya wiira miruku iye Paulo ovanhe awe, sinooniherya wiira khula mutthu mmulokoni tonrowa othanlaka moota woopaka etthu eyo. Tivonto, axitokweene khanipirisari olavula mwaha yaalopolaka atthu. Xeeni ninturuka ahu moota nnintenteri ahu yoolepa ya 2 aTesaloonika 3:14? Nrowe nthokorerye mwaha Paulo aalavula awe okathi aavaha awe miruku iya.

Paulo aahimmye wiira atthu akina mmulokoni, ‘khiyaiwelela’. Paulo aahaavaha miruku saakhuma mbiibiliyani, masi awo khiyaaphavela wiiwelela. Ekwaha yookiserya Paulo aaxukunrye awe muloko ole, owo aahihimya wiira: “Akhala mutthu ohiniphavela ovara muteko, weeso ohilyeeke”. Masi ahaavo atthu akina yaakhootta ovara muteko wiira yiikhapeleleke, nnaamwi yaawerya. Ohiya-vo, awo yaaniikeliha myaha sa atthu akina. Makristau yaarowa waathokoreryaka sai atthu ale yahiiwelela? — 2 aTes. 3:6, 10-12.

Paulo aahimmye wiira: “Mukhalane ephoole ni mutthu owo”. Nuulumo na ekereku nirumeeliwe va, ninkumiherya muupuwelo wa omusuwela mutthu owo ni okhalana ephoole wiira ohiniravihe mweettelo awe woohiloka. Paulo aalempe miruku iya para muloko wootheene, ohiya axitokweene paahi. (2 aTes. 1:1; 3:6) Tivonto khula mutthu mmulokoni, yoowo aarowa onweha mukristau mukhwaawe ohiiwelelaka miruku sa mbiibiliyani, taarowa othanla ‘ohiya waataana’ ni mutthu owo.

Niireke wiira mutthu owo aahaana othokoreriwa ntoko mutthu okumihiwe mmulokoni? Nnaari, maana Paulo aahihimya-tho wiira: “Muthipeleleke omulopola ntoko munninyu”. Tivo, khula mukristau anvirihaka okathi ni mutthu owo mmuthukumanoni ni muteko woolaleerya, masi khaarowa ovirihaka okathi atthekulaka. Mwaha wa xeeni? Paulo aakhunle so: “Wira uuliwe muru”. Nto, mwaha wa atthu akina okhalana ephoole nuuwo, mukristau owo oohiiwelela, aamuuliwa muru ni aamuturuka mweettelo awe. — 2 aTes. 3:14, 15.

Olelo-va, makristau anrowa otthara sai miruku iya? Etthu yoopacerya, ori osuwela vakhala wiira tthiri mutthu owo ‘toohiiwelela’, ntoko murummwa Paulo otthokihenrye awe. Owo khahiyo aahimya atthu yaale anipaka itthu seiye murima ahu ohineemererya aya, masi sihinivirikanya malamulo ni malakiheryo a mbiibiliyani. Nave khaahimya atthu yaale anithanla opaka itthu sinivirikana ni itthu hiyo ninthanla ahu. Nave khaahimya atthu yaale aniirenle etthu eniwereyale. Paulo aahimya atthu yaale anivahiwa miruku sa mbiibiliyani, masi ahinaphavela wiiwelela.

Olelo-va, nanweha munna aahiiso murokora onithipelela ohiiwelela miruku sa mbiibiliyani,a hiyo nnoothanla ohitthekula ni mutthu owo. Okhala wiira etthu eyo nithanlale mmansihu, hiyo khinaarowa olavulaka ni atthu akina, waahiya ale anikhalana ahu etthoko emosa. Masi nlelo nanvirihaka okathi ni mutthu owo mmuthukumanoni ni muteko woolaleerya. Nto akhala wiira mutthu owo onooturuka mweettelo awe, hiyo nnootthikelaka otthekula nuuwo.