Olepa Onimookhaliheryani Wuupuwela

Woonasa wene, akina a hiyo vannaaxankiha wuupuwela etthu asomme aya. Ti vookhweya wuupuwela itthu Yesu iixuttiha awe, okhala wiira ikwaha sinceene aarumeela malikanyiho. Vaavo nnuupuwela ahu etthu Yesu aahimmye awe, ninniweha etthu malikanyiho awo anniixuttiha aya. Mwa enamuna emosa-ru, olepa itthu munisoma anyu, onimookhaliheryani ohaakuva oliyala. Munrowa owerya sai opaka eyo? Munoowerya opaka eyo, vakhala wiira munoolepa itthu isya muniixutta anyu.

Atthu anilepa itthu isya aniixutta aya, ikwaha sinceene anniwerya wuupuwela itthu asomme aya. Vaavo ninlepa ahu itthu niixuntte ahu okathi woosoma, eyo enoonikhaliherya wuupuwela ni ohiliyala iponto suulupale sa mwaha nisomme ahu. Wiimananiha wanyu olepa itthu muniixutta anyu okathi munisoma anyu, khonitaphulela wiira muhaana osuwela olepa oratteene. Eyo enooniherya wiira munnipaka ele eniwerya anyu, wiira muhiliyale ele musomme anyu. Olepa etthu mwiixuntte anyu okathi woosoma, onimookhaliheryani vanceene. Nave-tho, atthu oowuuluvala anoowerya ottottela mureerelo enamuna ela.

Okathi munrowa anyu osomaka, mweererye olepa etthu mwiixuntte anyu. Mwapaka eyo, munoorowa oweha mureerelo munrowa anyu ophwanya, eyo piiyo, khamunrowa oliyala etthu mwiixuntte anyu!