Moota Woowuupuwela Soolepa sa Mbiibiliyani

Niireke mootoko okhalana muxankiho wa oohaakuva ophwanya yoolepa ya mbiibiliyani aahiiso ohuupuwela etthu enihimya aya? Woonasa wene, yoolepa enoomaalihani vanceene, enookhaliheryani oxintta miyuupuwelo soohiloka aahiiso mwaaphavela anyu omooniherya mutthu mukina. (Esal. 119:​11, 111) Nrowe niwehe iponto vakhaani, sinrowa onikhaliherya wuupuwela soolepa sa mbiibiliyani.

• Murumeele mpantta oni: “Adicionar uma etiqueta” mwaplikatiivuni JW Library^®. Mpakeke etikeeta eniitthaniwa: “Textos favoritos” ni muhele yoolepa muniphavela anyu wuupuwela.

• Mpweheke yoolepa anyu opuro muniwerya anyu oweha. Mulepeke etestu vapapheloni, nuumala-vo, mpweheke epaphelo eyo opuro muniwerya anyu oweha. Akina anipweha ohoolo wa exipelyu, nave akina anipweha vamukhora wa exileera. Akina annitirari efootu yoolepa eyo ya mbiibiliyani ni anahela veekarani a telefoni aya aahiiso a komputatoore aya.

• Murumeeleke ikartau saamukhaani. Mpantta mukina wa ekartau eyo, mulepeke nsina na eliivuru eyo, ekapiitulu ni eversiikulu. Nave mpantta mukina mulepeke moolumo a yoolepa eyo. Tivonto, okathi muniweha anyu mpantta mmosa, mmananiheke ohimya etthu eri mpantta mukina muhiwehaka.