Mianmar

Ekaaxa eri ipaaxina 108-109

Yehova Aahipaka Itthu Mootikiniha

MAURICE RAJ

MWAAKHA OYARIWE AWE 1933

MWAAKHA OBATIZIWE AWE 1949

MWAHA ENE Owo ooviriha iyaakha sinivikana 50 mmuteko wa okathi wotheene oMianmar, okathi munceene orumeelaka ntoko mutokweene oniweherya efiliyaali. Owo nlelo onirumeela Ekomisau ya Efiliyaalia.

◆ Mwaakha wa 1988, waahikhumelela ovaanyihiwa wootakhala wa guvernu muttetthe wa oYangon vaavo atthu ikonto sene yaarowale aya mustaraatani aphavelaka mirukunuxo sooloka sa epoliitika. Vaavo waakhumelela aya muxankiho ola muulupale, atoropa yaahikuxa olamulelo wa elapo, nto apaceriha nlamulo nootakhala na ekhotto elapo ya oMianmar. Atthu anceene yaavaanyiha olamulelo owo yaahiiviwa.

Masi mweeri yoowo, naaniphavela oroiha erelatoorio ya efiliyaali ahu ya vamwaakhani oNova York. Masi, ikaruma sotheene saakhweiherya olavula ni atthu a elapo ekina saahikwasiwa, ni khinoona moota wooroiha erelatoorio ahu oNova York. Vano kaahiiwa wira embaixada ya Estados Unidos, yaaniroiha idokumento saya arumeelaka helicóptero. Nto kaahuupuwela wira erelatoorio ahu yanwerya oroihiwa oNova York. Nto kaahiwara ekasako ni ekaalasa aka yootepexa oreera vamosa ni egravata, nto kirowa mpakha wembaixada.

Nto vaavo keettihaka ekaaro mustaraatani yoosareya epula, kaahoona wira epooma yaahimaleeleya vowoopiha. Mowaakuveya, kaahoona ohoolo waka mwiri muulupale yoowo waawala ephiro yaarowa aka. Nto kaaheemexa ekaaro kinarowa ni mwentto wembaixada.

Okathi kaattamela aka mukhora wa embaixada, kaahiwoona atthu anceene akhuwelaka wira akele muhina mwa embaixada. Masi atoropa yaanaakhoottiherya atthu awo okela. Nto kaaheemela ni kaahipaka nivekelo noomaaleleya. Mulopwana mmosa aahoona wira nkaareere ophwaneliwa. Nto aahikithoonya olavulaka so: “Woonasa wene mulopwana ola onivara embaixada yeela”. Nto kaahiimananiha ovira eriyari ya muttitthi wa atthu mpakha ophwanya mukhora. Okathi kaaphiyale aka vamukhora yoowo waawaliwe, toropa mmosa aikuru aahikiwehexexa nto khukikoha wira:

“Nyuwo ti pani, ni muniphavelani?”

Nto kaahimwaakhula so: “Kiniphavela olavula ni embaixadore. Kihaana edokumento yootthuneya wira eroihiwe wAmerika”.

Nto owo aahikiwehexexa vanceene, ni aahihula mukhora, nto aahikeemererya okela mowaakuveya ni aahiwala mukhora moohipisa.

Toropa ole aahilavula so: “Mukitthareke”.

Vamukhora va embaixada, toropa ole aahikiroiha wa muhooleli mukina yoowo aari ootemwa ene, nto aahikikoha etthu yaaphavela aka.

Miyo kaahimwaakhula wira: “Miyo kinikhuma ofiliyaali ya Anamoona a Yehova ya elapo ela. Nto kiniphavela ovahererya erelatoorio wira ephiye oseedi wahu oNova York mweeri yoola. Xontte, munoowerya okuxa okathi oniroiha anyu idokumento sanyu?” Vano kaahinvahererya enveloope aka ni kihimya so: “Mukiswaamihe, masi nkirina eseelu”.

Mukhulupale ole aahitikinihiwa, nto khupaka makoho vakhaani. Nuumala-vo, aahikilipiherya wira yaamuroihiwa erelatoorio ahu. Muhoolo mwaya, kaahiiwa wira erelatoorio ya elapo ahu yaahiphiya okathi wooreerela oseedi oNova York.

[Inoota]

Sookhumelela sa mookumini sa munna Raj sinniphwanyaneya erevista Owehaweha ya ekunya 1 ya Dezembro, 2010.