Epaphelo ya Nikhuuru Noolamulela

Oophentiwa Anamuteko Akhwiihu:

Ti voohakalaliha vanceene woolepelani epaphelo ela wanipacerya wa mwaakha ola! Ohinatthi omala mwaakha wa 2014, enrowa ovira eseekulu ntero okhuma vaavo Mwene ahu Yesu Kristu opacenrye awe olamulela eriyari ya awanani awe.​—Esal. 110:1, 2.

Wanipacerya wa mwaakha ola wa muteko, muthukumano a khula mwaakha a Sociedade Torre de Vigia de Bíblias e Tratados da Pensilvânia, ekomisau enimutaphulela Biibiliya a Tradução do Novo Mundo yoomukumiherya Biibiliya musya a Engelexi yoowo otaphuleliwe mwa enamuna yookhweya omwiiwexexa. Yehova ohaarumeela anaawe oowoottihiwa ni munepa awe wira amukumiherye Biibiliya ootaphuleliwa saana Tradução do Novo Mundo. (aRom. 8:15, 16) Mwaha owo onnimwiiriha Biibiliya ola okhala a vameekhaaya, niireke khamunikupali eyo?

Mwa iyaakha sinceene, Ekomisau Yoolepa ya Nikhuuru Noolamulela yooweha wira otaphuleliwa wa Biibiliya ti etthu yootepa otthuneya. Olelo-va, Tradução do Novo Mundo onniphwanyaneya otheene aahiiso mpantta awe, mattaava oowiiraka 121. Ninnootumereryani wira mmooniherye Yehova wira munnixukhurela vanceene mwaha wa Biibiliya ola. Mmusome ni mmuupuweleleke khuta nihiku. Mwiira siiso, nyuwo munoomwaattamela mwaaneene Biibiliya, Yehova Muluku.​—Yak. 4:8.

Hiyo ninniriipiwa murima vaavo nniiwa ahu mixankiho aniviriha aya anna ni arokora ahu oophentiwa. Ninnisuwela wira okathi mukina awo khaniwerya okhala hoothe ni axinna aya wira ahakalale. Mwa ntakiheryo, emusi emosa wAsia yoophwanya mixankiho mootutuxerya vaavo maama ophwannye awe eretta emurakalinhe erutthu yotheene. Etthu yootikiniha okhala wira mameediku khaniwerya orukunuxa mukhalelo awe. Etthu yooriipiha murima! Vano iyawe murokora ole ohaana waathokoreryaka amwaara awe khuta okathi. Mwanawe mwaamulopwana ni anaawe axithiyana anli annivaha ntakiheryo nooloka ntoko maKristau, yaakhaliheryaka moophenta anamuyari aya. Ntakiheryo nooloka na emusi ela vamosa ni imusi sotheene sinikhumela saana sinniwerya ohakalala vaavo sinvilela aya soweeha sa waamini waya. (Yak. 1:2-4) Yehova onnaalipiherya ale oowoottihiwa ni ipwittipwitthi sikina wira anoohakalala akhala wira anoovikaniha ovilela mixankiho, mwaha woowi nnooreelihiwa nivahiwaka okumi woohimala muhoolo!​—Yak. 1:12.

Eyaakha evinre, atthu yaarwiiye Wuupuwelela okhwa wa Yesu yaari 19.241.252. Tthiri etthu yoolipiha owoona anamunceene anvuwihaka Yehova ni Yesu Kristu ni arwaaka mmuthukumano ola wootepexa otthuneya wa atthu a Muluku! Okathi wa Wuupuwelela okhwa wa Yesu, imilyau sinceene sa anna yaahihakalala mwaha woorumeela ntoko mapioneero ookhaliherya mweeri wa Março ni Abril. Nla ntakiheryo nooloka! Niireke nyuwo khamunihakalala osuwela wira anna anikela opioneero wookhaliherya okathi mutokweene a esirkwitu onixukurya awe muloko aya, pooti owiriyana muthukumano wotheene wa mapioneero, hata ahixukuriwaka myeeri sa Março ni Abril? Anna arina miruku somunepani, anniiwexexa otthuneya waya ovikaniha oluttuweliwa muteko woolaleerya ni miteko sa mmulokoni. Oluttuweliwa miteko sa Muluku onninikhaliherya ovikaniha okhala oolipa ni oohittikinyeya ni okhoottela soweeha sa Satana siniphavela ohonona waamini wahu ni onihapuxa.​—1 aKor. 15:58.

Ti voohakalalaiha osuwela wira mwaakha wa muteko ovinre atthu 277.344 ahiivahererya wa Yehova khubatiziwa, ni vano ari ephiro ya okumi ni annaya a olumwenku wotheene. (Math. 7:13, 14) Anna awo a niinano annitthuneya okhaliheriwa wira ekhale ‘oolipa mowamini’. (aKol. 2:7) Nvikanihe olipihana mukina ni mukhwaawe wira nvilele mpakha wanikisa. (Math. 24:13) “Mwalipiheke murima ale ahilimpe, mwakhaliheryeke ale òlosowa, mwavileleke atthu othene”. (1 aTes. 5:14) Nto, khula mmosa a hiyo ‘alompeke vohihiyererya’, ariki: ‘Omwene anyu orwe’.​—1 aTes. 5:17; Math. 6:10.

Ninnilipelela wira onimoosivelani omusoma Anuário ola. Xontte, musuwele wira ninnimphenta khula mmosa a nyuwo mukhanle arumeyi a Yehova.

Anninyu,

Nikhuuru Noolamulela na Anamoona a Yehova

[Ipaaxina soohikhala etthu 4,6]