Makoho Anikohiwa ni Ale Anisoma Irevista Sahu

Akhala wira mulopwana ni muthiyana ahikhanle amusi ni ahithelanne anniviriha ohiyu wotheene ari ene hoothe voohikhala mathowa ooloka, niireke eyo enooniherya wira aapaka etampi ni ehaana opakiwa ekomisau wira aphukeliwe?

Aayo. Oviriha ohiyu wotheene ori ene ni mutthu ohithelanne awe voohikhala mathowa ooloka, enooniherya wira atthu awo aapaka etampi. Nto yaahikhale mathowa ooloka awiirinhe opaka eyo, ehaana opakiwa ekomisau wira aphukeliwe.​—1 aKorinto 6:18.

Nikhuuru na axitokweene nihaana otokosa saana mwaha owo wira awehe akhala wira vannireerela opaka ekomisau. Mwa ntakiheryo, niireke atthu awo anoonamorari? Niireke axitokweene aatoko waavaha miruku voohimya sa mweettelo aya? Exeeni yaawiirinhe oviriha ohiyu wotheene? Niireke yaahimpaka palano vahinatthi? Niireke yaaroolakela aahiiso yookhala etthu yaakhumelenle vanatthuneya oviriha ohiyu hoothe? (Musuweli 9:11) Yaarumpe opuro xeeni? Okhala wira makhalelo annivirikana, axitokweene ahaana otokosa saana ahinatthi opaka yoothanla.

Nuumala nikhuuru na axitokweene ovarerya saana mwaha owo, ahaana oweha akhala wira vannitthuneya opaka ekomisau wira atthu awo aphukeliwe.