2 NOWE
“Mwaha wa waamini wawe, aahilamula olumwenku”
NUUMALA Enooki okhwa, malaikha makina a wiirimu khiyaamwiiwelenle Muluku. Malaikha awo ootakhala, yaahipacerya osiveliwa ni athiyana valaponi, tivonto, yaahiikhaliha apinaatamu wiira yaathele athiyana awo. Nto malaikha awo yaahaayara anamwane oorakama ni a ikuru. Nave anamwane awo yaari ootakhala murima ni yaanipaka itthu sinceene soohiloka. Mwaha wa mweettelo aya wootakhala, waahiwiiriha atthu anceene yaakhala valaponi, otepa otakhala murima ovikana khalai. Nto Muluku aahoona wiira apinaatamu aapattunxe awe valaponi, murima aya waahihononeya. Masi aahikhala mulopwana mmosa ahaapaka itthu iyo. Owo aari musulwaawe Enooki, aitthaniwa Nowe.
Nowe aari naxariya ntoko Enooki. Biibiliya onihimya wiira: “Nowe aaneetta ni Muluku eekeekhai”, eyo piiyo, aanimuroromela Muluku. Muhoolo mwaya, Nowe aahithela. Nto owo ni amwaarawe yaahiwiixuttiha anaaya omwiiwelela Yehova. Eyo yaahiiriha emusi ele ohipaka itthu sootakhala saapakiwa ni atthu a okathi ole.
Nihiku nimosa, Yehova aahimuleela Nowe wiira aamwaapwetexa atthu ootheene yaapaka itthu sootakhala, masi atthu yaapaka itthu sooloka khiyaarowa opwetexiwa. Yehova aahimuruma Nowe opaka ekalawa yuulupale aahiiso pakiti wiira atthu ooreera murima yoopowe. Nowe khaatonko oweha epula ya mutaaseke yeeyo Yehova aahimmye awe wiira yaamurupa. Nave khaatonko opaka etthu yuulupale ntoko ekalawa. Masi okhala wiira owo aanikupali sooleiherya sa Yehova, aahipacerya opaka.
Nowe ni atthu a etthoko awe yaanilupatthiwa ni awanani oowoopiha, yaawo yaanyokha ihapari yaalaleya aya ni muteko yaavara aya
Wiira avare muteko ole, Nowe ni emusi awe yaahaana olipa murima. Vanikhala wiira awo yaanilupatthiwa vanceene ni oveehiwa. Malaikha ale yaakhurunwe wiirimu yaari a ikuru ni oowoopiha, nave anaaya yaari ootakhala ni waanaasivela waahaaxa atthu akina. Masi eyo khiyaamukhoottihenrye Nowe, amwaarawe, anaawe araru ni axaaraya, omwiiwelela Yehova. Nave yaahiviriha okathi munceene, woonasa wene iyaakha 50 atthu ale 8 yiimananihaka opaka ekalawa.
Muteko wa Nowe khahiyo waari opaka ekalawa paahi, masi aahikhalana muteko mukina wa waahimeerya atthu sa etthu yaarowa wiiraneya. Nto muhoolo mwaya, Nowe aahisuweliwa okhala mutthu “aalaleya exariya”. Nave atthu a etthoko awe yaanitthara ntakiheryo nawe nooloka yaalopolaka atthu. Masi khuuvo mutthu aawiriyana, hata amusi awe Nowe. Atthu ale khiyaaphavela ohiya opaka itthu sootakhala. Vannooneya oratteene wiira mulopwana ole oowaamini, aahivirikana vanceene ni atthu a okathi ole. Tivonto, omuhimyaka Nowe, Biibiliya onihimya wiira: “Mwaha wa waamini wawe, aahilamula olumwenku”.
Nowe vamosa ni atthu a etthoko awe yaahimaliha opaka ekalawa ele yuulupale, vano awo yaahaana ohela-mo soolya, maasi ni itthu sikina saarowa waakhaliherya awo ni inama yaarowa aya ohela mukalawani. Nuuvira okathi yaahiiraneya etthu yootikiniha. Etthu ene tiila: Inama saahipacerya orwa mekhaya-ru mpakha nipuro yaari ekalawa. Biibiliya onihimya wiira inama “iyo saahikela piili-piili, yoolopwana ni yoothiyana”.
Muluku aahimuleela Nowe wiira aahaana okela mukalawani hoothe ni atthu a etthoko awe, mwaha woowi nuuvira mahiku 7, yampacerya orupa epula yuulupale. Vannooneya wiira atthu a etthoko ele khiyaareere waatteliwa miteko, maana yaahaana oroiha mukalawani mireerelo ni soolya ni opweha khula etthu opuro aya. Okathi atthu akina yaaweha aya akhalelaka nthiti ovara muteko ole, awo yaamutepa waaveeha. Nuumala atthu ale omaliha ohela itthu sootheene mukalawani, mwaneene ene Yehova, aahiwala mukhora wa ekalawa ele. Woonasa wene, eyo yaahiwiiriha atthu ale ohiya waaveeha! Vano yaahipacerya orupa epula yinceene yeeyo yaavirinhe mahiku 40! Maasi yaahipacerya osareya elapo yootheene mpakha miyaako omiryeya. Nto Yehova aahimaliha otakhala wootheene valaponi.
Nowe ni atthu a etthoko awe, yaahikhala mukalawani ovikana eyaakha emosa. Nuumala-vo, maasi a epula ya mutaaseke yaahipacerya ovukuwa vakhaani-vakhaani. Nuuvira okathi, ekalawa ele yaaheemela vasulu va mwaako. Moottharelana, Yehova aahimuleela Nowe wiira okhumele ota. Okathi Nowe ni atthu a etthoko awe yaakhumme aya mukalawani, yaahinvaha mikuttho Yehova amuxukhurelaka mwaha wa owoopola. Yehova aahihimya wiira khaarowa otthikela wiiriha orupa epula ya mutaaseke, tivonto, aahikumiherya ekhweyi ntoko esinaale ya etthu aahimmye awe.
Atthu ootheene akhanle mpakha olelo-va, anikhuma osuulu wa Nowe ni atthu a etthoko awe. Tivonto nihaana omuxukhurela Nowe ni atthu a etthoko awe mwaha wa olipa waya murima, ahittharaka mweettelo wa atthu ale ootakhala murima.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Nowe oonihenrye sai olipa murima?
Mutokose itthu sikina
1. Elapo yaari sai ehinatthi epula ya mutaaseke? (Owehaweha 01/03/2002 epaax. 5 etti. 3 mpakha epaax. 6 etti. 4)
2. Okathi xeeni Muluku aamulenle awe Nowe wiira oteke ekalawa? Okathi xeeni Nowe aasuwenle awe nihiku yaarowa aya opacerya epula ya mutaaseke? (Owehaweha 15/04/2012 epaax. 23 itti. 5-8)
3. Xeeni ninreerela ahu okupali wiira epula ya mutaaseke yootoko orupa? (Makoho Biibiliya onaakhula awe mwaha 156 itti. 2-5, ekaaxa) A
Historic Collection/Alamy Stock Photo
Eteseenyu A: Ethale ya nloko hindu, enihimya wiira mulopwana mmosa aahipaka ekalawa wiira oopowe okathi wa epula ya mutaaseke. Nuuvira epula ya mutaaseke, owo aahivaha mukuttho. Nuumala-vo, aahikhala paapa a apinaatamu ootheene
4. Exeeni yiiraneyale iyaakha 100 nuumala epula ya mutaaseke, nave mixankiho xeeni woonasa wene samphwannye Nowe? (Perspicaz vol. 2 “Nowe” etti. 13) B
Eteseenyu B
Muupuwelele itthu mwiixuntte anyu
Mahiku ala ninkhala ahu, anlikana sai ni mahiku a Nowe? (Math. 24:36-39)
Exeeni mwiixuntte anyu ni ntakiheryo na Nowe sa efaita erina aya . . .
ompaka palano ooloka? C
Efootu C
okhala mutthu onivara muteko ni nthiti? D
Efootu D
okhala mutthu oopixa murima? E
Efootu E
Munrowa otakiha sai olipa murima wa Nowe?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Nowe nuumala ohihimuxiwa?
Mwiixutte itthu sikina
Nwehe moota muhooleli a etthoko oniimananiha awe otthara ntakiheryo na Nowe. Nwehe eviitiyu eni:
Mwaatakiheke atthu oowaamini, ohiya oohaamini— Nowe, ohiya anamwaattamanani awe (2:57)
Mwaakhaliherye aniinyu wiixutta etthu ni ntakiheryo na Nowe. Musome mwaha oni:
“Nowe aanimuroromela Yehova” (Matakiheryo a myaha sa mbiibiliyani mwaha 18)