MAKOHO ANIKOHIWA NI ALE ANISOMA IREVISTA SAHU

Mavarihano xeeni manli murummwa Paulo aahimya awe ari Akalaasia 4:24?

Nuumala olavula sa waataana aarina awe Abrahamu ni Sara vamosa ni Agari, murummwa Paulo aahimmye so: “Itthu iya sinnitaphulela etthu ekina: Athiyana ala, anitaphulela mavarihano manli.” (Akal. 4:​22-24) Khalai, naakupali wiira mavarihano ala manli anithoonyerya nlamulo na waataana ni nivarihano nsya. Masi nuumala ovarerya saana iversiikulu iya, niphwannye wiira sintaphulela etthu ekina. Vanikhala wiira Paulo khahiyo aalavula nivarihano nsya, masi aalavula nivarihano Muluku aapanke awe ni Abrahamu. Nrowe niwehe itthu sinniiriha ohimya siiso.a

Paulo aahimyale wiira muthiyana Agari yoowo aari epottha, aari ntoko mwaako Sinayi. (Akal. 4:25) Agari aataphulela nlamulo na waataana, naapakiwe mwaakha wa 1513, Ohinatthi Kristu Orwa. (Okhu. 19:​5, 6) Okhala wiira khuuvo pinaatamu aawerya wiiwelela moomalela nlamulo, nto eyo yaaniwuupuxerya ayuda wiira yaari ipottha ya etampi. Nivarihano, naamwaakhaliherya aisarayeli, omusuwela Mesiya, yoowo aarowa owerya wiiwelela moomalela nlamulo nlo. Okathi Mesiya aavahale awe okumi awe, yoowo wahaarina etampi, aahikhaliherya wiira apinaatamu oottheka ataphuliwe etampi ni okhwa. (Akal. 3:​19, 24, 25) Nto nuumala Yesu omaleliha ele Muluku aaphavela awe, Nlamulo na Moise khinaavara-tho muteko. — Arom. 10:4.

Nave Paulo aahimyale wiira Agari aari oovirikana ni Sara, yoowo aari “muthiyana ootaphuwa, aayariwe mwaha wa natiri.” (Akal. 4:23) Moolumo ela, yaataphulela nivarihano Yehova aapanke awe ni Abrahamu. (Akal. 3:29; 4:​28, 30) Maphattuwelo 22:​18, Muluku aahitthokiherya nivarihano nno oriki: “Nave-tho, maloko ootheene a mulaponi anooreelihiwa mwaha wa osuulu anyu [Abrahamu], okhala wiira mookiwiriyana.”

Nivarihano Yehova aapanke awe ni Abrahamu, naahooniherya-tho itthu sikina saavarihana ni iye Yehova aaleihenrye awe wEedeni. (Maph. 3:15) Nivarihano nlo, ninninikhaliherya woona wiira “osuulu”, waarowa okhuma nloko na Abrahamu. Paulo aatthokihenrye wiira “osuulu” owo waathoonyerya otepexa wene Yesu Kristu. Nave “atthu a Kristu”, eyo piiyo, atthu oothanliwa 144 000, yaawo anrowa olamulelaka ni Yesu anniirela mpantta osuulu owo. (Akal. 3:​16, 29; Wis. 14:​1-3) Mwaha wa nivarihano Muluku aapanke awe ni Abrahamu, atthu animweemererya ni animwiiwelela Yesu, animwaakhela itthu sinceene sooreera.

Exeeni Paulo oniphavela awe oniixuttiha eversiikulu ela? Paulo aaphavela ohimya wiira ayuda a okathi ole, khiyaarowa ohiya okhala ipottha ntoko Agari, akhala wiira nlelo yaamuttharaka nlamulo na Moise. Masi akhala wiira yammweemererya Yesu Kristu yoowo aari “osuulu” wa Abrahamu, awo yaamukhala ootaphuwa ntoko Sara. Nave yaamutaphuliwa etampi ni okhwa. (Yoh. 8:​32-34) Masi akhala wiira khiyaarowa omweemererya Yesu, nlelo yaarowa wooniheryaka wiira khiyiiwexenxe yoolakela ya nlamulo, nenlo naaroiha wa Kristu.

Makristau manceene a oKalaasia Paulo aalepenle awe epaphelo ela, khahiyo yaari ayuda ni khiyaatonko otthara nlamulo. Makristau makina ayuda, yaaphavela wiira ale yaahaakhanle ayuda yaakenle ekristau, yiiweleleke nlamulo naahela muhina wunnuwihiwa. Paulo aahitthokiherya wiira opaka eyo yaarowa okhala ololo, okhala wiira khiyaapirisari-tho okhala epottha ya nlamulo. — Akal. 5:​1, 10-14.