9, 10. (a) Mapuro xeeni ooxankiha, Davidi ni anakhotto awe aakhala awe? (b) Xeeni vaareerela aya Nabali omuxukhurela Davidi ni anakhotto awe? (Nwehe-tho enoota eri ettima 10.)

⁹ Nabali aakhala muttetthe wa oMaoni, masi aahikhalana imatta sawe waattamela muttetthe wa oKarmelo.a Muttetthe ole waahikhala malaxi ooloka, waareerela oroiha olya ipwittipwitthi seiyo Nabali aarina awe saavikana 3.000. Masi waattamela opuro ole yaahikhala etakhwa yahaalimmwa. Mpantta onikhuma epheyo yaahikhala etakhwa yuulupale ya oParani yahaakhanle malaxi wala miri. Mpantta onikhuma nsuwa waari Ephareya ya Maakha nto waahikhala myaako ni makhuku manceene. Okhala mapuro ntoko ale waari voovila wa Davidi ni atthu awe, tivonto yahaana oxaya wira aphwanye etthu yoolya, masi yaanikumanana mixankiho sinceene. Ikwaha sinceene awo yaanikumanana amiravo yaakukhula inama sa mulopwana oothaaciri Nabali.