Tthiri ti vooloka omusoma Biibiliya. Masi ikwaha sikina, khivanikhweya. Okathi mukina pooti wira munnuupuwela akhala wira munoowerya ohihiya omusoma Biibiliya. Xeeni vari aya vooloka ohihiya omusoma Biibiliya? Etthu xeeni enrowa wookhaliheryani ohihiya omusoma Biibiliya hata wooxankihakani omusoma?

1. Xeeni vari aya vooloka omusoma Biibiliya?

“Nuulumo na Muluku nikumi, ni nookhalana owerya wuulupale”. (aHeeberi 4:12) Ti vooloka omusoma Biibiliya, maana onninikhaliherya osuwela muupuwelo wa Muluku ni moota onnoonela awe. Nave Biibiliya onimookhaliheryani osuwela itthu isya, okhalana ankhili ni nlipelelo. Nave-tho, Biibiliya onimookhaliheryani okhala mpatthani a Yehova. Tthiri Biibiliya ookhalana owerya wuulupale! Owo onimookhaliheryani okhalana okumi wooloka. Tivonto muhihiye omusoma Biibiliya.

2. Xeeni vari aya vooloka ovaha efaita ele Biibiliya oniixuttiha awe?

Itthu Biibiliya oniixuttiha awe siri ntoko mihakhu sa efaita yinceene. Tivonto Biibiliya onnitumererya awe othuma ekeekhai ni ohitumiha. (Miruku 23:23) Okhala wira ninninvaha efaita yinceene itthu Biibiliya oniixuttiha awe, tivonto nniimananiha ahu ohihiya omusoma hata nikumanaka mixankiho.—Musome Miruku 2:4, 5.

3. Yehova onrowa wookhaliheryani sai ohihiya omusoma Biibiliya?

Yehova, Mpattuxa oowerya sotheene ni Mpatthani anyu. Owo onnoosuwelani oratteene ni oniphavela wookhaliheryani omusuwela. Nto Yehova onimoovahani “ophavela ni owerya ovara muteko”. (Mmusome aFilipi 2:13.) Akhala wira okathi mukina vannoovilani omusoma Biibiliya ni weettela ele muniixutta anyu, Yehova onimookhaliheryani. Nave akhala wira khamurina ikuru wira muxintte aahiiso nvilele mixankiho, Yehova onrowa okhala vakhiviru vanyu wira ookhaliheryeni. Okathi wotheene, munvekeleke Yehova wira ookhaliheryeni ohihiya omusoma Biibiliya.—1 aTesaloonika 5:17.

MWIIXUTTE ITTHU SIKINA

4. Mooniherye wira munnivaha efaita omusoma Biibiliya

Okathi mukina, ninnaatteliwa miteko nihinakhalana okathi woomusoma Biibiliya. Nto etthu xeeni enrowa onikhaliherya? Mmusome aFilipi 1:10, nuumala-vo mwaakhule makoho anittharelana:

• Itthu xeeni munoona anyu okhala “sootepa oreerela” mookumini?

• Munrowa wooniherya sai wira munnivaha efaita omusoma Biibiliya?

1. Akhala wira munipacerya ohela mihaava mpaltini, nuumala-vo munahela maluku, maluku awo khanrowa okela

2. Masi akhala wira munrowa opacerya ohela maluku, mihaava iyo sotheene sinookela. Mwa enamuna emosaru, akhala wira munoopaceriha ohela mookumini mwanyu itthu “sootepa oreerela”, munookhalanaka okathi wira nvareke itthu sikina

Omusoma Biibiliya onninikhaliherya omusuwela Muluku ni omukokhorela. Mmusome Matheyo 5:3, nuumala-vo mwaakhule nikoho ninttharelana:

• Mareeliho xeeni ninrowa ahu ophwanya akhala wira nnoovaha efaita omusoma Biibiliya?

5. Muhiweemererye atthu akina woohiihani omusoma Biibiliya

EVIIDIYU: Ovilela Waya Wookumiherya Mireerelo (5:22)

• Eviidiyu niwenhe ahu, apatthani ni amusi a Francesco yoonenle sai vaavo aalenle awe ele iixutta awe?

• Ovilela wawe waakumihenrye mireerelo xeeni?

Mmusome 2 Timootheyo 2:24, 25, nuumala-vo mwaakhule makoho anittharelana:

• Amusi ni apatthani anyu anoonela sai ele muniixutta anyu?

• Moovarihana ni iversiikulu iya, etthu xeeni munrowa anyu opaka akhala wira atthu akina animoohiihani omusoma Biibiliya? Mwaha wa xeeni?

6. Mukupaliki wira Yehova onimookhaliheryani

EVIIDIYU: Yehova Onninikhaliherya Opaka Marukunuxo Mookumini Mwahu (3:56)

• Ntoko eviidiyu yoonihenrye aya, marukunuxo xeeni Jim aapanke awe wira omuhakalaliheke Yehova?

• Yowiiraneya awe, etthu xeeni yoosivenleni?

Mmusome aHeeberi 11:6, nuumala-vo mwaakhule makoho anittharelana:

• Yehova onrowa owiiriha exeeni “ale animwaavya ni murima aya wotheene”, niire so, aniphavela omusuwela ni omuhakalaliha?

• Yehova onoonela sai vaavo onoowehaaweni mwiimananihaka omusoma Biibiliya?

IPONTO SUULUPALE

Ekeekhai wira omusoma Biibiliya khivanikhweya ni wookhalana mixankiho. Masi opaka eyo enimookhaliheryani ohakalala mahiku otheene. Nto muhihiye omuroromela Yehova, owo onimooreelihani.

Wuuluula

• Xeeni munoona anyu wira itthu Biibiliya oniixuttiha awe mihakhu sa efaita yinceene?

• Munrowa wooniherya sai wira munnivaha efaita “itthu sootepa oreerela”?

• Xeeni vanireerela aya onvekela Yehova wira ookhaliheryeni ohihiya omusoma Biibiliya?

NWEHE ITTHU SIKINA

Musome itthu xexe saakhalihenrye atthu anceene orumeela oratteene okathi aya.

“Murumeeleke Saana Okathi Anyu” (Nvenye!, Feverero 2014)

Iyawe Grace khaasuwela etthu yaamwiiriha mwaarawe omukokhorela Muluku. Nwehe moota Yehova aamukhalihenrye awe Grace.

Yehova Onninivaha Ikuru Wira Nivilele Khula Muxankiho (5:05)

Nwehe moota mulopwana mmosa aakhaliheriwe awe mwaha wa ovilela wa mwaarawe.

Kaaheehererya Ekeekhai (6:30)

Okathi mukina Anamoona a Yehova annootheriwa wira annihonona imusi. Masi niireke eyo ekeekhai?

“Niireke Anamoona a Yehova Anoohonona Wala Animwiiraaniha Imusi?” (Mwaha ori va jw.org)

Otheene ahu nihaana opaka soothanla. Soothanla sikina pooti oniphwanyiha mireerelo aahiiso ohonona ompatthani ahu ni Yehova. Mwa ntakiheryo, hiyo nihaana othanla opuro ninrowa ahu okhalaka, moota woophwanya musurukhu, nnoothela wala otheliwa ni ohithela aahiiso ohitheliwa. Vaavo nimpaka ahu soothanla sooloka, ninnihakalala ni ninnimuhakalaliha Yehova.

1. Munrowa omurumeela sai Biibiliya wira mpake soothanla sooloka?

Muhinatthi opaka soothanla, munvekeleke Yehova wira ookhaliheryeni ni mutokoseke mBiibiliyani wira nwehe etthu yoopaka voohimya sa mwaha owo. (Musome Miruku 2:3-6.) Ikwaha sikina, Yehova onninivaha malamulo ooluluwanya okathi nimpaka ahu soothanla. Nto akhala wira munootthara malamulo awo, munoopaka yoothanla yooloka.

Masi ankhi akhala wira Biibiliya khorina nlamulo nooluluwanya ninhimya etthu mukhanle anyu oopaka? Hata vari siiso, Yehova oniphavela oweettihani “ephiro ela erinanyu otthara”. (Yesaya 48:17) Moota xeeni? MBiibiliyani, aakhala malakiheryo akhanle oowookhaliheryani. Malakiheryo a mBiibiliyani, ikeekhai sinniixuttiha ele Yehova onuupuwela awe ni onoonela awe myaha sikina. Okathi mukina, hiyo ninniwerya woona muupuwelo wa Yehova okathi ninsoma ahu yowiiraneya ya mutthu mmosa onilavuliwa mBiibiliyani. Nto okathi ninsuwela ahu moonelo wa Yehova, ninnipaka soothanla sinimuhakalaliha.

2. Itthu xeeni munireerela anyu othokorerya muhinatthi opaka soothanla?

Biibiliya onihimya wira: “Mulipa-ànkhili onniwehaweha mwettelo awe wothene”. (Miruku 14:15) Eyo enitaphulela wira muhinatthi opaka yoothanla, muhaana wuupuwela itthu sootheene sinihela muhina yoothanla eyo. Nto okathi munithokorerya anyu yoothanla eyo, mwiikoheke so: ‘Malakiheryo xeeni a mBiibiliyani anivarihana ni mwaha ola? Kiireke yoothanla ela, enookiphwanyiha murettele wa mmuupuweloni? Kiireke yoothanla aka khenrowa waakumiherya mixankiho atthu akina?’ Nikoho nikina na faita munireerela anyu othokorerya tinla: ‘Kiireke yoothanla aka enoomuhakalaliha Yehova?’—Otumererya 32:29.

Yehova ookhalana ehakhi ya onileela ele eri yooloka ni yoohiloka. Okathi ninsuwela ahu oratteene malamulo ni malakiheryo a Yehova, hiyo ninnimwiiwelela ni ninniixuttiha murima ahu. Murima, etthu niyaraniwe ahu ennisuweliha etthu yooloka ni etthu yoohiloka. (aRoma 2:14, 15) Murima wowiixuttihiwa saana, onoonikhaliherya opaka soothanla sooloka.

MWIIXUTTE ITTHU SIKINA

3. Mmweemererye Biibiliya woolakiheryani

EVIIDIYU: Mweemererye Weettihiwa ni Malakiheryo a MBiibiliyani (5:54)

• Othanla mootaphuwa exeeni?

• Xeeni Yehova ohalaka onivaha othanla mootaphuwa?

• Etthu xeeni Yehova onivanhe awe ennikhaliherya opaka soothanla sooloka?

Wira nwehe ntakiheryo nimosa na malakiheryo a mBiibiliyani, mmusome aEefeso 5:15, 16. Nuumala-vo, nwehe moota mukhanle anyu ‘oorumeela oratteene okathi anyu’ wira . . .

• mmusomeke Biibiliya khula nihiku.

• mukhale mulopwana oothela, muthiyana ootheliwa, namuyari aahiiso mwaana ooloka.

• muroweleke mithukumano sa mmulokoni.

4. Mwiixuttihe murima anyu wira mpakeke soothanla sooloka

EVIIDIYU: “Mukhalaneke Murima Wooloka” (5:13)

• Eviidiyu niwenhe ahu, itthu xeeni murokora aapanke awe wira okhalane murima wooloka ni opaka soothanla sinimuhakalaliha Yehova?

Xeeni vari aya voohiloka waavekela atthu akina onipakela soothanla? Mmusome aHeeberi 5:14, nuumala-vo mwaakhule makoho anittharelana:

• Waavekela atthu akina wira apake yoothanla ahu, etthu yookhweya. Masi etthu xeeni khula mmosa a hiyo onireerela awe osuwela?

• Etthu xeeni enrowa wookhaliheryani wiixuttiha murima anyu ni opaka soothanla sooloka?

5. Muttittimiheke murima wa atthu akina

Atthu otheene toovirikana, tivonto anipaka aya soothanla soovirikana. Munrowa wooniherya sai wira munnittittimiha murima wa atthu akina? Nrowe niwehe matakiheryo manli:

Ntakiheryo 1: Murokora oomusivela opaka makeyaaxe, onnithaamela muloko anna ni arokora anceene ahinisiveliwa aya waaweha athiyana apanke ene makeyaaxe.

Mmusome aRoma 15:1 ni 1 aKorinto 10:23, 24, nuumala-vo mwaakhule makoho anittharelana:

• Moovarihana ni soolepa iya, murokora owo ohaana opaka exeeni? Munrowa opaka exeeni akhala wira muri ni mutthu onoona okhala voohiloka opaka etthu murima anyu oniweemereryaayani opaka?

Ntakiheryo 2: Munna onnisuwela wira Biibiliya khonikhoottiha owurya eviinyu, masi owo onnithanla ohiwurya eviinyu. Vano nihiku nimosa onnilattuliwa orowa olya etthoko ya munna mmosa. Nto onaaweha anna ni arokora akina awuryaka eviinyu.

Mmusome Musuweli 7:16 ni aRoma 14:1, 10, nuumala-vo mwaakhule makoho anittharelana:

• Moovarihana ni soolepa iya, munna owo ohaana opaka exeeni? Munrowa opaka exeeni akhala wira muri ni mutthu onipaka etthu, masi murima anyu onoona wira khivanireerela opaka?

Etthu xeeni enrowa wookhaliheryani opaka soothanla sooloka?

1. Munvekeleke Yehova wira ookhaliheryeni osuwela etthu yoopaka.—Yakobo 1:5.

2. Mutokoseke mBiibiliyani ni iliivuru sahu sinimutthokiherya Biibiliya malakiheryo anivarihana ni yoothanla anyu. Nave mwaavekeleke miruku makristau arina waataana woolipa ni Yehova.

3. Muupuweleke moota yoothanla anyu enivarihana aya ni murima anyu ni murima wa atthu akina.

IPONTO SUULUPALE

Wira nipake soothanla sooloka, nihaana osuwela moota Yehova onoonela awe mwaha owo ni oweha akhala wira yoothanla ahu enimwaakhaliherya aahiiso waakumiherya mixankiho atthu akina.

Wuuluula

• Munrowa opaka sai soothanla sinimuhakalaliha Yehova?

• Munrowa wiixuttiha sai murima anyu?

• Munrowa wooniherya sai wira munnittittimiha murima wa atthu akina?

NWEHE ITTHU SIKINA

Munrowa opaka sai soothanla sinrowa olipiha waataana wanyu ni Muluku?

“Mpakeke Soothanla Sininvuwiha Muluku” (Owehaweha, 15 a Abril, 2011)

Mwiixutte itthu sikina sa moota Yehova onnivaha awe miruku.

Yehova onniweettiha Atthu Awe (9:50)

Nwehe etthu yaamukhalihenrye mulopwana mmosa opaka yoothanla yooxankiha.

Yehova Onninivaha Itthu Sootheene Sooloka (5:46)

Nwehe etthu nikhanle ahu oopaka wira nimusivelihe Yehova akhala wira khonnivaha nlamulo nooluluwanya.

“Niireke Okathi Wootheene Muniphavela Nlamulo Nooluluwanya na MBiibiliyani?” (Owehaweha, 1 a Dezembro, 2003)