² Biibiliya onnihimya ekeekhai emosa ehinivaanyiwa oriki: “Onetta n’asuweli onokhala musuweli, onetta n’alolo onophwanya otakhaliwa”. (Miruku 13:20) Moolumo ala a miruku khanaahimya atthu yaale mutthu onikumana awe paahi. Maana nuulumo noowi ‘onetta ni’, nintaphulela wataana ni mutthu.a Elavulaka sa eversiikulu ela, eliivuru emosa enitthokiherya myaha sa Biibiliya enihimya so: “Weetta ni mutthu onihela muhina omphenta ni wiiraana ni mutthu owo”. Niireke nyuwo khamunikupali wira ikwaha sinceene ninnisiveliwa waatakiha atthu anaaphenta ahu? Okhala wira ninnaaroromela vanceene atthu yaale anaaphenta ahu, awo anoowerya oniixuttiha itthu sinceene, sooloka wala soohiloka.