Ihapari suulupale sa mBiibiliyani ti Omwene wa Muluku. Yehova onrowa orumeela Omwene owo wira iirihe elapo yotheene okhala eparayiisu. Masi Omwene wa Muluku exeeni? Ninsuwela sai wira Omwene onnilamulela? Etthu xeeni Omwene opanke aya? Omwene onrowa opaka exeeni muhoolo? Yoosoma ela ni soosoma piili sinittharelana, ninrowa waakhula makoho awo.

1. Omwene wa Muluku exeeni ni ti pani ori Mwene aya?

Omwene wa Muluku ekuvernu epakiwe ni Yehova. Mwene aya ti Yesu Kristu ni onnilamulela wiirimu. (Matheyo 4:17; Yohani 18:36) Biibiliya, onihimya wira Yesu “onrowa olamulela ntoko Mwene mahiku otheene”. (Luka 1:32, 33) Okhala wira ti Mwene a Omwene wa Muluku, Yesu onrowa waalamulelaka atthu otheene valaponi.

2. Atthu xeeni anrowa olamulelaka ni Yesu?

Yesu khonrowa olamulelaka mekhawe. “Atthu a mahimo otheene, ni a mattaava otheene, ni a makhuli otheene ni a maloko otheene . . . anrowa okhala mamwene wira elamuleleke elapo” ni Yesu. (Wiisuupulula 5:9, 10) Atthu akavi anrowa olamulelaka ni Kristu? Okhuma okathi Yesu aarwiiye awe valaponi, imilyau sinceene sa atthu yaahikhala atthareli awe, niire so, makristau. Niireke makristau otheene anrowa olamulelaka ni Yesu? Nnaari. Maana makristau oothanliwa 144.000 paahi, tanrowa wiirimu wira yalamuleleke ni Yesu. (Mmusome Wiisuupulula 14:1-4.) Makristau makina anrowa okhalaka valaponi.—Esalimo 37:29.

3. Xeeni Omwene wa Muluku ori aya wooloka ovikana ikuvernu sa apinaatamu?

Hata anamalamulela a apinaatamu apakaka itthu sooloka, awo khaniwerya opaka itthu sootheene aniphavela aya. Woonasa wene, onniphiya okathi anrantteliwa aya ni anamalamulela akina. Nto awo anaaranttela pooti okhala oowiitthuna ni ohiphavela waakhaliherya atthu. Masi namalamulela a Omwene wa Muluku, khonrowa orantteliwa ni mutthu mukina. Muluku “onokumiherya omwene ohinrowa omala, nnákhala oweriwa n’umwene mukina”. (Daniyeli 2:44) Yesu onrowa olamulelaka elapo yotheene ni onrowa waathokoreryaka mwa xariya atthu otheene. Nave Yesu mutthu oophenta, ooreera murima ni a xariya. Nave-tho onoowiixuttiha atthu otheene waathokorerya akhwaaya mwa enamuna emosaru, niire so, moophenta, mooreerela murima ni mwa xariya.—Mmusome Yesaya 11:9.

4. Omwene orina owerya woolamulela elapo yotheene

Owerya Yesu Kristu orina awe, onnaavikana anamalamulela otheene a apinaatamu akhanle ni yaakhanle khalai. Mmusome Matheyo 28:18, nuumala-vo mwaakhule nikoho ninttharelana:

• Owerya Yesu orina awe ni owerya wa anamalamulela a apinaatamu arina aya ovirikanne sai?

Anamalamulela a apinaatamu, animakela oturukiwa ni anilamulela mpantta mmosa paahi wa elapo. Masi ankhi Omwene wa Muluku? Mmusome Daniyeli 7:14, nuumala-vo mwaakhule makoho anittharelana:

• Xeeni vari aya vooloka osuwela wira Omwene wa Muluku khonrowa ‘opwetexiwa’?

• Xeeni vari aya vooloka osuwela wira Omwene wa Muluku onrowa olamulelaka elapo yotheene?

5. Anamalamulela a apinaatamu annirantteliwa

Xeeni Omwene wa Muluku onrowa aya oranttela ikuvernu sa apinaatamu? Nwehe EVIIDIYU, nuumala-vo mwaakhule nikoho.

EVIIDIYU: Omwene wa Muluku Exeeni?—Eviidiyu yaamukhaani. (1:41)

• Ikuvernu sa apinaatamu sinikumiherya mixankiho xeeni?

Mmusome Musuweli 8:9, nuumala-vo mwaakhule makoho anittharelana:

• Munoona wira Omwene wa Muluku ohaana tthiri oranttela ikuvernu sa apinaatamu? Mwaha wa xeeni?

6. Anamalamulela a Omwene a Muluku annisuwela makhalelo ahu

Mwene ahu Yesu Kristu, ootoko okhala valaponi. Nto “onnisuwela otteettheya wahu”. (aHeeberi 4:15) Nave Yehova ohaathanla alopwana ni athiyana oororomeleya 144.000 wira yalamuleleke ni Yesu. Awo “atthu a mahimo otheene, ni a mattaava otheene, ni a makhuli otheene ni a maloko otheene”.—Wiisuupulula 5:9.

• Munoonela sai osuwela wira Yesu ni ale anrowa olamulelaka ni yena annisuwela makhalelo ahu ni mixankiho sahu? Mwaha wa xeeni?

7. Malamulo a Omwene wa Muluku toolokexa ovikana malamulo a ikuvernu sa apinaatamu

Ikuvernu sinnipaka malamulo wira saakhapeleleke ni waakhaliherya atthu. Nave Omwene wa Muluku wookhalana malamulo. Mmusome 1 aKorinto 6:9-11, nuumala-vo mwaakhule makoho anittharelana:

• Munoonela sai, elapo yaarowa okhala sai vaakhanle wira atthu otheene annitthara malamulo a Muluku?a

• Munoona wira Yehova ookhalana ehakhi ya waavaha atthu malamulo wira yeetteleke? Mwaha wa xeeni?

• Etthu xeeni enooniherya wira atthu ahiniiwelela malamulo a Muluku pooti opaka marukunuxo?—Nwehe eversiikulu 11.

IPONTO SUULUPALE

Omwene wa Muluku ekuvernu yeekeekhai eri wiirimu yeeyo enrowa olamulelaka valaponi.

Wuuluula

• Tani anrowa okhala anamalamulela a Omwene wa Muluku?

• Xeeni Omwene wa Muluku ori aya woolokexa ovikana ikuvernu sa apinaatamu?

• Itthu xeeni Yehova oniphavela awe wira apakeke atthu anrowa wiirelaka mpantta Omwene awe?

NWEHE ITTHU SIKINA

Nwehe itthu Yesu iixuttinhe awe voohimya sa opuro ori ya Omwene wa Muluku.

“Niireke Omwene wa Muluku Etthu Eri Vamurimani?” (Mwaha ori va jw.org)

Xeeni Anamoona a Yehova aniiwelela aya Omwene wa Muluku ovikana ikuvernu sa apinaatamu?

Awo Anniiwelela Omwene wa Muluku (1:43)

Nwehe ele Biibiliya onihimya awe voohimya sa atthu 144.000, Yehova aathanlale awe wira yalamuleleke ni Yesu.

“Tani Anirowa Wiirimu?” (Mwaha ori va jw.org)

Etthu xeeni yaamwiirinhe muthiyana mmosa aatthukweliwe mukhatteya woona wira Omwene wa Muluku paahi tonrowa omaliha mixankiho sa moolumwenkuni?

“Kaaphavela Omaliha Ohixariya” (Nvenye!, Novembro 2011)

Yesu aahaaleela atthareli awe wira “nyuwo khamunlikana ni atthu a olumwenku ola”. (Yohani 15:19) Eyo enihela muhina ohiirela mpantta elapo, niire so, ohiirela mpantta epoliitika ni ikhotto siniiraneya moolumwenkuni. Ohimya ekeekhai, khivanikhweya okathi wootheene ohiirela mpantta olumwenku. Woonasa wene, mwaha wa ohiirela mpantta olumwenku, atthu akina pooti oniveeha. Etthu exeeni enrowa onikhaliherya ohiirela mpantta olumwenku ni ohihiya ororomeleya wa Yehova Muluku?

1. Makristau eekeekhai anoonela sai ikuvernu sa apinaatamu?

Makristau eekeekhai, annittittimiha ikuvernu sa apinaatamu. Mwaha woopaka eyo, ninniiwelela ele Yesu onirumme awe oriki: “Munvaheke Seesari ekhanle ya Seesari”. Eyo enitaphulela wira ninniiwelela malamulo a elapo ninkhala ahu ni ninniliva mpoosito. (Marko 12:17) Biibiliya onihimya wira ikuvernu sa apinaatamu sookhala mwaha woowi Yehova teemerenrye. (aRoma 13:1) Nto ninnisuwela wira makhulupale a kuvernu aakhalana owerya. Nave ninnisuwela wira okhulupale aya khonivikana okhulupale wa Muluku, maana Muluku ni Omwene awe paahi tonrowa omaliha mixankiho sa apinaatamu.

2. Ninrowa wooniherya sai wira khanniirela mpantta elapo?

Nimutakihaka Yesu, hiyo khanniirela mpantta epoliitika. Nuumala oweha miiriirya aapanke awe, atthu a okathi awe yaaphavela omukhaliha mwene, masi Yesu aahikhootta. (Yohani 6:15) Mwaha wa xeeni? Etthu aahimmye awe muhoolo mwaya, enninikhaliherya osuwela etthu yaamwiirinhe okhootta. Yesu aahimmye so: “Omwene aka khonikhuma olumwenku yoola”. (Yohani 18:36) Nto okhala wira hiyo na awiixutti a Yesu, khanniirela mpantta elapo mwa inamuna soovirikana. Mwa ntakiheryo, hiyo khaninrowa okhottoni. (Mmusome Mikeya 4:3.) Ohiya-vo, hiyo khaninkhaliherya ni khaninvaanyiha epoliitika wala ahooleli a epoliitika. Nave ninnittittimiha elapo ninkhala ahu. Masi hata vari siiso, hiyo khaninkokhorela epantera, omwiipa hino nnakhala opaka itthu sikina saarowa wooniherya wira ninnikokhorela ilatarato. (1 Yohani 5:21) Iyo inamuna vakhaani paahi sinooniherya wira ninniroromela moomalela Omwene wa Muluku.

MWIIXUTTE ITTHU SIKINA

3. Makristau eekeekhai khaniirela mpantta elapo

Yesu ni awiixutti awe khayiirela mpantta elapo. Nto hiyo nihaana otthara ntakiheryo naya. Mmusome aRoma 13:1, 5-7 ni 1 Pedru 2:13, 14. Nuumala-vo, nwehe EVIIDIYU ni mwaakhule makoho.

EVIIDIYU: Makristau Eekeekhai Khaniirela Mpantta Olumwenku—Mpantta 1 (4:28)

• Xeeni vanireerela aya waattittimiha makhulupale a mulaponi?

• Ninrowa wooniherya sai wira ninnaattittimiha makhulupale a mulaponi?

Okathi wa ekhotto, atthu anceene anihimya wira khaniirela mpantta elapo. Masi annikhaliherya elapo emosa. Onitaphulela exeeni ohiirela mpantta elapo? Mmusome Yohani 17:16. Nuumala-vo, nwehe EVIIDIYU ni mwaakhule nikoho.

EVIIDIYU: Makristau Eekeekhai Khaniirela Mpantta Olumwenku—Mpantta 2 (3:11)

• Ontaphulela exeeni ohiirela mpantta olumwenku?

Ankhi akhala wira makhulupale a kuvernu anninivekela opaka etthu ehinivarihana ni malamulo a Muluku? Musome Miteko 5:28, 29. Nuumala-vo, nwehe EVIIDIYU ni mwaakhule makoho.

EVIIDIYU: Makristau Eekeekhai Khaniirela Mpantta Olumwenku—Mpantta 3 (1:18)

• Akhala wira malamulo a apinaatamu khanivarihana ni malamulo a Muluku, malamulo xeeni ninreerela ahu wiiwelela?

• Niireke wookhala okathi makristau eekeekhai anireerela aya ohiwiiwelela makhulupale a kuvernu?

4. Muhiireleke mpantta elapo mmuupuweloni ni itthu munipaka anyu

Mmusome 1 Yohani 5:21. Nuumala-vo, nwehe EVIIDIYU ni mwaakhule makoho.

EVIIDIYU: Makristau Ahaana Olipa Murima—Wira Ahiirele Mpantta Elapo (2:49)

• Eviidiyu niwenhe ahu, etthu xeeni yaamwiirinhe Ayenge ohiirela mpantta elapo ni okhootta okokhorela epantera?

• Munoona wira aahipaka yoothanla yooloka?

Itthu xeeni sikina sikhanle ooweehererya yoolakela ahu ya ohiirela mpantta elapo? Nwehe EVIIDIYU, nuumala-vo, mwaakhule makoho.

EVIIDIYU: Itthu Onniixuttiha Awe Owehaweha—Muhiireleke Mpantta Olumwenku Ola (5:16)

• Akhala wira elapo ahu enimweetta xooku ni elapo ekina, ninrowa owerya sai ohiirela mpantta elapo?

• Ninrowa owerya sai ohiirela mpantta elapo akhala wira mukhulupale a epoliitika onnihimya itthu sinrowa oniphwanyiha mireerelo aahiiso onikumiherya mixankiho?

• Itthu ninwiiwa ahu atthu akina ahimyaka ni ihapari sinilaleiwa, sinrowa ohonona sai ororomeleya wahu?

IPONTO SUULUPALE

Makristau eekeekhai anniimananiha ohiirela mpantta elapo mmuupuweloni, moolumo ni miteko anivara aya.

Wuuluula

• Ninrowa wooniherya sai wira ninniiwelela ikuvernu sa apinaatamu?

• Xeeni vanireerela aya ohiirela mpantta elapo?

• Itthu xeeni sikhanle ooweehererya ororomeleya wahu?

NWEHE ITTHU SIKINA

Itthu xeeni ninreerela ahu opaka wira nihiireleke mpantta elapo?

Yehova Khonikhala-khala Oninyanyalaka (3:14)

Xeeni atthu otheene a vatthokoni anireerela aya wiilokiherya vahinatthi wira awerye ovilela okathi aneehereriwa aya ni ikuvernu sa mulaponi?

Nihiireleke Mpantta Olumwenku Okathi Wootheene (4:25)

Xeeni waakiherya elapo mutthu onikhala awe nihikhanle aya nttittimiho nuulupalexa?

“Muluku Onniwerya Opaka Itthu Sootheene” (5:19)

Nwehe etthu enrowa wookhaliheryani ohiirela mpantta elapo okathi munithanla anyu muteko munrowa anyu ovaraka.

“Khula Mutthu Onrowa Oteexa Muritti Awe” (Owehaweha, 15 a Março, 2006)