• Biibiliya Onrowa Wookhaliheryani Sai?
    Okumi Woohimala!​—Kursu a Biibiliya
    • Yoosoma 1. Biibiliya otthukuliwe ene.

      YOOSOMA 01

      Biibiliya Onrowa Wookhaliheryani Sai?

      Otheene ahu ninniphavela waakhuliwa wa makoho voohimya sa okumi, ohaawa, okhwa ni ele enrowa wiiraneya muhoolo. Nave ninnixanka voohimya sa itthu sa khula nihiku, ntoko moota woophwanya yoolya ni moota wookhalana etthoko yoohakalaliha. Nto atthu anceene ahoona wira Biibiliya onnaakhula makoho ootepa otthuneya a mookumini. Ohiya-vo, Biibiliya onninivaha malakiheryo annikhaliherya ophwanya ohakalala wekeekhai. Munoonela sai, niireke Biibiliya onoowerya omukhaliherya mmusi anyu wala mutthu munimusuwela anyu?

      1. Makoho xeeni Biibiliya onaakhula awe?

      Biibiliya onnaakhula makoho a faita yinceene ntoko ala: Okumi opacenrye sai? Tiivi eri yoolakela ya okumi? Xeeni atthu anihaawa aya? Exeeni eniiraneya vaavo ninkhwa ahu? Atthu anceene aniphavela murettele, nto xeeni sihireere aya ikhotto? Exeeni enrowa wiiraneya ni elapo muhoolo? Tthiri khahiyo vootakhala opaka makoho ntoko awo, maana atthu anceene mulaponi ahoona wira Biibiliya onnaakhula oratteene makoho awo.

      2. Biibiliya onrowa onikhaliherya sai ohakalala khula nihiku?

      Biibiliya, onnivaha miruku sooloka. Mwa ntakiheryo, owo onnitthokiherya moota atthu a vatthokoni anrowa aya ophwanya ohakalala wekeekhai. Nave onnivaha miruku sooloka sa moota woovilela oriipiwa murima ni osiveliwa muteko ninvara ahu. Eliivuru ela, enimookhaliheryani osuwela ele Biibiliya oniixuttiha awe voohimya sa myaha iyo ni myaha sikina. Woonasa wene, munnikupali wira “soolempwa sotheene [wala itthu sotheene Biibiliya onihimya awe] . . . sinnivareleya muteko”.—2 Timootheyo 3:16.

      Eliivuru ela khenimuranttela Biibiliya. Ohiya-vo, enimookhaliheryani omusuwela Biibiliya. Tivonto, mwiimananiheke osoma soolepa sotheene sa khula yoosoma, nave mulikanyiheke ele Biibiliya onihimya awe ni itthu muniixutta anyu.

      MWIIXUTTE ITTHU SIKINA

      Nwehe moota Biibiliya aakhalihenrye awe atthu anceene, moota mukhanle anyu oosiveliwa omusoma Biibiliya ni xeeni vari aya vooloka okhaliheriwa wira mwiiwexexe ele Biibiliya oniixuttiha awe.

      3. Biibiliya onninivaha malakiheryo

      Biibiliya, onlikana ni lampata ompatta vanceene. Maana Biibiliya onniwerya onikhaliherya opaka soothanla sooloka ni onnihimya itthu sinrowa wiiraneya muhoolo.

      Musome Esalimo 119:105, nuumala-vo mwaakhule makoho anittharelana:

      • Mulipa-oolepa Esalimo ela, aamoonela sai Biibiliya?

      • Nyuwo munimoonela sai Biibiliya?

      Mulopwana eettaka vamalukuni muxerexere mwa ephareya omukunxe ene lanterna wira omwaleeleke ephiro.

      4. Biibiliya onniwerya waakhula makoho ahu

      Xontte nwehe moota Biibiliya aakhunle awe makoho a muthiyana mmosa, yaawo mwa iyaakha sinceene ahaasuwela awe waakhuliwa waya. Nwehe EVIIDIYU, nuumala-vo mwaakhule makoho anittharelana.

      EVIIDIYU: Muhihiye Ororomela! (1:48)

      • Ntoko niwenhe ahu eviidiyu, makoho xeeni muthiyana ole aarina awe?

      • Omusoma Biibiliya waamukhalihenrye sai?

      Biibiliya onninitumererya osuwela waakhuliwa wa makoho ahu. Mmusome Matheyo 7:7, nuumala-vo mwaakhule nikoho ninttharelana:

      • Makoho xeeni murina anyu mwaaphavela anyu woona yaakhuliwaka mBiibiliyani?

      5. Onimoosivelani omusoma Biibiliya

      Atthu anceene onnaasivela omusoma Biibiliya, nto opaka eyo ennaakhaliherya vanceene. Nwehe EVIIDIYU, nuumala-vo mwaakhule makoho anittharelana:

      EVIIDIYU: Omusoma Biibiliya (2:05)

      • Ntoko niwenhe ahu eviidiyu, exeeni yaawiiriha amiravo ale ohisiveliwa omusoma Biibiliya?

      • Exeeni yaakhalihenrye osiveliwa omusoma Biibiliya?

      Ele Biibiliya onihimya awe enoowerya onimaaliha ni onivaha nlipelelo. Mmusome aRoma 15:4, nuumala-vo mwaakhule nikoho ninttharelana:

      • Niireke mwaaniphavela osuwela moota Biibiliya onnimaaliha awe ni onnivaha awe nlipelelo?

      6. Atthu akina anoowerya onikhaliherya omwiiwexexa Biibiliya

      Ohiya paahi omusoma mekhaya, atthu akina ahoona wira anniwerya omwiiwexexa saana Biibiliya vaavo anikhaliheriwa aya ni atthu akina. Musome Miteko 8:26-31, nuumala-vo mwaakhule nikoho ninttharelana:

      Ifootu: 1. Namalaleerya Filipe omutthokiherya Soolepa mulopwana a wEthiyopia. 2. Namoona a Yehova omusomihaka Biibiliya maama ni anaawe anli.

      Eliivuru ya Miteko ennimulavula mulopwana a wEthiyopia yoowo aakhaliheriwe wiiwexexa saana Soolempwa. Nave atthu anceene olelo-va, annoona wira ti vooloka okhaliheriwa ni atthu akina wira amwiiwexexe Biibiliya

      ATTHU AKINA ANIHIMYA WIRA: “Omusoma Biibiliya mutthu oniyeeha okathi awe mahala ene”

      • Nto nyuwo munoonela sai? Nthowa xeeni?

      IPONTO SUULUPALE

      Biibiliya onninivaha malakiheryo annikhaliherya khula nihiku, onnaakhula makoho ootepa otthuneya a mookumini, onninimaaliha ni onninivaha nlipelelo.

      Wuuluula

      • Miruku xeeni nimphwanya ahu mBiibiliyani?

      • Makoho xeeni Biibiliya onaakhula awe?

      • Itthu xeeni muniphavela anyu wiixutta mBiibiliyani?

      Yoolakela aka

      NWEHE ITTHU SIKINA

      Nwehe moota malakiheryo a mBiibiliyani annikhaliherya aya olelo-va.

      “Miruku sa mBiibiliyani Sinnivareleya Muteko Okathi Wotheene” (Owehaweha No. 1 2018)

      Nwehe moota Biibiliya aamukhalihenrye awe mulopwana mmosa owanana miyuupuwelo soohiloka okhuma onamwane awe.

      Moota Okumi Aka Woohakalaliha Opacenrye Aya (2:53)

      Nwehe malakiheryo a mBiibiliyani anrowa wookhaliheryani okhalana etthoko yoohakalala.

      “Isiiri 12 Siniiriha Itthoko Ohakalala” (Nvenye! No. 2 2018)

      Atthu anceene anihimya wira Muluku tonilamulela olumwenku. Niireke eyo ekeekhai? Nwehe ele Biibiliya onihimya awe.

      Xeeni Vanitthuneya Anyu Omusoma Biibiliya?—Yoomalela (3:14)

  • Biibiliya Muhupi Muluku Onaaroihela Awe Apinaatamu
    Okumi Woohimala!​—Kursu a Biibiliya

    • 1. Okhala wira Biibiliya olempwale ni atthu, xeeni ohimyaka wira Nuulumo na Muluku?

      Biibiliya olempwale ni alopwana 40 ni soovira iyaakha 1600 olempwaka. Eliivuru yoopacerya yaalempwale 1513 Kristu ohinatthi orwa, eliivuru yookiserya elempwale mwaakha 98 nuumala Kristu orwa. Alopwana yaamulepa Biibiliya yaari a makhalelo oovirikana. Akina yaari amakampusi, akina yaatotha ihopa ni akina yaari mamwene. Hata vaari siiso, itthu yaalempe aya sinnivarihana. Vaaweryaneyale sai eyo wiiraneya? Mwaha woowi, Muluku tori mwaneene Biibiliya. (Mmusome 1 aTesaloonika 2:13.) Alopwana ale yaamulepa Biibiliya khahiyo wira yaalepa muupuwelo aya. Ohiya-vo, awo “yaahilavula moolumo a Muluku, yeettihiwaka ni munepa woowaarya”.a (2 Pedru 1:21) Tthiri Muluku aahirumeela munepa awe woowaarya wira owiirihe alopwana awo olepa muupuwelo awe.—2 Timootheyo 3:16.