Atthu anceene khonaasivela olavula myaha sa orupihana. Hata vari siiso, Biibiliya onnilavula sa orupihana, masi mwa nttittimiho. Eyo etthu yookhalela. Maana Yehova yoowo ori Mpattuxa ahu onnisuwela itthu sinniphwanyiha mireerelo. Owo onnihimya itthu ninreerela ahu opaka wira nimusiveliheke ni onninikhaliherya ohakalala mahiku ootheene.

1. Yehova onoonela sai orupihana?

Orupihana yoovaha enikhuma wa Yehova. Masi atthu Yehova oniweemererya awe orupihana, taale athelanne paahi. Eyo ennaakhaliherya anamathelana, ohiya paahi waayara anamwane, masi-tho wooniheryana ophentana waya. Biibiliya onihimya wira: “Mutteliweke murima ni mwara òmiravo anyu!” (Miruku 5:18, 19) Yehova oniphavela wira ale athelanne ahiraruwelaneke. Tivonto, khuuvo mukristau eekeekhai aarowa ophavela oraruwa.—Mmusome aHeeberi 13:4.

2. Orupihana woohiloka exeeni?

Biibiliya onihimya wira “ale anrupihana voohiloka . . . khanaakhela Omwene wa Muluku”. (1 aKorinto 6:9, 10) Nuulumo na ekereku nirumeeliwe mBiibiliyani noowi orupihana woohiloka, ti por·neiʹa. Nuulumo nla, ninhela muhina (1) orupihana atthu ahithelannea (nwehe enoota), (2) orupihana alopwanaru aahiiso athiyanaru ni (3) orupiha inama. Vaavo ninkhootta ahu ‘orupihana voohiloka’, ninnimusiveliha Yehova ni ninniphwanya mireerelo.—1 aTesaloonika 4:3.

MWIIXUTTE ITTHU SIKINA

3. Mutthyaweke orupihana woohiloka

Biibiliya onnimuhimya mmiravo oororomeleya iihaniwa Yosefe, yoowo aakhoottale omurupiha mwaara a mwaneene. Musome Maphattuwelo 39:1-12, nuumala-vo mwaakhule makoho anittharelana:

• Etthu xeeni yaamwiirinhe Yosefe otthyawa?​—Nwehe eversiikulu 9.

• Munoona wira Yosefe aahipaka yoothanla yooloka? Mwaha wa xeeni?

EVIIDIYU: Mukhootteke Orupihana Woohiloka (5:06)

Yehova oniphavela wira nikhootteke orupihana woohiloka. Mmusome 1 aKorinto 6:18, nuumala-vo mwaakhule makoho anittharelana:

• Itthu xeeni saarowa omwiiriha mutthu orupihana woohiloka?

• Munrowa otthyawa sai orupihana woohiloka?

4. Nyuwo munoowerya okhootta sooweeha

EVIIDIYU: Muxintte Sooweeha Mmusomaka Biibiliya (3:02)

• Munna ninwenhe ahu nviidiyuni, aahoona wira miyuupuwelelo sawe ni itthu aapaka awe, sammwiiriha omuraruwela mwaarawe. Etthu xeeni aapanke awe nuumala osuwela eyo?

Okathi mukina, hata makristau oororomeleya ahaana owanana miyuupuwelelo soohiloka. Etthu xeeni enrowa wookhaliheryani ohuupuwela orupihana woohiloka? Mmusome aFilipi 4:8, nuumala-vo mwaakhule makoho anittharelana:

• Itthu xeeni ninreerela ahu wuupuwela?

• Omusoma Biibiliya ni ovara miteko sa Yehova, onrowa onikhaliherya sai okhootta sooweeha?

5. Malamulo a Yehova anniniphwanyiha mireerelo

EVIIDIYU: Mukhalaneke Ankhili Ooloka (9:31)

• Moota xeeni mmiravo onilavuliwa yoolepa ela, aavinre awe opuro yaarowa aya omphwanya yooweeha?—Nwehe Miruku 7:8, 9.

• Miruku 7:23, 26, onnooniherya wira orupihana woohiloka onniphwanyiha maxakha. Nakhalana mweettelo wooloka, mixankiho xeeni ninrowa ahu osyaka?

• Okhalana mweettelo wooloka, onrowa onikhaliherya sai ophwanya okumi woohimala?

Atthu akina anoona wira ele Biibiliya onihimya awe sa orupihana alopwanaru aahiiso athiyanaru etthu yoohiloka. Masi Yehova yoowo ori Muluku oophenta oniphavela wira niphwanye okumi woohimala. Nto wira niphwanye nihaana okhala moovarihana ni ele onihimya awe okhala yooloka ni yoohiloka. Mmusome 1 aKorinto 6:9-11, nuumala-vo mwaakhule nikoho ninttharelana:

• Niireke moota Muluku onoonela awe orupihana alopwanaru aahiiso athiyanaru, yooweeha emosa paahi ninreerela ahu okhootta?

Wira nimusiveliheke Muluku, otheene ahu nihaana opaka marukunuxo mookumini mwahu. Niireke opaka eyo etthu yooloka? Musome Esalimo 19:9, 12, nuumala-vo mwaakhule makoho anittharelana:

• Munoona wira malamulo a xariya a Yehova tooloka? Mwaha wa xeeni?

IPONTO SUULUPALE

Orupihana etthu Yehova onvanhe awe mulopwana oothela ni muthiyana ootheliwa.

Wuuluula

• Orupihana woohiloka onihela muhina exeeni?

• Etthu xeeni enrowa onikhaliherya otthyawa orupihana woohiloka?

• Wiiwelela malamulo a xariya a Yehova onniphwanyiha sai mireerelo?

NWEHE ITTHU SIKINA

Nwehe etthu enimwiiriha Muluku ohimya wira mulopwana ni muthiyana anikhala hoothe ahaana olepiha ekasamento aya.

“Biibiliya Onihimya Exeeni sa Atthu Anli Anikhala Hoothe Ahithelanne?” (Mwaha ori va jw.org)

Nnaamwi Biibiliya ohimyaka wira orupihana alopwanaru aahiiso athiyanaru etthu yoohiloka, nwehe xeeni vari aya vootakhala waanyokha ale anrupihana alopwanaru aahiiso athiyanaru.

“Niireke ti Vootakhala Orupihana Alopwanaru Aahiiso Athiyanaru?” (Mwaha ori va jw.org)

Nwehe moota malamulo a Muluku voohimya sa orupihana annikhapelela aya.

“Niireke Orupihana Mwaano, Orupihana Tthiri?” (Mwaha ori va jw.org)

Nwehe etthu yaamwiirinhe mulopwana mmosa aarupihana alopwanaru oturuka mweettelo awe wira omusiveliheke Muluku. Musome mwaha oni “Awo Yaanikittittimiha”.

“Biibiliya Onnirukunuxa Mirima sa Atthu” (Owehaweha, 1 a Abril, 2011)

Ilapo sikina, atthu anuupuwela wira mutthu onihakalala paahi akhala wira oothela wala ootheliwa. Masi eyo khahiyo ekeekhai. Maana khahiyo wira atthu otheene athenle anoohakalala, nave khahiyo wira atthu otheene oohithela aahiiso oohitheliwa khanihakalala. Biibiliya onihimya wira othela aahiiso ohithela soovaha sa Yehova.

1. Mireerelo xeeni aniphwanya aya atthu oohithela?

Biibiliya onihimya wira: “Ole onithela onniira etthu yooreera, masi ole ohinithela, onniira etthu yootepa oreera”. (Mmusome 1 aKorinto 7:32, 33, 38.) Mwa inamuna xeeni mutthu oohithela aahiiso oohitheliwa “oniira awe etthu yootepa oreera?” Makristau oohithela aahiiso oohitheliwa, khanixanka mwaha wa itthu sa ole athelanne aya. Nto awo anikhala ootaphuwa. Nave awo pooti ottottela mureerelo okathi owo yincereryaka muteko aya woolaleerya, woonasa wene athaamelaka mapuro oothowa anamalaleerya wira yalaleyeke ihapari sooreera sa Omwene. Ohiya-vo, awo annikhalana okathi munceene wira alipihe waataana waya ni Yehova.

2. Mireerelo xeeni aniphwanya aya ale anlepiha ekasamento aya?

Othela aahiiso ohitheliwa wookhalana mireerelo saya. Masi Biibiliya onihimya wira “halali okhala atthu anli ovikana okhala mmosa pahi”. (Musuweli 4:9) Eyo ekeekhai, maana makristau oothela aneettela miruku sa mBiibiliyani, anniphwanya mireerelo sinceene. Okathi mulopwana ni muthiyana anlepiha aya ekasamento aya, awo annileiheryana ophentana, ottittimihana ni okhapelelana mukina ni mukhwaawe. Nave eyo ennaakupaliha wira anookhalaka mahiku otheene hoothe waavikana ale ahilepinhe ekasamento aya. Nave-tho, eyo ennaakhaliherya waahuwa saana anaaya.

3. Yehova onoonela sai ekasamento?

Yehova tokumihenrye ekasamento. Okathi wa ekasamento yoopacerya, owo aahimmye so: “Tivó mulopwana onahiyawe atithi awe n’ame awe, anakhala vamosá ni mwar’awe”. (Maphattuwelo 2:24) Yehova oniphavela wira mulopwana oothela ni muthiyana ootheliwa, aphentaneke ni akhaleke hoothe okumi aya wootheene. Owo onnimweemererya mulopwana oothela aahiiso muthiyana ootheliwa omwalana akhala wira ooraruweliwa. Okathi owo, Yehova onnimweemererya ole oraruweliwe othanla omwalana aahiiso omulevelela.a (Nwehe enoota) (Matheyo 19:9) Yehova khoneemererya waatteya, eyo piiyo, okhalana athiyana anivikana mmosa aahiiso alopwana onivikana mmosa.—1 Timootheyo 3:2.

MWIIXUTTE ITTHU SIKINA

4. Atthu oohithela anrowa orumeela sai okumi aya?

Yesu aanivaha efaita othela wala ohitheliwa. (Matheyo 19:11, 12) Mmusome Matheyo 4:23, nuumala-vo mwaakhule makoho anittharelana:

• Okhala wira Yesu khaathenle, aarumeelale sai okumi awe wira omurumeele Tiithi awe ni waakhaliherya atthu akina?

Makristau oohithela aahiiso oohitheliwa anoowerya otthara ntakiheryo na Yesu. Nwehe EVIIDIYU, nuumala-vo mwaakhule nikoho.

EVIIDYU: Anna ni Arokora Oohitheliwa Ororomeleya (3:11)

• Mwa inamuna xeeni mukristau oohithela aahiiso oohitheliwa onrowa awe orumeela okumi awe wira incererye muteko oninvarela awe Yehova?

Niireke mwaanisuwela?

Biibiliya khonihimya iyaakha mutthu onireerela awe othela aahiiso otheliwa. Masi onnaatumererya makristau olipelela “ovira iyaakha sa omiravo” ohinatthi othela aahiiso otheliwae. Mwaha woowi okathi owo mutthu onimakela wuupuwela orupihana paahi, nto eyo pooti omwiiriha opaka yoothanla yoohiloka.—1 aKorinto 7:36.

5. Mmuthanleke mwa miruku ole munrowa anyu othelana

Omuthanla mutthu onrowa awe othelana, yoothanla yuulupale mutthu onipaka awe. Mmusome Matheyo 19:4-6, 9, nuumala-vo mwaakhule nikoho ninttharelana:

• Xeeni mukristau ohinreerela awe othela aahiiso otheliwa ohuupuwenle oratteene?

Biibiliya onimookhaliheryani osuwela itthu sinimwiiriha mutthu okhala mulopwana oothela ooloka ni muthiyana otheliwa ooloka. Masi etthu yuulupale tiila: Mutthu owo ohaana omphenta vanceene Yehova.b (Nwehe enoota) Mmusome 1 aKorinto 7:39 ni 2 aKorinto 6:14. Nuumala-vo, mwaakhule makoho anittharelana:

• Xeeni vari aya vooloka othelana ni mutthu onimurumeela Yehova?

• Yehova aarowa woonela sai akhala wira moomuthela aahiiso mootheliwa ni mutthu ohinimurumeela Yehova?

6. Mukhalaneke moonelo mmosaru wa Yehova voohimya sa ekasamento

Khalai, alopwana akina yaanimwalana ni axaaraya mwaha wa mathowa oohiloka. Mmusome Malakhiya 2:13, 14, 16, nuumala-vo mwaakhule nikoho ninttharelana:

• Xeeni Yehova oninyokha awe omwalana nihikhanle nthowa na mBiibiliyani?

Nwehe EVIIDIYU, nuumala-vo mwaakhule nikoho.

EVIIDIYU: Ekasamento—ti ya Mahiku Ootheene (4:30)

• Akhala wira muthelanne ni mutthu ohinimurumeela Yehova, etthu xeeni munireerela anyu opaka wira mukhalane ekasamento yoohakalala?

7. Mweetteleke malakiheryo a Yehova a ekasamento

EVIIDIYU: Mweetteleke Malamulo a Yehova a Ekasamento (4:14)

Mmusome aHeeberi 13:4, nuumala-vo mwaakhule makoho anittharelana:

• Munoonela sai, niireke vanniweryaneya weettela malamulo a Yehova a ekasamento? Mwaha wa xeeni?

Yehova oniphavela wira ale anithelana alepiheke ekasamento aya. Nave akhala wira anoomwalana, ahaana waanulari aahiiso ottipiha ekasamento eyo. Nto Yehova oniphavela wira makristau eekeekhai yiiweleleke malamulo awo. Mmusome Tito 3:1, nuumala-vo mwaakhule nikoho ninttharelana:

• Akhala wira moothela, niireke yookhala etthu enookupalihani wira othelana wanyu oheemereriwa ni kuvernu?

IPONTO SUULUPALE

Othela aahiiso ohithela soovaha sinikhuma wa Yehova. Atthu athenle ni ale ahithenle anoowerya ohakalala akhala wira anoopaka ele Yehova oniphavela awe.

Wuuluula

• Ale ahithenle ni ale ahitheliwe, anrowa orumeela sai okumi aya?

• Xeeni Biibiliya onihimya awe wira nihaana othelana paahi ni mutthu onimurumeela Yehova?

• Nthowa xeeni nimosa Biibiliya onimweemererya awe mutthu omwalana ni ole othelanne awe?

NWEHE ITTHU SIKINA

Onitaphulela exeeni ‘othelana mwa Apwiya paahi?’

“Makoho Anikohiwa ni Ale Anisoma Irevista Sahu” (Owehaweha, 1 a Julyo, 2004)

Nwehe iviidiyu tthaaru saamukhaani sinrowa wookhaliheryani opaka yoothanla yooloka akhala wira munnuupuwela onamorari ni othela aahiiso otheliwa.

Malakiheryo Anivahiwa Aya Ale Anuupuwela Othela Wala Otheliwa (17:05)

Nwehe etthu yaamukupaliha munna mmosa wira Yehova onvaha etthu yoolokexa ovikana itthu aahiyale awe.

Kuupuwela Wira Aamwiixutta Ekeekhai (1:56)

Akhala wira mutthu onuupuwela omwalana aahiiso ovalaana, itthu xeeni onireerela awe wuupuwela?

Muttittimiheke Ele “Muluku Ephitanyalyawe” (Owehaweha, Dezembro 2018)