Maisugon nga Iginpasamwak Nira an Pulong han Dios!
An kaisog ha pag-atubang ha pagkontra iginpapakita han tinuod nga mga Kristiano, nga mababasa ha mga libro sugad han “Bearing Thorough Witness” About God’s Kingdom ngan Jehovah’s Witnesses—Proclaimers of God’s Kingdom. Pariho han aton mga igkasi-tumuroo han siyahan nga siglo, nag-aampo kita kan Jehova ha pangaro han iya espiritu ngan hin bulig basi makagyakan han iya pulong nga waray kahadlok.—Buh. 4:23-31.
Mahitungod han aton pagsangyaw nga buruhaton durante han Girra ha Kalibotan I, usa nga bugto an nagsurat: “Madasigon nga iginpanaltag han mga surugoon han Dios an ikapito nga tomo han Studies in the Scriptures, nga may ulohan The Finished Mystery. Waray kapariho an kadamu han naipanaltag hito. An Kingdom News No. 1 iginpagowa han 1918. Sunod, iginpagowa an Kingdom News No. 2, nga nagsasaysay kon kay ano nga an The Finished Mystery igindiri han mga awtoridad. Ginsundan ito han Kingdom News No. 3. Ito nga mga publikasyon iginpanaltag ha damu nga lugar han matinumanon nga mga dinihogan. Ginkinahanglan an pagtoo ngan kaisog basi ipanaltag an Kingdom News.”
Yana, an bag-o nga mga magwarali kasagaran na nga ginbabansay ha ministeryo, pero hadto diri. Usa nga brother nga taga-Poland nga naukoy na yana ha Estados Unidos an nahinumdom han iya eksperyensya han siyahan nga inupod hiya ha pagsangyaw han 1922. Hiya nagsurat: “Bisan kon diri ako maaram kon paonan-o itatanyag an literatura ngan limitado la an akon English, kinadto ako ha opisina han usa nga doktor ngan nagtuktok. Usa nga nars an nag-abri han purtahan. Diri ko gud hingangalimtan an nahitabo, kay eksayted ako ngan nahahadlok. Pag-abri ko han akon bag, nagkahudlog an ngatanan nga libro ha may tiil han nars. Diri ko na mahinumdoman an akon ginsiring, pero kinuha hiya hin publikasyon. Pagbaya ko, nagkaada na ako kaisog ngan inabat nga ginbendisyonan ako ni Jehova. Hito nga adlaw, damu nga bokleta an akon naipanaltag dida hito nga lugar han negosyo.”
“Han mga 1933, damu nga kabugtoan an nagamit hin sound car [awto nga may loudspeaker] ha pagpasamwak han mensahe han Ginhadian,” siring han usa nga sister. Usa ka beses, hiya ngan an usa nga mag-asawa nga Saksi nagsangyaw ha usa nga lugar ha California, U.S.A., nga may mga bukid. “Iginparada han brother an sound car ha uroigbaw han kabukiran, ngan nagpabilin kami ha bungto ha uroubos hito,” siring niya. “Han ginpatokar niya an nakarekord nga mensahe, an tunog hito baga hin tikang ha langit. Ginpinamiling han mga tawo an bugto nga nagpapatokar pero waray gud nira maagii. Katapos hito, ginbisita namon an mga tawo ha ira balay ngan ginsangyawan hira. Nakasangyaw ako gamit an duha pa nga sound car, ngan kadam-an an nadiri pamati ha mensahe. Kondi diri hira nakakalikay, kay klaro nga nababatian nira ito ha ira balay. Pirme namon nakikita nga ginbubuligan kami ni Jehova nga gamiton an husto nga paagi ha husto nga panahon. Ini nga paagi han pagsangyaw nagkinahanglan hin daku nga kaisog, kondi an katuyoan hito pirme natutuman, ngan nadadayaw an ngaran ni Jehova.”
Han dekada 1930 ngan temprano han dekada 1940, an mga ponograpo ngan nakarekord nga mga pahayag mahitungod ha Biblia ginagamit ha ministeryo. Usa nga sister an nagsiring: “Usa nga batan-on nga sister an nagbabalay-balay gamit an ponograpo. Han ginpatokar niya an plaka ha usa nga balay, an tagbalay nga lalaki nasina hinduro salit iya ginbanyakan an ponograpo ngan nahulog ito tikang ha balkon. Pero waray bisan usa nga plaka an naruba. Tulo nga lalaki nga naniniudto ha usa nga nakaparada nga trak an nakakita han nahitabo. Ira ginsidngan an sister nga ha ira patokaron an plaka, ngan kinuha hira hin literatura. Natabonan hito an maraot nga pagtratar nga iya naeksperyensyahan.” Ginkinahanglan an kaisog basi makailob han sugad nga mga pagsari.
Ito nga sister nagsiring liwat: “Nahihinumdoman ko an amon siyahan nga panaltag hin magasin ha kalsada han 1940. Antes hito, may-ada gintatawag nga mga information march. An kabugtoan naglalakat nga naglilinya ha ligid han kalsada ngan may dara nga plakard nga may nakasurat ‘An Relihiyon Usa nga Lit-ag Ngan Panlimbong’ ngan ‘Mag-alagad ha Dios Ngan kan Kristo nga Hadi.’ Samtang naglalakat, nanhahatag liwat hira hin mga tract ha mga tawo. Ginkinahanglan an kaisog ha sugad hini nga paagi han pagsangyaw, pero natuman an katuyoan hito nga ipasamwak ha publiko an ngaran ni Jehova ngan makilala an iya katawohan.”
“Diri gud masayon an pagtanyag hin mga magasin ha gudtiay nga bungto,” siring han usa pa nga sister. “Ha panahon ito nga duro an pagkontra ha mga Saksi . . . Nagkinahanglan hin daku nga kaisog an pagtindog ha kanto han kalsada nga may ginkakaptan nga magasin ngan iginsisinggit an iginsuhestyon nga mga islogan. Kondi talagsa la nga diri kami nakakasangyaw ha Sabado. Usahay makisangkayon an mga tawo. Ha iba nga panahon ginpapalibotan kami hin grupo han nasisina nga mga tawo, ngan usahay kinahanglan bumaya dayon kami basi malikyan an maraot nga pagtratar.”
Bisan pa han pagtimaraot nga naeksperyensyahan han mga Saksi ni Jehova durante han Girra ha Kalibotan II, maisugon nga nagpadayon hira ha ira ministeryo. Ha usa nga 43 ka adlaw nga kampanya tikang han Disyembre 1, 1940 tubtob Enero 12, 1941, mga 50,000 nga magwarali ha Estados Unidos an nanaltag hin haros walo ka milyon nga bokleta.
Damu nga lagas na nga kabugtoan an nahihinumdom pa gihapon han magkuri nga kahimtang ha naglabay diin kinahanglan nira magin maisugon. An pipira ha ira nahihinumdom nga ha sulod hin damu ka tuig an ira pagin maisugon nakita ha ira pirme ginsisiring, Padayon kita nga magsangyaw nga madasigon tubtob ha kataposan! Diri kita maaram kon ano pa nga paagi han pagsangyaw han mensahe han Dios an aton hihimoon antes matapos inin maraot nga sistema. Kondi ha bulig ni Jehova, padayon nga ipapasamwak naton an iya pulong nga may pagtoo ngan kaisog.
[Blurb ha pahina 9]
Pirme ginkikinahanglan an kaisog ha pagsangyaw han Ginhadian