Mga Pakiana Ngan mga Baton Mahitungod kan Jesu-Kristo

“Hin-o ako sumala ha mga tawo?”—Lukas 9:18, NW.

IGINPAKIANA ito ni Jesus ha iya mga disipulo tungod kay maaram hiya nga iba-iba an opinyon han mga tawo mahitungod ha iya. Kondi waray angay ikagupong kay abrido ha publiko an iya kinabuhi. Dayag nga nakig-upod hiya ha mga tawo ha mga bungto ngan syudad. Nagsangyaw ngan nagtutdo hiya ha publiko tungod kay karuyag niya mahibaro an mga tawo mahitungod ha iya.—Lukas 8:1.

An kamatuoran mahitungod kan Jesus makikita ha iya pulong ngan buhat nga nakarekord ha upat nga Ebanghelyo han Biblia—Mateo, Markos, Lukas, ngan Juan. Iton giniyahan han Dios nga rekord an mabulig ha pagbaton han aton mga pakiana mahitungod ha iya.a—Juan 17:17.

PAKIANA: Nag-eksister gud ba hi Jesus?

BATON: Oo. Gin-unabi han mga historyador, sugad kanda Josephus ngan Tacitus han siyahan nga siglo nga nag-eksister hi Jesus. Labaw pa hito, makakombinse nga ginpapamatud-an han Ebanghelyo nga diri susmatanon la hiya, kondi tinuod nga tawo. Ito nga rekord espisipiko ngan detalyado mahitungod ha panahon ngan lugar han mga panhitabo. Pananglitan, gin-gamit han mga historyador an gin-unabi nga pito nga magmarando han usa nga parasurat han Ebanghelyo nga hi Lukas basi hibaroan an tuig han pagtikang ni Jesus han iya ministeryo.—Lukas 3:1, 2, 23.

Makakombinse an ebidensya nga nag-eksister hi Jesus. “Kadam-an han mga eskolar nauyon nga may lalaki nga ginkilala nga Jesus nga Nasaretnon nga tinuod nga nag-eksister ha siyahan nga siglo,” siring han libro nga Evidence for the Historical Jesus.

PAKIANA: Dios gud ba hi Jesus?

BATON: Diri. Waray gud tagda ni Jesus nga katupong hiya han Dios. Ha kabaliktaran, pauroutro nga iginpakita ni Jesus nga ubos hiya kan Jehova.b Pananglitan, iya gintawag hi Jehova nga “Dios ko” ngan an “amo la [nga] matuod nga Dios.” (Mateo 27:46; Juan 17:3) Sigurado nga an mas hamubo la an posisyon an magamit hito nga mga pulong ha pagtawag ha iba. Pananglitan, an empleyado nga natawag han iya agaron nga “akon boss” klaro nga nakarawat nga mas ubos an iya katungdanan.

Iginpakita liwat ni Jesus nga bulag hiya ha Dios. Makausa, ginsidngan niya an mga nakontra han iya awtoridad: “Ha iyo Kasugoanan iginsurat man nga an pagpamatuod han duha ka tawo kamatuoran. Ako amo an nagpapamatuod mahitungod ha akon ngahaw, ngan an Amay, nga nagpakanhi ha akon, nagpapamatuod ha nahitutungod ha akon.” (Juan 8:17, 18) Husto gud nga bulag hi Jesus kan Jehova kay kon diri, paonan-o hira magigin duha nga “nagpapamatuod” o testigo?c

PAKIANA: Maopay la ba nga tawo hi Jesus?

BATON: Diri. Labaw pa hiya hito. Maaram hiya nga may-ada hiya importante nga bahin ha katumanan han kaburut-on han Dios. Iini an pipira:

● “Bugtong nga Anak han Dios.” (Juan 3:18) Maaram hi Jesus han iya gintikangan. Maiha na hinduro hiya nga naeksister antes pa hiya matawo ha tuna. Hiya nagsiring: “Ako nakanhi tikang ha langit.” (Juan 6:38) Hiya an siyahan nga ginlarang han Dios ngan binulig liwat ha paglarang han ngatanan nga butang. Tungod kay hiya la an direkta nga ginlarang, husto la nga tawagon hiya nga “Bugtong nga Anak” han Dios.—Juan 1:3, 14; Kolosas 1:15, 16.

● “Anak han Tawo.” (Mateo 8:20) Damu ka beses nga gintawag ni Jesus an iya kalugaringon nga “an Anak han Tawo,” nga mababasa hin mga 80 ka beses ha Ebanghelyo. Nagpapakita ini nga tawo gud hiya, diri Dios nga nagpakatawo. Ha ano nga paagi igin-anak sugad nga tawo an bugtong nga Anak han Dios? Pinaagi han baraan nga espiritu ni Jehova, naibalhin an kinabuhi han Anak ngadto ha tagoangkan han birhen nga hi Maria salit nagburod ito. Tungod hito, igin-anak hi Jesus nga hingpit ngan waray sala.—Mateo 1:18; Lukas 1:35; Juan 8:46.

● “Magturutdo.” (Juan 13:13) Iginpatin-aw ni Jesus nga an toka nga iginhatag han Dios ha iya amo an ‘pagtutdo ngan pagwali han maopay nga sumat’ mahitungod han Ginhadian ni Jehova nga Dios. (Mateo 4:23; Lukas 4:43) Matin-aw ngan simple gud an iya pagkasaysay kon ano ito nga Ginhadian ngan kon ano an bubuhaton hito basi matuman an kaburut-on han Dios.—Mateo 6:9, 10.

● “An Pulong.” (Juan 1:1) Hi Jesus an Tagapagyakan ngan an paagi nga ginagamit han Dios ha paghatag hin impormasyon ngan instruksyon, ngan ha pagsumat han Iya mensahe ha katawohan.—Juan 7:16, 17.

PAKIANA: Hi Jesus ba an iginsaad nga Mesias?

BATON: Oo. Igintagna han Biblia an pag-abot han Mesias o Kristo nga nangangahulogan, “Usa nga Dinihogan.” Inin Usa nga Iginsaad may-ada importante nga bahin ha katumanan han katuyoan ni Jehova. Makausa, may Samaritana nga nagsiring kan Jesus: “Maaram ako nga an Mesias tiarabot (nga an ngaran hi Kristo).” Katapos hi Jesus nagsiring: “Ako nga nagyayakan ha imo, amo hiya.”—Juan 4:25, 26.

May ebidensya ba nga hi Jesus an Mesias? May-ada. May-ada tulo nga ebidensya nga kon pag-urusahon maghahatag hin marig-on nga pamatuod, pariho han pattern hin fingerprint nga gintatag-iya la hin usa ka tawo. Aada ba kan Jesus an ngatanan nga ebidensya? Tagda:

● An iya katulinan. Igintagna han Biblia nga an Mesias magtitikang kan Abraham pinaagi han tulin ni David. (Genesis 22:18; Salmo 132:11, 12) Ngan ha ira katulinan nagtikang hi Jesus.—Mateo 1:1-16; Lukas 3:23-38.

● Natuman nga mga tagna. Damu an tagna ha Hebreo nga Kasuratan mahitungod han kinabuhi han Mesias ha tuna, han detalye han iya katawo, ngan han iya kamatayon. Natuman kan Jesus ito ngatanan. Ini an pipira hito: Natawo hiya ha Betlehem (Mika 5:2; Lukas 2:4-11), gintawag tikang ha Ehipto (Hosea 11:1; Mateo 2:15), ngan ginpatay nga waray nabari nga tul-an (Salmo 34:20; Juan 19:33, 36). Imposible gud mamaniobra ni Jesus an iya kinabuhi basi mahaom ha ngatanan nga tagna may kalabotan ha Mesias.d

● An pagpamatuod han Dios mismo. Han ig-anak hi Jesus, nagsugo an Dios hin mga anghel basi sumatan an mga magbarantay hin karnero nga natawo na an Mesias. (Lukas 2:10-14) Ha pipira nga okasyon han ministeryo ni Jesus, nagyakan an Dios tikang ha langit basi ipahayag an iya pag-uyon kan Jesus. (Mateo 3:16, 17; 17:1-5) Iya gintagan hin gahum hi Jesus basi makabuhat hin mga milagro nga mas makakagpamatuod nga hi Jesus an Mesias.—Buhat 10:38.

PAKIANA: Kay ano nga kinahanglan mag-antos hi Jesus ngan mamatay?

BATON: Sugad nga waray sala nga tawo, hi Jesus diri takos mag-antos. Diri man liwat hiya takos igraysang ha kahoy sugad nga kriminal ngan bayaan nga mamatay ha makaarawod nga paagi. Bisan pa hito, ginlaoman ni Jesus an sugad nga pagmaltrato ngan waray reklamo nga ginkarawat ito.—Mateo 20:17-19; 1 Pedro 2:21-23.

Sugad han igintagna, mag-aantos ngan mamamatay an Mesias para ha sala han mga tawo. (Isaias 53:5; Daniel 9:24, 26) Hi Jesus mismo nagsiring nga kinanhi hiya ha “paghatag han iya kinabuhi nga lukat han kadam-an.” (Mateo 20:28) Adton may pagtoo nga makakalukat an iya kamatayon makakalaom hin kaluwasan tikang ha sala ngan kamatayon ngan mabubuhi ha waray kataposan ha Paraiso nga tuna.e—Juan 3:16; 1 Juan 4:9, 10.

PAKIANA: Makakatoo ba kita nga ginbanhaw hi Jesus?

BATON: Oo. Naglalaom gud hi Jesus nga babanhawon hiya. (Mateo 16:21) Kondi importante nga tigamnan naton nga waray hiya o an mga parasurat han Biblia magsiring nga mababanhaw hiya ha natural nga paagi. Imposible gud ito. Lugod, an Biblia nasiring: “Ginbanhaw hiya han Dios, ngan nahubaran han mga kasakitan han kamatayon.” (Buhat 2:24) Kon natoo kita nga an Dios an Naglarang han ngatanan, makakasiguro kita nga mababanhaw niya an iya Anak.—Hebreo 3:4.

May-ada ba matataporan nga ebidensya nga ginbanhaw hi Jesus? Tagda an masunod.

● Testimonya han mga nakakita. Mga 22 ka tuig tikang han mamatay hi Jesus, hi apostol Pablo nagsurat nga sobra 500 an nakakita han binanhaw nga hi Jesus ngan kadam-an ha ira an buhi pa han iya igsurat ito. (1 Korinto 15:6) Masayon panhimuwaan kon usa o duha la an testigo, kondi imposible kon 500 na an testigo.

● Masasarigan nga mga testigo. An mga disipulo ni Jesus—nga aktuwal nga nakatestigo han panhitabo—waray mag-alang ha pagpasamwak nga ginbanhaw hi Jesus. (Buhat 2:29-32; 3:13-15) Ha pagkamatuod, gintagad nira nga importante an pagtoo ha pagkabanhaw ni Jesus ha pagtoo han mga Kristiano. (1 Korinto 15:12-19) Andam hira mamatay imbes nga isalikway an ira pagtoo kan Jesus. (Buhat 7:51-60; 12:1, 2) Ano daw la an imo huhunahunaon ha usa nga andam mamatay para ha usa nga butang nga maaram hiya nga buwa?

Ginhisgotan naton an baton han Biblia ha unom nga importante nga pakiana mahitungod kan Jesus. Ginklaro hini kon hin-o gud hiya. Kondi importante gud ba ini nga mga baton? Ha iba nga pagkayakan, importante ba kon ano an imo gintotoohan mahitungod kan Jesus?

[Mga footnote]