Kon Ano an Ginbuhat Na ni Jehova Basi Talwason an Makasasala nga mga Tawo

1-2. (a) Ano an sala, ngan paonan-o kita mahimo magdaog ha aton pakig-away kontra hito? (Kitaa liwat an “An Iginpapasabot.”) (b) Ano an aton hihisgotan hini nga artikulo ngan ha iba pa nga mga artikulo hini nga isyu han An Barantayan? (Kitaa liwat an “Para ha mga Magbarasa” hini nga isyu.)

KARUYAG mo ba mahibaroan kon ano ka kahinigugma ni Jehova nga Dios? Ini an usa nga maopay nga paagi basi mahibaroan mo an baton: Admi kon ano an iya ginbuhat na basi talwason ka ha sala ngan kamatayon. An salaa usa nga maraot gud nga kaaway, nga diri mo mapipirde nga ikaw la. Kita ngatanan nakakasala kada adlaw, ngan namamatay kita tungod han sala. (Roma 5:12) Pero may maopay nga sumat. Ha bulig ni Jehova, mapipirde ta an sala. Ngani, an aton kadaogan sigurado gud!

² Ha sulod hin mga 6,000 ka tuig, ginbibinuligan na ni Jehova an mga tawo ha pakig-away ha sala. Kay ano? Kay hinigugma kita niya. Hinigugma ni Jehova an mga tawo tikang pa ha tinikangan, salit damu na an iya ginhimo basi buligan hira hini nga pakig-away. Maaram an Dios nga an sala nagriresulta hin kamatayon, ngan diri niya karuyag nga mamatay kita. Karuyag niya nga mabuhi kita hin waray kataposan. (Roma 6:23) Ito an iya karuyag para ha imo. Hini nga artikulo, hihisgotan naton an tulo nga pakiana: (1) Ano nga paglaom an iginhatag ni Jehova ha makasasala nga mga tawo? (2) Ano an ginbuhat han makasasala nga mga tawo ha panahon han Biblia basi makarawat an pag-uyon ni Jehova? (3) Ano an ginbuhat ni Jesus basi talwason an makasasala nga mga tawo?

ANO NGA PAGLAOM AN IGINHATAG NI JEHOVA HA MAKASASALA NGA MGA TAWO?

3. Kay ano nga nagin makasasala an aton siyahan nga mga kag-anak?

³ Han ginlarang ni Jehova an siyahan nga lalaki ngan babaye, karuyag niya nga magin malipayon hira. Gintagan niya hira hin makaruruyag nga urukyan, hin regalo nga pag-asawa, ngan hin eksayting nga toka. Pupun-on nira an tuna han ira mga tulin, ngan hihimoon nga paraiso an bug-os nga tuna sugad han garden han Eden. May-ada hiya usa la nga simple nga igindiri. Ngan ginpahamangnoan niya hira nga kon diri nira susugton ito nga sugo pinaagi han tinuyo nga pagrebelde ha iya, an ira sala magriresulta hin kamatayon. Maaram kita han nahitabo. Usa nga maraot nga anghel, nga waray gugma ha Dios o ha ira, an sinulod ha eksena ngan ginsulay hira nga buhaton ito nga sala. Nagpadara hira Adan ngan Eva hito nga maraot nga impluwensya. Tungod kay waray hira tumapod ha ira mahigugmaon nga Amay, nakasala hira. Sugad han aton nahibabaroan, natuman an ginsiring ni Jehova. Tikang han adlaw nga nakasala hira, dapat nira atubangon an mga resulta: nagtikang hira malagas, ngan ha urhi namatay.​—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Kay ano nga nangangalas hi Jehova ha sala ngan ginbubuligan kita niya ha pakig-away hito? (Roma 8:​20, 21)

⁴ Iginparekord ni Jehova iton makasurubo nga panhitabo para ha aton kapulsanan. Ginbubuligan kita hito nga masabtan kon kay ano nga nangangalas gud hiya ha sala. Tungod han sala nahibubulag kita ha aton Amay, ngan nagriresulta ito hin kamatayon. (Isa. 59:2) Amo ito nga an rebelde nga espiritu nga hi Satanas, nga nagpatikang hini ngatanan nga problema, nahigugma ha sala ngan nag-aaghat hito. Posible nga naghunahuna hiya nga nagkaada hiya daku nga kadaogan ha Eden. Pero waray niya masabti kon ano kamahigugmaon hi Jehova. Waray gud bag-oha han Dios an iya katuyoan para ha mga tulin nira Adan ngan Eva. Hinigugma niya an tawhanon nga pamilya, salit naghatag dayon hiya hin paglaom ha ngatanan. (Basaha an Roma 8:​20, 21.) Maaram hi Jehova nga pipilion han pipira hito nga mga tulin nga higugmaon hiya ngan pangangaroon an iya bulig ha pakig-away ha sala. Ngan sugad nga ira Amay ngan Maglalarang, tatagan niya hira hin paagi basi magkaada kagawasan tikang ha sala ngan magin duok ha iya. Ano an bubuhaton ni Jehova basi magin posible ito ngatanan?

5. Kakan-o ni Jehova siyahan nga gin-unabi nga may paglaom an makasasala nga mga tawo? Isaysay. (Genesis 3:15)

⁵ Basaha an Genesis 3:15. Siyahan nga gin-unabi ni Jehova nga may paglaom an makasasala nga tawo han iya ginsentensyahan hi Satanas. Nagtagna an Dios nga usa nga “tulin” an magigin yawi han paglaom. Katapos, dudugmukon hini nga tulin hi Satanas ngan susulbaron an ngatanan nga karaotan nga epekto han iya ginbuhat ha Eden. (1 Juan 3:8) Kondi mag-aantos anay ito nga tulin. Sasamaran hiya ni Satanas, nga magriresulta han iya kamatayon. Magpapasakit gud ito kan Jehova. Pero ha urhi, ito nga kasakit magigin sulit kay diri maihap nga mga tawo an matatalwas ha sala ngan kamatayon.

ANO AN GINBUHAT HAN MAGPAKASASALA HA PANAHON HAN BIBLIA BASI UYONAN NI JEHOVA?

6. Ano an ginbuhat han matinumanon nga kalalakin-an, sugad kanda Abel ngan Noe, basi magin duok kan Jehova?

⁶ Paglabay hin mga siglo, hinay-hinay nga mas ginklaro ni Jehova kon paonan-o mahimo magin duok ha iya an makasasala nga mga tawo. Hi Abel, an ikaduha nga anak nira Adan ngan Eva, an siyahan nga tawo nga nagpakita hin pagtoo kan Jehova katapos han nahitabo nga pagrebelde ha Eden. Tungod kay hinigugma ni Abel hi Jehova ngan karuyag niya nga mapalipay Hiya ngan magin duok ha Iya, naghalad hiya. Hi Abel paraataman hin karnero, salit nagkuha hiya hin pipira han iya nati nga mga karnero ngan gin-ihaw, ngan iginhalad kan Jehova. Ano an nagin reaksyon ni Jehova? “Nalipay [hiya] kan Abel ngan ha iya halad.” (Gen. 4:4) Iginpahayag ni Jehova an pag-uyon ha pariho nga mga halad han mga tawo nga nahigugma ha iya ngan nasarig ha iya—sugad kan Noe. (Gen. 8:​20, 21) Pinaagi ha pagkarawat ha sugad nga mga halad, iginpakita ni Jehova nga puydi makarawat han makasasala nga mga tawo an iya pag-uyon ngan magin duok ha iya.b

7. Ano an aton mahibabaroan nga leksyon ha pagin andam ni Abraham nga ihalad an iya kalugaringon nga anak?

⁷ Ginhangyo ni Jehova hi Abraham, usa nga tawo nga may pagtoo, nga buhaton an usa nga butang nga makuri gud—an paghalad han iya kalugaringon nga anak hi Isaac. Sigurado gud nga inabat ni Abraham nga ito gud an pinakamasakit nga toka ha iya. Bisan pa hito, sinugot hiya kan Jehova. Pero ginpugngan hiya han Dios han papatayon na niya an iya anak. Ito nga ehemplo nagtututdo hin importante nga kamatuoran para ha ngatanan nga tawo nga may pagtoo—andam hi Jehova nga ihatag an iya kalugaringon nga hinigugma nga Anak sugad nga halad. Sugad gud hito kahinigugma ni Jehova an mga tawo.​—Gen. 22:​1-18.

8. Ano an aton mahibabaroan tikang ha damu nga halad nga iginsusugo han Balaud? (Levitico 4:​27-29; 17:11)

⁸ Paglabay hin mga siglo, an Balaud nga iginhatag ha nasud han Israel nagkikinahanglan hin damu nga halad nga hayop basi mapara an mga sala han katawohan han Dios. (Basaha an Levitico 4:​27-29; 17:11.) Ini nga mga halad nagpapakita nga hi Jehova magtatagana hin mas maopay nga halad nga bug-os nga makakagwara ha sala han mga tawo. An mga propeta han Dios gin-giyahan nga isaysay nga an iginsaad nga tulin, nga amo ngay-an an espesyal nga Anak han Dios, mag-aantos ngan papatayon. Papatayon hiya sugad han iginhahalad nga karnero. (Isa. 53:​1-12) Hunahunaa la: Ihahatag ni Jehova an iya kalugaringon nga hinigugma nga Anak basi ihalad para matalwas an mga tawo—upod ka na—tikang ha sala ngan kamatayon!

ANO AN GINBUHAT NI JESUS BASI MAGTALWAS?

9. Ano an ginsiring ni Juan Bawtista mahitungod kan Jesus? (Hebreo 9:22; 10:​1-4, 12)

⁹ Ha siyahan-siglo C.E., nakita han surugoon han Dios nga hi Juan Bawtista hi Jesus nga taga-Nazaret ngan nagsiring: “Kitaa, an Kordero han Dios nga nagkukuha han sala han kalibotan!” (Juan 1:29) Ini nga giniyahan nga mga pulong nagpakilala kan Jesus sugad nga an maiha na nga igintagna nga tulin. Ihahatag niya an iginsaad nga halad. Yana gud la nagin marig-on an paglaom para ha magpakasasala nga tawo—bug-os nga kadaogan ha sala.​—Basaha an Hebreo 9:22; 10:​1-4, 12.

10. Paonan-o iginpakita ni Jesus nga ‘kinanhi hiya basi tawagon’ an magpakasasala?

¹⁰ Naghatag hi Jesus hin espesyal nga atensyon ha mga tawo nga binubug-atan tungod han sala ngan gin-imbitar niya hira nga magin iya mga sumurunod. Maaram hiya nga an rason gud han pag-antos han mga tawo amo an sala. Salit ginbuligan niya an kalalakin-an ngan kababayin-an nga kilala nga makasasala. Nagsaysay hiya pinaagi hin ilustrasyon: “An maghimsog nga mga tawo diri nanginginahanglan hin doktor, kondi an mga may sakit.” Nagsiring pa hiya: “Kinanhi ako basi tawagon, diri an magtadong nga mga tawo, kondi an magpakasasala.” (Mat. 9:​12, 13) Ngan ito an iya ginbuhat. Mahigugmaon nga ginpasaylo niya an mga sala han babaye nga naghugas han iya tiil pinaagi han iya mga luha. (Luc. 7:​37-50) Nagtutdo hiya hin importante nga mga kamatuoran ha Samaritana ha may bubon, o atabay, bisan kon maaram hiya han iya imoral nga pagkinabuhi. (Juan 4:​7, 17-19, 25, 26) Gintagan pa ngani han Dios hi Jesus hin gahum basi wad-on an kataposan nga resulta han ngatanan nga sala—an kamatayon. Paonan-o? Nagbanhaw hi Jesus hin mga tawo—lalaki ngan babaye, kabataan ngan mga adulto.​—Mat. 11:5.

11. Kay ano nga an makasasala nga mga tawo komportable kan Jesus?

¹¹ Diri urusahon nga komportable kan Jesus bisan an mga tawo nga makasasala gud. Nagpakita hiya ha ira hin pagpaid ngan empatiya. Waray hira mag-alang ha pagdaop ha iya. (Luc. 15:​1, 2) Ngan ginkumendasyonan ni Jesus ngan ginbalosan an sugad ha ira nga nagpakita hin pagtoo ha iya. (Luc. 19:​1-10) Iginpakita niya an perpekto nga ehemplo han kalooy han iya Amay. (Juan 14:9) Pinaagi ha pulong ngan buhat, iginpakita niya nga an iya mapinairon ngan maloloy-on nga Amay nahigugma ha mga tawo ngan karuyag nga buligan an kada tagsa ha ira nga magdaog ha pakig-away ha sala. Ginbuligan ni Jesus an makasasala nga mga tawo nga karuyag bag-uhon an ira pagkinabuhi ngan sumunod ha iya.​—Luc. 5:​27, 28.

12. Ano an igintutdo ni Jesus mahitungod ha iya mismo kamatayon?

¹² Maaram hi Jesus han mahitatabo ha iya. Diri la makausa nga ginsidngan niya an iya mga disipulo nga tatrayduron hiya ngan papatayon ha kahoy. (Mat. 17:22; 20:​18, 19) Maaram hiya nga an iya halad magkukuha han sala han kalibotan, sugad han ginsiring ni Juan ngan han igintagna han mga propeta. Nagtutdo liwat hi Jesus nga katapos niya ighalad an iya kinabuhi, igpapahirani niya ha iya an “ngatanan nga klase hin tawo.” (Juan 12:32) Mapapalipay han makasasala nga mga tawo hi Jehova pinaagi ha pagkarawat kan Jesus sugad nga ira Ginoo ngan pinaagi ha pagsunod han iya mga pitad. Kon bubuhaton nira ito, magkakaada na hira “kagawasan tikang ha sala.” (Roma 6:​14, 18, 22; Juan 8:32) Salit kinaburut-on ngan maisugon nga gin-atubang ni Jesus an iya masakit gud nga kamatayon.​—Juan 10:​17, 18.

13. Paonan-o namatay hi Jesus, ngan ano an igintututdo ha aton han iya kamatayon mahitungod kan Jehova nga Dios? (Kitaa liwat an piktyur.)

¹³ Hi Jesus gintraydor, gin-aresto, gin-insulto, ginpakaraot, ginsentensyahan, ngan gin-torture pa ngani. Gindara hiya han mga sundalo ha lugar diin hiya papatayon ngan iginraysang hiya ha kahoy. Samtang matinumanon nga gin-iilob niya an ngatanan hito nga kasakit, may-ada mas nasasakitan pa gud—hi Jehova nga Dios. Waray niya gamita an iya waray tubtoban nga gahum ngan waray hiya manginlabot. Kay ano? Ano an posible nga nagpagios ha mahigugmaon nga Amay nga pabay-an nga mag-antos ngan mamatay an iya Anak? Tungod han gugma. Hi Jesus nagsiring: “Hinigugma gud han Dios an kalibotan salit iginhatag niya an iya bugtong nga Anak, basi an bisan hin-o nga nagpapakita hin pagtoo ha iya diri mabungkag kondi magkaada kinabuhi nga waray kataposan.”​—Juan 3:16.

14. Ano an igintututdo ha aton han halad ni Jesus?

¹⁴ An halad ni Jesus amo an pinakadaku nga ebidensya nga hinigugma gud ni Jehova an mga tulin nira Adan ngan Eva. Ginpapamatud-an hito nga hinigugma ka gud ni Jehova. Iginsakripisyo niya an iya kalugaringon nga hinigugma nga Anak ngan gin-ilob an duro nga kasakit nga imo maiimadyin basi matalwas ka tikang ha sala ngan kamatayon. (1 Juan 4:​9, 10) Oo, karuyag niya nga buligan an kada tagsa ha aton nga makig-away ha sala—ngan magdaog!

15. Ano an dapat naton buhaton basi magpahimulos ha regalo han Dios nga halad-lukat ni Jesus?

¹⁵ Tungod han regalo han Dios, nga halad-lukat han iya bugtong nga Anak, mapapasaylo an aton mga sala. Pero basi makarawat an pagpasaylo han Dios, dapat may buhaton kita. Ano ito? Ginsumat ni Juan Bawtista ngan ni Jesus mismo an baton: “Pagbasol kamo, kay an Ginhadian han langit hirani na.” (Mat. 3:​1, 2; 4:17) Salit an pagin mabinasulon an yawi kon karuyag gud naton nga makaato ha sala ngan magin duok ha aton mahigugmaon nga Amay. Pero ano an karuyag sidngon han pagbasol, ngan paonan-o ito nabulig ha aton nga maatohan an aton pagin makasasala? Babatunon ito ha sunod nga artikulo.