Jehovah tell Abraham say make e sacrifice im son Isaac to-am. This thing wey Jehovah tell-am go don worry Abraham well-well and e no easy for-am. Even with this one, Abraham obey Jehovah. When Abraham want kill Isaac, Jehovah stop-am. This example teach us wetin Jehovah go do for people wey get faith. Jehovah ready to give im only special Son as sacrifice! This one show the kind special love wey Jehovah get for us. (Gen. 22:​1-18) Plenty years after that time, for the Law wey Jehovah give Israel people, e tell them say make them de use animals do sacrifice to-am so that e go fit forgive their sins. (Lev. 4:​27-29; 17:11) The sacrifice wey them de do show say Jehovah go do the sacrifice wey better pass for future, the one wey go save people from sin and death. God use im prophets to write about the pikin wey e don promise. The prophets explain say them go suffer that special Son of God and kill-am to fit save people from sin and death, and you dey among them!—Isa. 53:​1-12. w24.08 4 ¶7-8

When you de do your Bible reading, try think about how you go do wetin you de read. As you de read, ask yourself say, ‘How I fit use wetin I de read now or for future?’ For example, imagine say you read 1 Thessalonians 5:​17, 18. After you don read the two verse, you stop and think about how many times you de pray, and if your prayer de really come from your heart. Another thing be say, you fit think about the things wey Jehovah don do for you. You fit decide say you go thank Jehovah for three things. Even if na only small time you use think deep about wetin you read from Bible, e go help you understand-am well, and you go fit do wetin you learn. If you de do like this everyday when you de read Bible, e go make you be better servant of Jehovah. w24.09 4-5 ¶9-10

Jehovah make us for special way. Even though say we de happy when we receive something, na when we give to people we de happy pass. E de really sweet us when we fit help our brothers and sisters. And we de happy when them tell us say them value wetin we do. But, whether the person tell us say e value wetin we do or e no tell us, make we de happy say we de do the correct thing. No forget say no matter wetin you give to people, “Jehovah go fit give you pass that one.” (2 Chron. 25:9) The truth be say, nobody fit ever give pass Jehovah! And na Jehovah blessing be the best. So, make we make up our mind to continue to copy the way Jehovah de give. w24.09 31 ¶20-21