Matthew

24 Now, as Jesus de comot from the temple, im disciples come meet-am to show-am the buildings for the temple. 2 E come tell them say: “Una de see all this things, no be so? True-true, I de tell una say, them no go ever leave one stone make e remain ontop another stone. Them go fall all of them down.”

3 As e sitdown for the Mount of Olives, the disciples come meet-am when e dey alone and ask-am say: “Tell us when this things go happen, and wetin go be the sign say you don dey around* and say we dey the last days of this world?”*

4 Then Jesus answer them say: “Make una dey careful so that nobody go deceive una, 5 because plenty people go use my name come, de talk say, ‘I be Christ,’ and them go deceive plenty people. 6 Una go hear when them de fight war and news about war, but make una no fear, because this things must happen, but the end never come.

7 “Because nation go de fight nation, and kingdom go de fight kingdom, food no go too dey, and ground go de shake open for different-different place. 8 All this things na the beginning of things wey go cause serious pain.*

9 “Then people go suffer una* and kill una, and all the nations go hate una because of my name. 10 Another thing be say, plenty people go fall, and them go sell each other give their enemies and them go hate each other. 11 Plenty lie-lie prophets go come, and them go deceive plenty people; 12 and because wicked things* go de plenty more-more, the love wey most of the people get go de go down. 13 But the person wey don endure* reach the end, them go save-am. 14 And them go preach this good news of the Kingdom for the whole world, so that all the nations go hear-am, and after that one, the end go come.

15 “So, when una see the useless dirty thing wey de destroy things wey stand for holy place as prophet Daniel talk (make the person wey de read-am* use deep sense), 16 then make people wey dey for Ju·de′a start to run go the mountains. 17 Make person wey dey ontop house no come down come carry things for im house, 18 and make the person wey dey for farm no come back come take the cloth wey e de wear ontop. 19 That time, women wey get belle and the ones wey get small baby go suffer! 20 Make una continue to pray say make the time wey una go run no fall for time wey cold dey or for Sabbath day. 21 Because that time, serious trouble* go dey. The kind one wey never dey before since the world start, come reach now, and e no go dey again. 22 The truth be say, if them no reduce the days, nobody go survive, but because of the people wey God don choose, them go reduce the days.

23 “That time, if anybody tell una say, ‘See! The Christ dey here,’ or, ‘E dey there!’ make una no believe-am. 24 Because lie-lie Christs and lie-lie prophets go come, and do big-big miracles and wonderful things so that them go deceive, if possible, even the people wey God don choose. 25 See! I don warn una. 26 So, if people de tell una say, ‘See! E dey for wilderness,’ make una no go. ‘See! E dey the rooms wey dey inside-inside,’ make una no believe-am. 27 Because just as thunder light de come from east and people wey dey west fit still see-am, na so e go be when the Son of man don dey around.* 28 Anywhere wey dead body dey, na there eagles go gather.

29 “Once the trouble of that time don pass, the sun go dark, and moon no go bring light, stars go fall from heaven, and the powerful things for heaven go shake. 30 Then the sign of the Son of man go appear for heaven, and people for all the tribes wey dey the earth go nack theirself, de cry, and them go see the Son of man wey de come for the cloud of heaven with power and big honor. 31 And e go send im angels go with loud trumpet sound, and them go gather the people wey e don choose together from all direction for the earth,* from one end of the heaven go reach the other end.

32 “Now make una learn from this example of fig tree: Once small-small branch start to come out and produce leaves, una go know say dry season don near. 33 Na so e still be for una, when una see all this things, make una know say e don near, e dey for front of the door. 34 True-true, I de tell una say, this generation no go ever comot until all this things happen. 35 Heaven and earth go comot, but the things wey I talk no go ever fail.

36 “As for that day and hour, nobody know when e go come, whether the angels for heaven or the Son, but na only the Papa. 37 Because just as e be for the time of Noah, na so e go be when the Son of man don dey around.* 38 Because as e be for that time, before the Flood, wey people de chop and drink, men de marry and them de give women out for marriage, until the day wey Noah enter inside the ark, 39 and them no put mind for wetin de happen until the Flood come and wipe all of them comot. Na so e go be when the Son of man don dey around.* 40 That time, two men go dey for farm, them go take one, and leave the other one. 41 Two women go de grind something for grinding stone, them go take one, and leave the other one. 42 So make una continue to watch because una no know the day wey una Lord de come.

43 “Make una know say: If to say the owner of the house know the time* wey thief go take come, e for no sleep and e for no allow make them break im house enter. 44 Because of this one, make una too show say una ready because the Son of man de come for the hour wey una no think say e go come.

45 “Who really be the faithful and discreet* slave wey im oga don choose to take care of the servants for im house and to give them their food for the correct time? 46 That slave go happy if im oga come back and see say e de do this one! 47 True-true, I de tell una say, e go choose-am make e take care of all the things wey e get.

48 “But if e ever happen say, that wicked slave talk for im heart say, ‘My oga de delay,’ 49 and e start to beat the other slaves, and de chop and de drink with people wey them know as drunkards, 50 the oga of that slave go come for the day wey e no expect and for the hour wey e no know, 51 and e go give-am the worst kind of punishment and e go put-am join people wey de pretend. Na there e go dey, de cry and de grind im teeth.