They Put Purple Triangle for Their Cloth

Maud de live for France. E de work for one school. E work na to help children wey their body no too complete and e de stay with the children for class. One time, the children dey for class and them de learn about the time wey Germany people (Nazi) de kill Jew people and de put them for prison wey they go really suffer them (concentration camp). All the prisoners for the camp de wear uniform, and their uniform de get label. They make the labels with different-different colors. The color and the shape of the label wey any prisoner wear de show the reason why that person dey for prison.

When the teacher de talk about the purple triangle label wey some of the prisoners de wear, the teacher come talk say: “E be like say na because this ones na man wey de sleep with man or woman wey de sleep with woman.” After the class don end, Maud meet the teacher and e explain say that purple triangle na the label wey the Nazi people de use to know who be Jehovah Witness for the prison.a Maud still tell the teacher say e fit bring some information about that topic. The teacher gree and e tell Maud say e fit share wetin e know about the story with every body for the class.

When another teacher come teach the children for the class about that topic again, e use one picture wey de show the different-different label wey them de put for the cloth of the prisoners. The picture show-am clear say na Jehovah Witness people de wear the uniform wey get purple triangle. After that class end, Maud tell that teacher say e get some things wey e fit tell-am about that topic. The teacher gree and e arrange say make Maud tell the children for the class wetin e know.

Maud prepare to explain everything for the children for 15 minutes. But when the time reach, the teacher tell-am say: “You fit use 1 hour.” Maud first show the children one video about how the Nazi people suffer Jehovah Witness that time. When they watch the video reach the place wey talk how the Nazi people take 800 Jehovah Witness children from their papa and mama, Maud pause the video and read the story of three of those children. After they watch the video finish, Maud end with one bye-bye letter from 1940 wey one 19 years old Jehovah Witness for Austria write. E name na Gerhard Steinacher and e write the letter to e papa and mama some hours before the Nazi people kill-am.b

Maud go the second class and explain the same thing for them. Now, any time wey the two teachers de teach their students about people wey Nazi put for prison and suffer them, them de make sure say they tell their students about Jehovah Witness people, and this na because Maud dey bold.