THINGS WEY FIT HELP FAMILY | MARRIAGE
To De Over-Drink for Marriage
Your husband or wife don complain about the way you de drink? If na so e be, e get some things wey you go need to think about.
For this article we go talk about
To de over-drink de cause big problem for marriage
To de over-drink fit cause all kind of health problem, like heart disease, cirrhosis of the liver, and cancer. But to de over-drink no de only cause health problem, e still de cause other problem for marriage like to de treat your husband or wife for bad way, to go sleep with another person, money problem, and divorce.
Bible talk say when person de over-drink, “For the end ‘[alcohol] de bite like snake, and e de poison like viper.” (Proverbs 23:32) How you fit know say, e de hard you to do without alcohol?
You no de fit stay without say you no drink?
The questions wey follow fit help you know if e de hard you to do without alcohol:
E de hard to control how you de drink?
You de always think of the next time when you go drink again?
You de drink even though say e de cause problem for your life and for your marriage?
You de feel like say you de sick when you try to stop to drink?
You and your husband or wife de argue sometimes about the way you de drink?
You don de drink well-well pass as e be before?
You de hide de drink or you de hide alcohol for house or workplace?
If your answer to one or more for this questions na yes, e fit mean say alcohol don de enter your blood. E still mean say you no de fit control how you de drink.
No de defend yourself
Your husband or wife don complain about the way you de drink? If na so, you fit don talk say that one no be problem or give excuse for wetin you de do. You fit de blame other people, even your husband or wife and de talk say:
“If you de treat me well, I no think say I for de drink.”
“If you get the kind work wey I get, you self go de drink too.”
“I know plenty people wey drink pass me well-well.”
If you de talk this kind things, e mean say to de drink don de important to you pass to dey happy for your marriage? Which one suppose dey important pass?
Bible advice: “Man wey don marry de worry about . . . , how e fit make im wife happy.”—1 Corinthians 7:33.
Instead make you de talk say you no get problem with alcohol try to listen to your husband or wife and think about why e de worry
Wetin you fit do
Listen to wetin your husband or wife de talk. Even if your husband or wife de over-worry about the matter, e go make sense to adjust. If you no fit adjust and you continue to de drink even though say your husband or wife no like-am, this one fit de show say alcohol don be problem.
Bible advice: “Make each person no de look for wetin go benefit only imself, but make e be wetin go benefit another person too.”—1 Corinthians 10:24.
Learn the truth. To fit win war, soldier need to know the style wey e enemy go use. Na the same thing with alcohol. To fit win-am, you need to learn the truth about alcohol and how e de make people im slave. You still need to learn wetin you must do, make you no de depend on alcohol and start to drink again for future.
Bible advice: “Make una continue to run from those things wey una body want, wey de fight una.”—1 Peter 2:11.
Accept help. Different-different medical program dey wey de help people wey get problem with alcohol, like place wey them de treat them and hospitals. You fit still tell mature friend wey fit help you see other reason wey de make-am hard for you to run from alcohol. Make you call this person anytime wey body de move you to drink again.
Try go see doctor make e tell you things wey fit make your condition better
Bible advice: “Real friend de show love all the time, and na brother wey you fit trust when problem dey.”—Proverbs 17:17.
To de over-drink no be small matter wey fit just solve when person read one short article, or na something wey you fit win if you just talk say, “I go try to reduce how I de drink.” But, make you know say how you handle the matter no go only affect your health, e go still affect your marriage.
To learn more: Read the articles wey dey down to learn how other people don stop to de over-drink.
“I No Longer Feel Ashamed of Myself”
Still, watch the video ‘I Tire for the Kind Life Wey I De Live’