LESSON 51
How You Fit Make Jehovah Happy With the Way You De Talk?
When Jehovah make us, e give us one fine gift. The gift na to talk. How we de use-am dey important to Jehovah? Yes e dey important! (Read James 1:26.) So how we fit use the gift to talk for way wey go make Jehovah happy?
1. The gift to talk, how we fit use-am?
Bible tell us say: “Make wuna continue de encourage each other and de make each other strong.” (1 Thessalonians 5:11) You fit think of some people wey you fit encourage? Wetin you fit do to make them feel better? Do something to make them know say them dey important to you. You fit tell them wetin you like about them. You know any verse wey you fit use encourage person? Plenty verses dey wey you fit choose from. Still remember say wetin you talk and the words wey you use fit affect other people. So, make we always try to talk for kind and gentle way.—Proverbs 15:1.
2. Which kind talk we suppose avoid?
Bible talk say: “Make rotten word no come out of wuna mouth.” (Read Ephesians 4:29.) E mean say we no go use bad words or dey harsh when we de talk or we no go talk something to make person feel bad. And too, we no go de talk bad things about people or lie about them to spoil their name.—Read Proverbs 16:28.
3. Wetin go help us to talk for way wey go make other people strong?
Plenty times the things wey we de talk about de show how we de really feel and wetin we de think about. (Luke 6:45) So make we train ourself to de think about good things—things wey dey correct, dey clean, dey fine, and wey people de praise. (Philippians 4:8) If we want de think about good things, we must use sense choose our friends and the things wey we de use enjoy ourself. (Proverbs 13:20) E go still help if you think well about wetin you go talk, when you go talk, and how you go talk-am. Think about how wetin you talk go affect other people. Bible talk say: “Wetin person no use sense talk be like when they use knife chuk person. But wetin they use sense talk de make person well.”—Proverbs 12:18.
LEARN MORE THINGS
Learn how you fit talk for way wey go make Jehovah happy and still encourage other people.
4. Control wetin you de talk, how you de talk and when you de talk
Sometimes, we de talk things wey we de regret after. (James 3:2) Read Galatians 5:22, 23, and talk about this questions:
Which of this qualities you go pray make God give you to help you control how you de talk? How this qualities fit help you?
Read 1 Corinthians 15:33, and talk about this question:
How your friends and the things wey you choose to enjoy yourself fit affect the way you de talk?
Wetin fit affect the way you de talk?
Read Ecclesiastes 3:1, 7, and talk about this question:
Which time e go good make you no talk anything or wait for the correct time before you talk something?
5. Talk good things about other people
Wetin go help us make we no de talk wetin go make other people feel bad? Play the VIDEO, and talk about the questions for under.
For the video, why the brother want change the way e de talk about other people?
Wetin the brother do to change?
Read Ecclesiastes 7:16, and talk about this question:
Wetin we go remember when we de face the temptation to talk bad things about another person?
Read Ecclesiastes 7:21, 22, and talk about this question:
How this verses fit help you make you no de vex quick-quick when person talk bad things about you?
6. De talk to your family for kind way
Jehovah want make we de talk to our family for kind way and with love. Play the VIDEO, and talk about the question for under.
Wetin go help you make you de talk to your family for kind way?
Read Ephesians 4:31, 32, and talk about this question:
How you fit talk to people for your family for way wey go make them feel good?
Jehovah talk how e de feel about e Son, Jesus. Read Matthew 17:5, and talk about this question:
How you fit copy the example of Jehovah for the way you de talk to people for your family?
Look for chance to tell people wetin you like about them
SOME PEOPLE DE TALK SAY: “I de talk my mind. I no care if people no like wetin I talk.”
You gree with this thing wey people de talk? Why you answer like that?
WETIN THIS LESSON TEACH
Wetin we talk fit help person or make person feel bad. We need to think well about wetin we go talk, how we go talk, and when we go talk-am.
Wetin You Don Learn
Wetin be some ways wey you fit use wetin you de talk to help other people?
Which kind of talk you suppose avoid?
Wetin fit help us to talk for kind way and encourage people?
LEARN OTHER THINGS
Wetin fit help us to talk for way wey go encourage other people?
Learn wetin fit help you make you no de use bad words when you de talk.
“To Use Bad Words When We De Talk Really Bad?” (E dey for jw.org)
See wetin fit help you make you no de make the mistake to talk bad about other people.
Wetin I Go Do if Person De Tell Me Another Person Matter? (2:36)
See how Jehovah help one man make e stop to use bad words when e de talk.
“I Start to Really Think About How I De Live My Life” (The Watchtower, August 1, 2013)